កូរ៉េខាងត្បូងបានបញ្ជាក់​កាល​ពីថ្ងៃព្រហស្បតិ៍ថា ខ្លួននឹងផ្តល់ការលើកលែងទិដ្ឋាការដល់ភ្ញៀវទេសចរចិននៅក្នុងត្រីមាសទីបីនៃឆ្នាំ​២០២៥​នេះ ដើម្បីជំរុញ​វិស័យទេសចរណ៍ ចំពេលវិស័យនេះ​​កំពុង​ធ្លាក់ចុះ និងមុនកិច្ចប្រជុំកំពូលអាស៊ីប៉ាស៊ីហ្វិកចាប់ផ្តើមនៅចុងឆ្នាំនេះ។

ការផ្លាស់ប្តូរនេះកើតឡើងបន្ទាប់ពីការសម្រេចចិត្តរបស់ប្រទេសចិនកាលពីខែវិច្ឆិកាឆ្នាំមុន ដែល​អនុញ្ញាត​​ឲ្យ​ភ្ញៀវ​ទេចរ​​មកពីកូរ៉េខាងត្បូង និងបណ្តាប្រទេសអាស៊ី និងអឺរ៉ុបផ្សេងទៀតដែលធ្វើដំណើរសម្រាប់អាជីវកម្ម​ ទេសចរណ៍ និងដំណើរកម្សាន្តជាលក្ខណៈគ្រួសារ អាច​ ចូល​ប្រទេស​ចិន​ដោយ​គ្មាន​ទិដ្ឋាការ​រហូត​ដល់ដំណាច់ឆ្នាំនេះ។

លោក Choi Sang mok ប្រធានាធិបតី​ស្តីទីរបស់ប្រទេសកូរ៉េ​ខាង​ត្បូង​បាននិយាយថា៖ «យើងនឹងលើកលែងទិដ្ឋាការបណ្តោះអាសន្នសម្រាប់អ្នកទេសចរជាក្រុមមកពីប្រទេសចិននៅត្រីមាសទីបី ដើម្បីបង្កើនល្បឿននៃការងើបឡើងវិញនៃចំនួនភ្ញៀវទេសចរចិនមកកាន់ប្រទេសយើង»។

ប្រទេសកូរ៉េខាងត្បូងគ្រោងនឹងរៀបចំកិច្ចប្រជុំកំពូល នៃកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) នៅត្រីមាសទី ៤ ក្នុងឆ្នាំនេះនៅទីក្រុង Gyeongju ភាគអាគ្នេយ៍នៃប្រទេសដែលជាតំបន់ល្បីល្បាញពោពេញដោយទេសចរណ៍បេតិកភណ្ឌពិភពលោក។

កាលពីឆ្នាំមុន អ្នកដំណើរ ១៦,៤ លាននាក់បានទៅលេងកូរ៉េខាងត្បូង កើនឡើង ៤៨ភាគ​រយ ធៀបនឹងឆ្នាំ២០២៣។ យោងតាមទិន្នន័យរបស់រដ្ឋាភិបាលបានឱ្យដឹងថា ជនជាតិចិនមានចំណែកដ៏ធំបំផុតដែលមានចំនួន ២៨ ភាគរយ ហើយក្នុង​ចំណោម​ចំនួន​សរុប​នេះ ជិត​មួយ​ភាគ​បី​ជា​ស្ត្រី​ក្នុង​វ័យ​២០​ឆ្នាំ ទៅ​​៣០​ឆ្នាំ។

វប្បធម៌ពេញនិយមរបស់កូរ៉េខាងត្បូង​មាន​ចាប់ពីតន្ត្រី K-pop រហូតដល់ការបង្ហាញម៉ូដដែលបានទទួលស្គាល់ជាសាកលក្នុងរយៈពេលប៉ុន្មានទសវត្សរ៍ចុងក្រោយនេះ។

រដ្ឋាភិបាលក៏នឹងរៀបចំវិធានការបន្ថែម ក្នុងគោលបំណងទាក់ទាញភ្ញៀវទេសចរ ដូចជាកញ្ចប់ដំណើរកម្សាន្តតាមតម្រូវការ រួមមានទាំងម្ហូបអាហារកូរ៉េ និងផលិតផលថែរក្សាសម្រស់ ក្នុងគោលបំណងទាក់ទាញភ្ញៀវទេសចរឲ្យ​បានចំនួន ១៨,៥ លាននាក់នៅក្នុងឆ្នាំនេះ។

កំណើនសេដ្ឋកិច្ចរបស់ប្រទេសកូរ៉េខាងត្បូងត្រូវបានគេរំពឹងថានឹងថយចុះនៅឆ្នាំនេះ ដោយការចំណាយរបស់អ្នកប្រើប្រាស់នៅមានកម្រិតខ្សោយ ហើយ​ក៏​ចំពេលវិបត្តិនយោបាយកំពុងកើតឡើងដែលជះឥទ្ធិពលដល់វិស័យទេសចរណ៍យ៉ាងខ្លាំង៕