វ៉ាស៊ីនតោន៖ ប្រធានាធិបតីសហរដ្ឋអាមេរិក ដូណាល់ ត្រាំ នឹងចុះហត្ថលេខាលើបទបញ្ជាឲ្យបិទក្រសួងអប់រំអាមេរិក នៅថ្ងៃព្រហស្បតិ៍ ទី២០ខែមីនានេះ។ នេះជាលើកដំបូងហើយដែលលោក ត្រាំ សម្រេចបិទក្រសួងកម្រិតខ្ពស់បែបនេះ ក្រោយពេលលោក និង លោក Elon Musk បានព្យាយាមបិទទីភ្នាក់ផ្ដល់ជំនួយ USAID។
យោងតាមការបញ្ជាក់របស់សេតវិមានកាលពីថ្ងៃពុធ បទបញ្ជានេះតម្រូវឲ្យរដ្ឋមន្ត្រីអប់រំ Linda McMahon ដឹកនាំចាត់វិធានការចាំបាច់ទាំងអស់ដើម្បីជួយសម្រួលដល់ការបិទក្រសួងនេះ និងប្រគល់សិទ្ធិអំណាចអប់រំទាំងអស់ទៅក្រសួងការបរទេស ព្រមទាំងធានានូវការផ្ដល់សេវា កម្មវិធី និង ផលប្រយោជន៍ផ្សេងៗទៀតដោយគ្មានការរាំងស្ទះ។
លោក ត្រាំ ធ្លាប់បានអំពាវនាវម្តងហើយម្តងទៀតឱ្យលុបចោលក្រសួងនេះ ដោយលោកបានហៅក្រសួងនេះថាជា «ការងារកេងចំណេញដ៏ធំ»។ លោកបានស្នើឲ្យបិទក្រសួងនេះក្នុងអាណត្តិដំបូងរបស់លោកម្តងរួចមកហើយ ប៉ុន្តែសភាមិនបានធ្វើសកម្មភាពទេ។
លោកស្រី Linda McMahon រដ្ឋមន្ត្រីអប់រំ កាលពីថ្ងៃចន្ទបានការពារផែនការរបស់លោក ត្រាំ ក្នុងការលុបចោលទីភ្នាក់ងារនេះ ប៉ុន្តែបានសន្យាថា ការផ្តល់មូលនិធិរបស់សាលាសហព័ន្ធដែលយល់ស្របដោយសភាក្នុងការបន្តជួយដល់សាលារៀន និងសិស្សដែលមានប្រាក់ចំណូលទាប។
បើតាមប្រភពដែលបានដឹងពីបទបញ្ជានេះ បាននិយាយថា កម្ចីសម្រាប់សិស្ស និងសេវាកម្មសម្រាប់កុមារមានពិការភាពដែលកំណត់ក្នុងច្បាប់ នឹងនៅតែបន្តអនុវត្ត។
យ៉ាងណាក៏ដោយ ចំណាត់ការនេះត្រូវបានជំទាស់ដោយគណបក្សប្រជាធិបតេយ្យ ដែលបានដាក់ពាក្យប្តឹងកាលពីសប្តាហ៍មុន ស្វែងរកការរារាំងរដ្ឋបាលលោក ត្រាំ មិនឲ្យមានការរុះរើក្រសួង និងបញ្ឈប់ការបណ្តេញបុគ្គលិកជិតពាក់កណ្តាល។
ការបិទជាបន្ទាន់នេះអាចរំខានដល់ជំនួយរាប់សិបពាន់លានដុល្លារទៅលើការអប់រំកម្រិត K-12 និងជំនួយសិក្សាសម្រាប់និស្សិតមហាវិទ្យាល័យ។
ក្រសួងអប់រំគ្រប់គ្រងទៅលើសាលារដ្ឋចំនួន ១០ម៉ឺនសាលា និង សាលាឯកជន ៣ម៉ឺន៤ពាន់ សាលា។ ប៉ុន្តែ មូលនិធិជាង ៨៥ភាគរយទទួលបានពីរដ្ឋរៀងៗខ្លួន និង ពីរដ្ឋាភិបាលមូលដ្ឋាន។ ក្រសួងនេះក៏គ្រប់គ្រងទៅលើកម្ចីរបស់សិស្សអាមេរិកាំងដែលគ្មានលទ្ធភាពបង់ថ្លៃសាលាពេញ ដែលមានទឹកប្រាក់ ១,៦លានលានដុល្លារ (ទ្រីលាន)៕
