ប្រធានាធិបតីសហរដ្ឋអាមេរិក ដូណាល់ ត្រាំ បានចេញបទបញ្ជាបិទចោលក្រសួងអប់រំជាផ្លូវការ ក្រោយពេលក្រសួងនេះត្រូវបានបង្កើតឡើងតាំងពីឆ្នាំ១៩៧៩ ដោយលោកលើកហេតុផលថា ក្រសួងនេះមិនបានជួយឲ្យអាមេរិកាំងមានគុណភាពអប់រំខ្លាំងដូចជាមុខវិជ្ជាគណិតវិទ្យាជាដើម។លោកថា គុណភាពអប់រំនៅអាមេរិក មិនខ្លាំងដូចនៅប្រទេសមួយចំនួនទេដូចជា ដាណឺម៉ាក និង ហ្វាំងឡង់ជាដើម។
ការបិទចោលក្រសួងអប់រំនេះ ភារកិច្ចទាំងអស់នឹងត្រូវប្រគល់ឲ្យស្ថិតក្រោមរដ្ឋបាលរបស់លោក ហើយវាស្របទៅនឹងគោលនយោបាយរបស់លោកដែលបានសន្យានៅក្នុងពេលឃោសនាបោះឆ្នោត។ យ៉ាងណាក៏ដោយ ការបិទក្រសួងនេះទាំងស្រុង ត្រូវការការសម្រេចចិត្តពីសភា។
លោក ត្រាំ ថ្លែងថា៖ «រដ្ឋបាលរបស់ខ្ញុំ នឹងចាត់វិធានការដែលច្បាប់អនុញ្ញាតទាំងអស់ដើម្បីបិទក្រសួងនេះ»។លោកបន្តថា លោកនឹងយកចិត្តទុកដាក់ទៅលើលោកគ្រូ អ្នកគ្រូ និងអាចផ្ដល់ផលប្រយោជន៍កាន់តែប្រសើរដល់ពួកគេ។
រដ្ឋមន្ត្រីក្រសួងអប់រំ លោកស្រី Linda McMahon នឹងសម្របសម្រួលការងារទាំងអស់ដើម្បីបិទទីភ្នាក់ងារនេះ រហូតដល់ទីបញ្ចប់ដែលច្បាប់អនុញ្ញាត ហើយត្រូវធានាថា ដំណើរការនេះមិនធ្វើឲ្យរំខានដល់ការផ្ដល់សេវា ដំណើរការនៃកម្មវិធីនិងផលប្រយោជន៍នានា។
យ៉ាងណាក៏ដោយ អ្នកនយោបាយពីគណបក្សប្រជាអធិបតេយ្យ និងមនុស្សជាច្រើននៅក្នុងវិស័យអប់រំអាមេរិកបានរិះគន់វិធានការនេះ ដោយលើកឡើងពីកង្វល់អំពីការបោះបង់ចោលកុមារនិងសាលានានាដែលពឹងលើមូលនិធិពីក្រសួងនេះ។
ការបិទក្រសួងនេះក៏ប៉ះពាល់ដល់សិស្សនិស្សិតដែលកំពុងជាប់កម្ចី និង ទទួលបានជំនួយឥតសំណងពីក្រសួងនេះ និងប៉ះពាល់ដល់សាលាដែលមានកុមារពីគ្រួសារមានចំណូលទាបដែលសាលាបានផ្ដល់ការឧបត្ថម្ភបន្ថែម៕
