លោក Datuk Seri Anwar Ibrahim នាយករដ្ឋមន្ត្រីម៉ាឡេស៊ីបាននិយាយថា ប្រទេសម៉ាឡេស៊ីបានបង្ហាញការប្ដេជ្ញាចិត្តក្នុងការធ្វើការជាមួយប្រទេសចិនក្នុងវិស័យផ្សេងៗ រួមទាំងសេដ្ឋកិច្ច ពាណិជ្ជកម្ម និងបច្ចេកវិទ្យាដែលកំពុងលេចធ្លោដូចជា AI។
នាយករដ្ឋមន្ត្រី ដែលបានហៅប្រធានាធិបតីចិន Xi Jinping ថាជា «មិត្តពិត» បាននិយាយថា លោក និងគណៈរដ្ឋមន្ត្រី ស្វាគមន៍យ៉ាងកក់ក្តៅចំពោះលោក Xi និងគណៈប្រតិភូរបស់លោកមកកាន់ប្រទេសម៉ាឡេស៊ី ហើយម៉ាឡាស៊ី នឹងខិតខំប្រឹងប្រែងធ្វើការជាមួយគ្នាក្នុងវិស័យ ផ្សេងៗ ជាច្រើនដូចជា វិស័យសេដ្ឋកិច្ច ពាណិជ្ជកម្ម ការវិនិយោគ និងបច្ចេកវិទ្យាថ្មី រួមទាំងគំនិតផ្តួចផ្តើម AI និងវិធីសាស្រ្តពាក់ព័ន្ធផ្សេងទៀត ដែលប្រទេសទាំង២ បានពិភាក្សាគ្នាអស់រយៈពេលជាច្រើនឆ្នាំមកនេះ។
ក្នុងនោះដែរ Anwar Ibrahim ក៏បានលើកឡើងទៀតថា «នៅពេលដែលលោក និងលោក Xi ជួបគ្នានៅប្រទេសចិន លោក Xi បានបង្ហាញពីគំរូបុគ្គលិកលក្ខណៈថ្មីនៃភាពជាអ្នកដឹកនាំ ដែលនិយាយអំពីកំណើន និងការវិនិយោគ និងការរីកចម្រើនសេដ្ឋកិច្ច ហើយគាត់ក៏និយាយ អំពីការលុបបំបាត់ភាពក្រីក្រ និងបានបង្ហាញពីភាពជោគជ័យរបស់គាត់ សំខាន់ជាងនេះទៅទៀត គាត់បានបង្ហាញអំពីភាពរុងរឿង និងអរិយធម៌ ដែលរឿងទាំងអស់នេះ ដែលកម្រមានមេដឹកនាំក្នុងពិភពលោកនៅសម័យទំនើបនេះចែករំលែកណាស់»។
នាយករដ្ឋមន្ត្រីម៉ាឡេស៊ី បាននិយាយនៅក្នុងសុន្ទរកថាបើកមុនកិច្ចប្រជុំទ្វេភាគី ជាមួយគណៈប្រតិភូចិនកាលពីថ្ងៃពុធថា «យើងកោតសរសើរចំពោះភាពអត់ធ្មត់របស់អ្នក ហើយប្រជាជនម៉ាឡេស៊ីស្វាគមន៍អ្នក លោកប្រធានាធិបតី Xi មិនត្រឹមតែជាប្រធានាធិបតី នៃប្រទេសចិនដ៏អស្ចារ្យប៉ុណ្ណោះទេ ប៉ុនន្តែប្រធានាធិបតីចិនគឺជា«មិត្តពិត»។
ដំណើរទស្សនកិច្ចនេះ គឺជាដំណើរទស្សនកិច្ចផ្លូវការលើកទីពីររបស់លោក Xi ទៅកាន់ប្រទេស ម៉ាឡេស៊ីក្នុងរយៈពេល ១២ឆ្នាំ បន្ទាប់ពីដំណើរទស្សនកិច្ចចុងក្រោយរបស់លោកក្នុងឆ្នាំ ២០១៣។
