ប្រទេសហ្វាំងឡង់បន្តឈរលំដាប់ថ្នាក់ទី១ ជាលើកទី៨ជាប់ៗគ្នា ក្នុងនាមជាប្រទេសដែលមានសេចក្ដីសប្បាយរីករាយ សុភមង្គល នៅក្នុងរបាយការណ៍ស្ដីពីសុភមង្គលឆ្នាំ២០២៥។ អ្នកជំនាញយល់ថា ចំណាត់ថ្នាក់ល្អនេះដោយសារតែកត្តាធម្មជាតិផងនិងប្រព័ន្ធសុខមាលភាពខ្លាំង។
របាយការណ៍ World Happiness Report របស់មជ្ឈមណ្ឌលស្រាវជ្រាវសុខមាលភាពនៃសាកលវិទ្យាល័យអុកស្វឺត (Wellbeing Research Centre at the University of Oxford) គាំទ្រដោយអង្គការសហប្រជាជាតិ ចេញផ្សាយកាលពីសប្ដាហ៍មុនបានបញ្ជាក់ថា ប្រទេសក្នុងតំបន់ Nodic ចំនួន៣ទៀតរួមមាន ដាណឺម៉ាក អ៊ីស្លង់ និង ស៊ុយអែត ឈរលេខរៀងទី២ ទី៣ និងទី៤រៀងគ្នា។ ចំណែកចក្រភពអង់គ្លេស និងសហរដ្ឋអាមេរិកឈរលំដាប់ថ្នាក់ទី២៣ និង ២៤។
ការកំណត់ចំណាត់ថ្នាក់នេះ ផ្អែកលើលក្ខខណ្ឌមួយចំនួនដើម្បីបង្ហាញពីកម្រិតនៃការធ្វើអំពើល្អ ដូចជា ការបរិច្ចាគ ការងារស្ម័គ្រចិត្ត ការជួយដល់ជនចម្លែកមិនធ្លាប់ស្គាល់ ការប្រគល់កាបូបលុយដែលបាត់ពីសំណាក់អ្នកជិតខាង មនុស្សចម្លែក និងសមត្ថកិច្ចដែលបានរកឃើញ។ នៅក្នុងការវាយតម្លៃសម្រាប់ឆ្នាំ២០២៥នេះ ការប្រគល់កាបូបលុយដែលបានបាត់គឺជាកត្តាវាស់ស្ទង់មួយដ៏សំខាន់។
របាយការណ៍រកឃើញថា មនុស្សចម្លែកមានចិត្តល្អ ២ដងលើសពីអ្វីដែលមនុស្សធ្លាប់បានគិត។ ការកំណត់នេះធ្វើឡើងដោយការធ្វើជាបាត់កាបូបលុយនៅកន្លែងណាមួយ ហើយរង់ចាំមើលថាតើអ្នករើសបានកាបូននោះប្រគល់វាទៅឲ្យម្ចាស់វិញឬអត់។
លទ្ធផលបង្ហាញថា ការប្រគល់កាបូបនោះមកវិញ មានអត្រា២ដងលើសអ្វីដែលមនុស្សបានគិត។ អ្នកស្រាវជ្រាវកំណត់ថា ការមានចិត្តល្អរបស់មនុស្សដទៃគឺជាប់ទាក់ទិននឹងក្ដីរីករាយ ឬ សុភមង្គល។
