នាយករដ្ឋមន្ត្រីថៃ Paetongtarn Shinawatra។
បន្ទាប់ពីប្រឈមមុខនឹងញត្តិដកសេចក្ដីទុកចិត្ត ទីបំផុតនាយករដ្ឋមន្ត្រីថៃ Paetongtarn Shinawatra បានទទួលបានជ័យជម្នះក្នុងការបោះឆ្នោតទំនុកចិត្តនៅក្នុងសភានៅថ្ងៃនេះ។
លោកស្រី Paetongtarn Shinawatra បានរួចផុតពីការបោះឆ្នោតដកសេចក្តីទុកចិត្តនៅក្នុងសភាបានយ៉ាងងាយស្រួលនៅថ្ងៃពុធនេះ បន្ទាប់ពីមានការជជែកដេញដោលរយៈពេលពីរថ្ងៃ ពីដៃគូប្រកួតប្រជែងដែលជាបក្សប្រឆាំង ដែលបានចោទប្រកាន់ទៅលើអ្នកស្រីថា គ្រប់គ្រងប្រទេសមិនបានត្រឹមត្រូវ គេចវេសពន្ធ និងដឹកនាំប្រទេសក្រោមឥទ្ធិពលឪពុករបស់លោកស្រីគឺ លោក ថាក់ស៊ីន ស៊ីណាវ៉ាត្រា។
សមាជិកសភាបក្សប្រឆាំងបានលើកឡើងថា លោកស្រីបានទទួលឥទ្ធិពលហួសហេតុពីឪពុករបស់លោកស្រី គឺលោក ថាក់ស៊ីន ស៊ីណាវ៉ាត្រា អតីតនាយករដ្ឋមន្ត្រីថៃដែលជាឥស្សរជននយោបាយដ៏មានប្រជាប្រិយ និងមានភាពចម្រូងចម្រាសខ្លាំង។
លោក ថាក់ស៊ីន ត្រូវបានបណ្តេញចេញពីអំណាចដោយរដ្ឋប្រហារយោធាក្នុងឆ្នាំ២០០៦ ហើយបាននិរទេសខ្លួនទៅនៅក្រៅប្រទេស។ ប៉ុន្តែ ថ្មីៗនេះលោកបានវិលត្រឡប់មករស់នៅក្នុងប្រទេសថៃវិញ។
ក្នុងនោះដែរ គូប្រជែងរបស់លោកស្រី Paetongtarn បានលើកឡើងទៀតថា រដ្ឋបាលរបស់លោកស្រី កំពុងបម្រើផលប្រយោជន៍ដល់គ្រួសាររបស់លោកស្រីនិងឪពុករបស់លោកស្រី និងមិនអាចដោះស្រាយបញ្ហាជូនប្រជាជន ដូចជាបញ្ហាសេដ្ឋកិច្ចធ្លាក់ចុះ ការបំពុលបរិយាកាស ឧក្រិដ្ឋកម្ម និងអំពើពុករលួយជាដើម។
បន្ទាប់ពីការចោទប្រកាន់ សភាថៃក៏បានរៀបចំការបោះឆ្នោតលើទំនុកចិត្តនៅថ្ងៃពុធនេះ ដោយលទ្ធផលបញ្ជាក់ថាលោកស្រី Paetongtarn បានឈ្នះការគាំទ្រពីសមាជិកសភាចំនួន ៣១៩នាក់ក្នុងចំណោមសមាជិកសភា ៤៨៧នាក់៕
