លោក JD Vance អនុប្រធានាធិបតីសហរដ្ឋអាមេរិក នឹងធ្វើដំណើរទៅកាន់​ទឹកដី​ហ្គ្រីនឡែន (Greenland) ដែលជាដែនដីពាក់កណ្តាលស្វយ័តរបស់ប្រទេសដាណឺម៉ាក ដែលប្រធានាធិបតី អាមេរិក ដូណាល់ ត្រាំ​ ចង់បានយ៉ាង​ខ្លាំង។

នៅក្នុងវីដេអូដែលបានបង្ហោះនៅលើប្រព័ន្ធផ្សព្វផ្សាយសង្គម X លោក Vance បាននិយាយថាលោកនឹងទៅសួរសុខទុក្ខអ្នកយាមរបស់សហរដ្ឋអាមេរិកមួយចំនួននៅក្នុងកងកម្លាំងអវកាសនៅឆ្នេរសមុទ្រភាគពាយព្យនៃ​ប្រទេស​ ហ្គ្រីនឡែន ហើយថែមទាំងពិនិត្យមើលថាតើមានអ្វីកើតឡើងចំពោះសន្តិសុខរបស់ ហ្គ្រីនឡែន​ ផងដែរ។

លោក Vance និយាយថា៖ «ប្រទេសជាច្រើនផ្សេងទៀតបានគំរាមកំហែង ហ្គ្រីនឡែន​ ... បានគំរាម​ប្រើប្រាស់ទឹកដី​និងផ្លូវទឹករបស់​ប្រទេស​នេះ​ដើម្បីគំរាមកំហែងសហរដ្ឋអាមេរិក គំរាមកំហែងកាណាដា និងគំរាមកំហែងប្រជាជននៅហ្គ្រីនឡែន។ ដូច្នេះ​យើង​នឹង​ពិនិត្យ​មើល​ថា​តើ​មាន​អ្វី​ទៅ​ទី​នោះ»។

លោកបានបន្ថែមទៀតថា៖ «ជាអកុសល មេដឹកនាំទាំងនៅអាមេរិក និងនៅដាណឺម៉ាក មិនអើពើនឹងហ្គ្រីនឡែន​យូរពេកហើយ។ វាអាក្រក់ណាស់សម្រាប់ ហ្គ្រីន​ឡែន​ ហើយវាក៏អាក្រក់សម្រាប់សន្តិសុខនៃពិភពលោកទាំងមូលផងដែរ ដូច្នេះខ្ញុំនឹងទៅពិនិត្យមើល»។

ភរិយារបស់លោក Vance អ្នកស្រី Usha Vance រួមជាមួយទីប្រឹក្សាសន្តិសុខជាតិអាមេរិក លោក Mike Waltz និងរដ្ឋមន្ត្រីថាមពល Chris Wright ក៏នឹងធ្វើដំណើរជាមួយលោកទៅ ហ្គ្រីនឡែន​ ក្នុងសប្តាហ៍នេះផងដែរ។

អ្នកនាំពាក្យក្រុមប្រឹក្សាសន្តិសុខជាតិសេតវិមាន លោក Brian Hughes បាននិយាយកាលពីថ្ងៃចន្ទថា សហរដ្ឋអាមេរិកមាន «ផលប្រយោជន៍សន្តិសុខនៅក្នុងតំបន់អាកទិក»។

យ៉ាង​ណា​ក៏​ដោយ អ្នកនយោបាយនៅ​ប្រទេស​ហ្គ្រីនឡែន បានថ្កោលទោសផែនការ​ដំណើរទស្សនកិច្ចជាន់ខ្ពស់របស់សហរដ្ឋអាមេរិកដោយហៅវាថាជា «ការឈ្លានពានបង្កហេតុ និងការបង្ហាញអំណាច»។ ប៉ុន្តែ​លោក ដូណាល់​ ត្រាំ បានហៅដំណើរ​ទស្សនកិច្ច​នេះ​ថា«ជាមិត្តភាពមិនមែនជាការបង្កហេតុ» នោះ​ទេ៕