មេដឹកនាំកូរ៉េខាងជើង គីម ជុងអ៊ុន មើលការហាត់សមរបស់ទាហាន នៅទីក្រុងព្យុងយ៉ាង កាលពីខែកុម្ភៈ។ Reuters
ប្រព័ន្ធផ្សព្វផ្សាយក្នុងស្រុកបានរាយការណ៍កាលពីថ្ងៃព្រហស្បតិ៍ថាលោក គីម ជុងអ៊ុន មេដឹកនាំប្រទេសកូរ៉េខាងជើងនឹងធ្វើដំណើរទស្សនកិច្ចទៅកាន់ប្រទេសរុស្ស៊ីនៅចុងឆ្នាំនេះ ខណៈដែលកូរ៉េខាងជើងត្រូវបានរាយការណ៍ថា បានបញ្ជូនទាហាន៣ពាន់នាក់ទៅជួយរុស្ស៊ី។
អនុរដ្ឋមន្ត្រីការបរទេសរុស្ស៊ី លោក Andrey Rudenko បាននិយាយថា ការរៀបចំសម្រាប់ដំណើរទស្សនកិច្ចនៅទីក្រុងមូស្គូរបស់លោក គីម ជុងអ៊ុន កំពុងរៀបចំឡើង ហើយដំណើរទស្សនកិច្ចរបស់រដ្ឋមន្ត្រីការបរទេសរុស្ស៊ីលោក Sergey Lavrov ទៅកាន់ទីក្រុងព្យុងយ៉ាង ក៏ត្រូវបានរៀបចំដូចគ្នាផងដែរ។ នេះបើយោងតាមទីភ្នាក់ងារព័ត៌មានរដ្ឋរបស់រុស្ស៊ី។
លោក គីម ជុអ៊ុន បានជួបជាមួយប្រធានាធិបតីរុស្ស៊ី លោក វ្លាឌឺមៀ ពូទីន កាលពីខែមិថុនាឆ្នាំមុន។ កិច្ចប្រជុំកំពូលកាលពីឆ្នាំមុនត្រូវបានធ្វើឡើងនៅក្រុងព្យុងយ៉ាងប្រទេសកូរ៉េខាងជើង ដោយនៅពេលនោះ លោក ពូទីន បានសម្តែងក្តីសង្ឃឹមថា កិច្ចប្រជុំបន្ទាប់របស់ពួកគេ នឹងធ្វើឡើងនៅទីក្រុងមូស្គូ។
មេដឹកនាំទាំងពីរបានចុះហត្ថលេខាលើកិច្ចព្រមព្រៀងការពារជាតិក្នុងអំឡុងពេលកិច្ចប្រជុំកំពូលក្រុងព្យុងយ៉ាង ហើយចាប់តាំងពីពេលនោះមកបានពង្រីកទំនាក់ទំនងយោធា និងសេដ្ឋកិច្ច។
នៅព្រឹកថ្ងៃព្រហស្បតិ៍ យោធាកូរ៉េខាងត្បូងបាននិយាយថា កូរ៉េខាងជើងបានដាក់ពង្រាយទាហានបន្ថែមយ៉ាងហោចណាស់ ៣ពាន់នាក់ទៅកាន់ប្រទេសរុស្ស៊ីក្នុងរយៈពេលពីរខែដំបូងនៃឆ្នាំ២០២៥នេះ បើទោះបីជាមានការរងរបួស និងស្លាប់ទាហានដែលត្រូវបានបញ្ជូនទៅធ្វើសង្គ្រាមប្រឆាំងនឹងអ៊ុយក្រែនក៏ដោយ។
ទីភ្នាក់ងារចារកម្មរបស់ទីក្រុងសេអ៊ូល ដែលជាសេវាស៊ើបការណ៍សម្ងាត់ជាតិ បាននិយាយនៅដើមឆ្នាំនេះថា ប្រទេសកូរ៉េខាងជើងត្រូវបានគេជឿថាបានដាក់ពង្រាយទាហានប្រហែល ១ម៉ឺន១ពាន់នាក់ទៅកាន់តំបន់ជួរមុខនៃសង្គ្រាមរុស្ស៊ី-អ៊ុយក្រែន ក្នុងជុំដំបូងរបស់ខ្លួននៅខែតុលាឆ្នាំមុន។
