ជនជាប់ចោទ Zhenhao Zou អាយុ ២៨ ឆ្នាំជនជាតិចិនជានិស្សិតថ្នាក់បណ្ឌិត។ Met Police
និស្សិតថ្នាក់បណ្ឌិតម្នាក់ត្រូវបានកាត់ទោសកាលពីថ្ងៃពុធ នៅក្នុងតុលាការទីក្រុងឡុងដ៍ពីបទប្រើប្រាស់គ្រឿងញៀន និងរំលោភលើស្ត្រីចំនួន ១០ នាក់នៅក្នុងប្រទេសអង់គ្លេស និងប្រទេសចិន ខណៈដែលប៉ូលិសបានព្រមានថា អាចមានជនរងគ្រោះជាង ៥០ នាក់ផ្សេងទៀត។
ជនជាប់ចោទ Zhenhao Zou អាយុ ២៨ ឆ្នាំជនជាតិចិនជានិស្សិតថ្នាក់បណ្ឌិតត្រូវបានគេរកឃើញថាមានពិរុទ្ធពីបទប្រើប្រាស់គ្រឿងញៀន និងចាប់រំលោភស្ត្រីចំនួន ១០ នាក់នៅទីក្រុងឡុងដ៍ និងប្រទេសចិន ចន្លោះឆ្នាំ ២០១៩ និង ២០២៣។
បន្ទាប់ពីការពិភាក្សាអស់រយៈពេលជាង ១៩ ម៉ោង ចៅក្រមបានសន្និដ្ឋានថា លោក Zou បានរំលោភស្ត្រីបីនាក់នៅទីក្រុងឡុងដ៍ និង ៧ នាក់នៅប្រទេសចិន។
ប៉ូលិសអាចកំណត់អត្តសញ្ញាណជនរងគ្រោះតែពីរនាក់ប៉ុណ្ណោះ ហើយបាននិយាយបន្ទាប់ពីចេញសាលក្រមថា ស្ត្រីជាង ៥០ នាក់ផ្សេងទៀតអាចជាជនរងគ្រោះនៃអំពើរបស់លោក Zou ដែលនឹងធ្វើឱ្យគាត់ក្លាយជាជនល្មើសផ្លូវភេទដ៏អាក្រក់បំផុតក្នុងប្រវត្តិសាស្ត្រចក្រភពអង់គ្លេស។
សកម្មភាពរបស់លោក Zou គឺការលួចថតរាល់សកម្មភាពដែលខ្លួនបានប្រព្រឹត្ត និងធ្វើការគំរាមកំហែងទៅដល់ស្រ្តីទាំងនោះ។
លោក Zou ជានិស្សិតវិស្វកម្មមេកានិចដែលកំពុងសិក្សាថ្នាក់បណ្ឌិតនៅសាកលវិទ្យាល័យ University College London បានអះអាងថា ទំនាក់ទំនងផ្លូវភេទគឺជាការព្រមព្រៀងគ្នា។
បន្ទាប់ពីគាត់បានមើលវីដេអូរបស់ជនជាប់ចោត Zou ចៅក្រម Rosina Cottage បានពិពណ៌នាចុងចោទថាជា «ឧក្រិដ្ឋជនផ្លូវភេទដ៏គ្រោះថ្នាក់ និងគួរឱ្យស្អប់ខ្ពើម»ហើយការកាត់ទោសគួរតែមានយូរហើយ។
ក្រៅពីការចោទប្រកាន់ពីបទរំលោភផ្លូវភេទ ជនជាប់ចោទ Zou ក៏មានទោសផ្សេងទៀតពាក់ពន្ធទៅនឹងការកាន់កាប់រូបភាពអាសអាភាសនិងមានគ្រឿងញៀនដែលមានចេតនាប្រព្រឹត្តបទល្មើសផ្លូវភេទ។
លោក Zou ដែលប្រើឈ្មោះ Pakho នៅលើអ៊ីនធឺណិតបានប្រើវិធីស្និទ្ធស្នាលជាមួយមនុស្សផ្សេងទៀតនៅលើ WeChat និងកម្មវិធីណាត់ជួប មុនពេលហៅពួកគេឱ្យផឹកស្រា និងជក់ថ្នាំនៅអាផាតមិនរបស់គាត់នៅទីក្រុងឡុងដ៍ ឬទីតាំងមិនស្គាល់ក្នុងប្រទេសចិន។
មេបញ្ជាការប៉ូលិស Metropolitan លោក Kevin Southworth បាននិយាយថា៖ «គាត់បានធ្វើអស់ពីលទ្ធភាពដែលគាត់អាចធ្វើបានក្នុងបទល្មើសទាំងនេះ ដើម្បីអោយជនរងគ្រោះដែលគ្មានសមត្ថភាពតតាំងអាចទទួលបានយុត្តិធម៌»។
គួរអោយដឹងផងដែរថា Zou បានផ្លាស់ទៅទីក្រុង Belfast ប្រទេសអៀរឡង់ខាងជើងក្នុងឆ្នាំ ២០១៧ ដើម្បីសិក្សាផ្នែកវិស្វកម្មមេកានិចនៅសាកលវិទ្យាល័យ Queen's មុនពេលធ្វើដំណើរទៅ University College London ក្នុងឆ្នាំ ២០១៩ សម្រាប់ថ្នាក់អនុបណ្ឌិត និងបន្ទាប់មកថ្នាក់បណ្ឌិត៕ ប្រភព៖ CNN, BBC
