ក្រុម​ផ្ដល់​ជំនួយនៅក្នុងតំបន់រងគ្រោះ​​​ខ្លាំងបំផុតនៃប្រទេសមីយ៉ាន់ម៉ាបាននិយាយថា មានតម្រូវការបន្ទាន់សម្រាប់ទីជម្រក អាហារ និងទឹក បន្ទាប់ពីគ្រោះរញ្ជួយដីដែលបានសម្លាប់មនុស្សជាង ២៧០០​នាក់។ ប៉ុន្តែសង្គ្រាមស៊ីវិលនៅ​ប្រទេសនេះអាចរារាំងជំនួយមិនឱ្យទៅដល់អ្នកដែលត្រូវការ។

មេដឹកនាំយោធាមីយ៉ាន់ម៉ា លោក Min Aung Hlaing បាននិយាយនៅក្នុងសុន្ទរកថាតាមទូរទស្សន៍កាលពីថ្ងៃអង្គារថា ចំនួនអ្នកស្លាប់បានកើនឡើងដល់ ២៧១៩នាក់ ហើយត្រូវបានគេរំពឹងថានឹងកើនឡើងដល់ជាង ៣០០០នាក់ ចំណែក​មនុស្សចំនួន ៤៥២១នាក់បានរងរបួស និង ៤៤១នាក់បានបាត់ខ្លួន។

ការរញ្ជួយដីកម្រិត ៧,៧ រ៉ិចទ័រ ដែលបានវាយប្រហារកាលពីថ្ងៃសុក្រ គឺជាកម្លាំងខ្លាំងបំផុតដែលបានវាយប្រហារនៅប្រទេសអាស៊ីអាគ្នេយ៍​មួយ​នេះ​ក្នុងរយៈពេលជាងមួយសតវត្ស ដោយបានបំផ្លិចបំផ្លាញ សម្បត្តិវប្បធម៌ វត្តអារាម  អគារទំនើប និងហេដ្ឋារចនាសម្ព័ន្ធជាច្រើន។

រីឯប្រទេសថៃ ក្រុមអ្នកជួយសង្គ្រោះបានកំពុងបន្តស្វែងរកជនរងគ្រោះនៅក្នុងគំនរបាក់បែកនៃអគារខ្ពស់ដែលដួលរលំនៅក្នុងរដ្ឋធានីបាងកក ប៉ុន្តែត្រូវបានទទួលស្គាល់ថាត្រូវការចំណាយពេលវេលាយូក្នុងការរុករក។

ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌បាននិយាយថា នៅក្នុងតំបន់ Mandalay របស់ប្រទេសមីយ៉ាន់ម៉ា កុមារចំនួន ៥០នាក់ និងគ្រូបង្រៀនពីរនាក់បានស្លាប់នៅពេលដែលសាលាមត្តេយ្យរបស់ពួកគេបានដួលរលំ។

ស្ថាប័នអង្គការសហប្រជាជាតិបាននិយាយនៅក្នុងរបាយការណ៍មួយថា៖ «នៅក្នុងតំបន់ដែលរងគ្រោះខ្លាំងបំផុត ...សហគមន៍ប្រឹងប្រែងតស៊ូដើម្បីបំពេញតម្រូវការមូលដ្ឋានរបស់ពួកគេ ដូចជាការទទួលបានទឹកស្អាត និងអនាម័យ ខណៈដែលក្រុមសង្គ្រោះបន្ទាន់ធ្វើការដោយមិន​គិត​ពី​ការ​នឿយហត់ក្នុងការស្វែងរកអ្នកនៅរស់រានមានជីវិត និងផ្តល់ជំនួយសង្គ្រោះជីវិត»។

គណៈកម្មាធិការជួយសង្គ្រោះអន្តរជាតិបាននិយាយថា ទីជម្រក អាហារ ទឹក និងជំនួយផ្នែកវេជ្ជសាស្រ្ត សុទ្ធតែត្រូវការជាចាំបាច់នៅក្នុងកន្លែងនានាដូចជាទីក្រុង​ Mandalay ដែល​នៅជិតចំណុចកណ្តាលនៃការរញ្ជួយដី។

បុគ្គលិក​កាកបាត​ក្រហម​អន្តរជាតិ​ IRC នៅទីក្រុង Mandalay បាននិយាយនៅក្នុងរបាយការណ៍មួយថា៖ «ដោយបានឆ្លងកាត់ការរញ្ជួយដី ប្រជាជនឥឡូវនេះមានការភ័យខ្លាច ហើយកំពុងដេកនៅខាងក្រៅនៅលើដងផ្លូវ ឬនៅ​កណ្ដាល​វាល»។

សង្គ្រាមស៊ីវិលក្នុងប្រទេសមីយ៉ាន់ម៉ា ដែលរបបយោធាដណ្តើមអំណាចដោយរដ្ឋប្រហារក្នុងឆ្នាំ ២០២១ បានធ្វើឱ្យកិច្ចខិតខំប្រឹងប្រែងមានភាពស្មុគស្មាញក្នុងការជួយជនរងគ្រោះ និងអ្នកគ្មានផ្ទះសម្បែង។

ការគ្រប់គ្រងដ៏តឹងរ៉ឹងរបស់របបយោធាលើបណ្តាញទំនាក់ទំនង និងការខូចខាតផ្លូវថ្នល់ ស្ពាន និងហេដ្ឋារចនាសម្ព័ន្ធផ្សេងទៀតដែលបណ្តាលមកពីការរញ្ជួយដី បានបង្កើនបញ្ហាប្រឈមសម្រាប់បុគ្គលិកជំនួយ៕