នាយសេនាធិការចម្រុះរបស់កូរ៉េខាងត្បូងបាននិយាយនៅក្នុងការធ្វើបច្ចុប្បន្នភាពចុងក្រោយរបស់ខ្លួនស្តីពីកូរ៉េខាងជើងថា៖ «ក្នុងចំណោមទាហានកូរ៉េខាងជើងប្រហែលជាង ១ម៉ឺននាក់ ដែលបានបញ្ជូនទៅប្រទេសរុស្ស៊ី បានទទួលរងរបួសចំនួនប្រហែល ៤ពាន់នាក់ ហើយទាហានប្រហែល ៣ពាន់នាក់ ឬច្រើនជាងនេះទៀតត្រូវបានបញ្ជូនបន្ថែមនៅក្នុងខែមករា និងខែកុម្ភៈ»។
នាយសេនាធិការចម្រុះរបស់កូរ៉េខាងត្បូងបានបន្ថែមថា រហូតមកដល់ពេលនេះ ទីក្រុងព្យុងយ៉ាងក៏បានផ្គត់ផ្គង់សព្វាវុធក្នុងចំនួនដ៏ច្រើនទៅដល់ទីក្រុងមូស្គូ ហើយការគាំទ្រនោះទំនងជានឹងបន្តដោយអាស្រ័យលើស្ថានភាព។ អាវុធទាំងនោះរួមមាន មីស៊ីលផ្លោងរយៈចម្ងាយខ្លី មីស៊ីលបាញ់ស្វ័យប្រវត្តិ និងគ្រាប់រ៉ុក្កែត ជាច្រើនសន្ធឹកសន្ធាប់។
យោធាកូរ៉េខាងត្បូងបាននិយាយថា ទោះបីជាការបាញ់បង្ហោះផ្កាយរណបបរាជ័យរបស់កូរ៉េខាងជើងក្នុងខែឧសភាកាលពីឆ្នាំមុនក៏ដោយ ក៏កូរ៉េខាងជើងនៅតែត្រៀមលក្ខណៈសម្រាប់ការប៉ុនប៉ងរបស់កូរ៉េខាងជើងក្នុងការដាក់ផ្កាយរណបឈ្លបយកការណ៍យោធាទៅកាន់គន្លងតារាវិថី ដោយមានជំនួយផ្នែកបច្ចេកវិទ្យាពីប្រទេសរុស្ស៊ី។
យោធាកូរ៉េខាងត្បូងបានបន្ថែមថា ខ្លួនកំពុងតាមដានយ៉ាងដិតដល់នូវសញ្ញាដែលទាក់ទងនឹងវឌ្ឍនភាពបច្ចេកវិទ្យា និងការបាញ់បង្ហោះជាបន្តបន្ទាប់។
កាលពីខែឧសភាកន្លងទៅ ទីក្រុងព្យុងយ៉ាងបានព្យាយាមដាក់ផ្កាយរណបយោធាចូលទៅក្នុងគន្លង ប៉ុន្តែ រ៉ុក្កែតដែលផ្ទុកផ្កាយរណបបានផ្ទុះនៅលើអាកាសភ្លាមៗបន្ទាប់ពីការហោះឡើង នេះបើយោងតាមយោធារបស់កូរ៉េខាងត្បូង។
កូរ៉េខាងជើងបានកាត់បន្ថយការហ្វឹកហ្វឺនយោធារដូវរងារបស់ខ្លួននៅឆ្នាំនេះ ដោយសារទាហានកំពុងត្រូវបានកេណ្ឌសម្រាប់ការសាងសង់រោងចក្រ និងខ្សែថាមពលនៅតាមព្រំដែន ជាពិសេសការបណ្តុះបណ្តាលសម្រាប់ការដាក់ពង្រាយបន្ថែមទៅកាន់ប្រទេសរុស្ស៊ី៕
