ប្រធានាធិបតីសហរដ្ឋអាមេរិក ដូណាល់ ត្រាំ នឹងប្រកាស «ថ្ងៃរំដោះ» ២មេសា ដោយលោកនឹងប្រកាសអំពីការយកពន្ធគយ ដើម្បីបំពេញរបៀបវារៈសេដ្ឋកិច្ចនៃរដ្ឋបាលរបស់លោក ប៉ុន្តែជាអ្វីដែលពិភពលោករង់ចាំមើលជាមួយនឹងការភ័យខ្លាចកើតមានសង្គ្រាមពាណិជ្ជកម្ម។
«វាគឺជាថ្ងៃរំដោះអាមេរិក ដូចដែលប្រធានាធិបតី ត្រាំ បានហៅវាថាដូច្នេះ។ លោកប្រធានាធិបតីនឹងប្រកាសពីផែនការពន្ធគយដែលនឹងបញ្ឈប់ការអនុវត្តពាណិជ្ជកម្មមិនយុត្តិធម៌ដែលបានលួចសេដ្ឋកិច្ចប្រទេសរបស់យើងជាច្រើនទសវត្សរ៍មកហើយ។ លោកធ្វើដូច្នេះគឺដើម្បីជាប្រយោជន៍ដ៏ចម្បងរបស់កម្មករអាមេរិក»។ នេះជាការលើកឡើងរបស់អ្នកនាំពាក្យសេតវិមាន អ្នកស្រី Karoline Leavitt។
យ៉ាងណាក៏ដោយ មិនមានទាន់សេចក្ដីលម្អិតនៃការយកពន្ធគយនេះទេ ដោយលោក ត្រាំ ធ្លាប់បានថ្លែងកាលពីកន្លងទៅថា ការប្រកាសពន្ធគយនេះ គឺជាការសងសឹកទៅនឹងអ្វីដែលប្រទេសផ្សេងៗយកពន្ធពីអាមេរិក។
អ្នកស្រី Leavitt បន្តថា ផលិតផលអាមេរិកមិនអាចនាំចេញទៅលក់នៅប្រទេសជាច្រើន ហើយការណ៍នេះបានធ្វើឲ្យអាជីវកម្ម និង កម្មករអាមេរិកត្រូវបានបញ្ឈប់ ហើយពេលនេះជាពេលដែលត្រូវឆ្លើយតប ដោយប្រធានាធិបតីនឹងធ្វើឲ្យមានការផ្លាស់ប្ដូរជាប្រវត្តិសាស្ត្រ ដើម្បីផលប្រយោជន៍ពលរដ្ឋអាមេរិក។
លោក ត្រាំ បានប្រកាសកាលពីថ្ងៃអាទិត្យថា នៅដំណាក់កាលដំបូង លោកនឹងដាក់ពន្ធឆ្លើយតប ឬ សងសឹកទៅលើប្រទេសទាំងអស់នៅលើពិភពលោក។ បន្ទាប់មក លោកនឹងធ្វើការចរចាដើម្បីបន្ថយពន្ធគយទាំងនោះក្នុងករណីចាំបាច់។
ថ្លែងនៅលើបណ្ដាញសង្គម X នៅថ្ងៃនេះ លោកត្រាំ និយាយថា ការធ្វើបរិវត្តកម្មប្រទេសនេះ មិនដែលកើតមានទេនៅសហរដ្ឋអាមេរិក។ លោកថា ក្រុមហ៊ុនជាច្រើនកំពុងហូរចូលមកសហរដ្ឋអាមេរិកក្នុងកម្រិតមួយមិនធ្លាប់មាន ហើយនឹងបង្កើតការងារនិងប្រាក់ចំណូល។
ទីប្រឹក្សាសេតវិមាន លោក Peter Navarro បានថ្លែងថា ការប្រកាសពន្ធគយនេះ អាចធ្វើឲ្យអាមេរិកចំណេញបានប្រាក់ប្រមាណ ៦០០ពាន់លានដុល្លារក្នុងមួយឆ្នាំ៕
