ប្រធានាធិបតីចិន ស៊ី ជីនពីង និង ប្រធានាធិបតីសហរដ្ឋអាមេរិក ដូណាល់ ត្រាំ។ AFP
នៅថ្ងៃទី២១ ខែមេសានេះ ប្រទេសចិនបានព្រមានខ្លាំងៗថា «ប្រទេសចិនប្រឆាំងយ៉ាងម៉ឺងម៉ាត់ចំពោះកិច្ចព្រមព្រៀងណាមួយរវាងសហរដ្ឋអាមេរិក និងប្រទេសនានាដែលធ្វើអោយមានផលប៉ះពាល់អវិជ្ជមានដល់ប្រទេសចិន» ហើយថា ចិននឹងចាត់វិធានការប្រឆាំងនឹងពួកគេ។
ក្រសួងពាណិជ្ជកម្មចិនបានលើកឡើងទៀតថា៖ «ប្រទេសចិននឹងចាត់វិធានការតបតវិញក្នុងលក្ខណៈច្បាស់លាស់ និងទៅវិញទៅមក ប្រសិនបើប្រទេសណាមួយស្វែងរកកិច្ចព្រមព្រៀងជាមួយនឹងរដ្ឋបាលលោក ត្រាំ ដែលកំពុងរៀបចំដាក់សម្ពាធប្រទេសផ្សេងទៀតឱ្យដាក់កម្រិតពាណិជ្ជកម្មជាមួយប្រទេសចិនជាថ្នូរនឹងការលើកលែងពន្ធពីសហរដ្ឋអាមេរិក»។
ខណៈដែលប្រទេសផ្សេងទៀតនៅលើពិភពលោកត្រូវបានអាមេរិកយកពន្ធ ១០ ភាគរយ ចំណែកឯប្រទេសចិនប្រឈមនឹងការយកពន្ធរហូតដល់ ១៤៥ ភាគរយលើផលិតផលជាច្រើន ហើយពន្ធនេះអាចនឹងឡើងដល់ ២៤៥ភាគរយ បើបូកនឹងពន្ធដែលមានស្រាប់។
ជាការឆ្លើយតបប្រទេសចិនបានយកពន្ធចំនួន ១២៥ ភាគរយលើទំនិញរបស់សហរដ្ឋអាមេរិកវិញផងដែរ។
ឥឡូវនេះប្រទេសមួយចំនួនកំពុងចូលរួមចរចាជាមួយសហរដ្ឋអាមេរិកដើម្បីកាត់បន្ថយពន្ធ ស្របទៅនឹងសង្រ្គាមពាណិជ្ជកម្មដែលកំពុងកើតឡើងរវាងប្រទេសអាមេរិកប្រឆាំងនឹងគូប្រជែងសេដ្ឋកិច្ចកំពូលរបស់ខ្លួនគឺប្រទេសចិន។
ប្រទេសចិនបញ្ជាក់ថា ខ្លួនគោរពគ្រប់ភាគីទាំងអស់ក្នុងការរកដំណោះស្រាយផ្នែកសេដ្ឋកិច្ច និងពាណិជ្ជកម្មជាមួយសហរដ្ឋអាមេរិក តាមរយៈការពិគ្រោះយោបល់ដោយឈរលើមូលដ្ឋានស្មើភាពគ្នា ប៉ុន្តែបានព្រមានប្រទេសនានាកុំឱ្យស្វែងរកកិច្ចព្រមព្រៀងជាមួយសហរដ្ឋអាមេរិកដែលធ្វើឲ្យប៉ះពាល់ប្រយោជន៍ដល់ប្រទេសចិន។
អ្នកនាំពាក្យក្រសួងពាណិជ្ជកម្មរបស់ទីក្រុងប៉េកាំងបាននិយាយនៅក្នុងសេចក្តីថ្លែងការណ៍មួយថា៖ «ការលួងលោមនឹងមិននាំមកនូវសន្តិភាពទេ ហើយការសម្របសម្រួលនឹងមិនត្រូវបានគោរព។ ដើម្បីស្វែងរកផលប្រយោជន៍បណ្តោះអាសន្នដ៏អាត្មានិយមរបស់ពួកគេដោយចំណាយផលប្រយោជន៍របស់អ្នកដទៃ គឺជាការស្វែងរកស្បែកខ្លា»។
ចិនបានព្រមានថា វិធីសាស្ត្របែបនេះ «ទីបំផុតនឹងបរាជ័យទាំងសងខាង និងបង្កគ្រោះថ្នាក់ដល់អ្នកដទៃ»។
អ្នកនាំពាក្យរូបនេះបានលើកឡើងទៀតថា៖ «ចិនប្រឆាំងយ៉ាងម៉ឺងម៉ាត់ចំពោះភាគីណាដែលឈានដល់កិច្ចព្រមព្រៀងដែលធ្វើអោយប៉ះពាល់ប្រយោជន៍ដល់ប្រទេសចិន ប្រសិនបើមានកិច្ចព្រមព្រៀងណាមួយកើតឡើង ចិននឹងមិនទទួលយកវាជាដាច់ខាត ចិននឹងចាត់វិធានការតបតវិញយ៉ាងម៉ឺងម៉ាត់»។
ក្រសួងពាណិជ្ជកម្មបាននិយាយថា ប្រទេសចិនប្តេជ្ញា និងមានសមត្ថភាពគ្រប់គ្រាន់ក្នុងការការពារសិទ្ធិ និងផលប្រយោជន៍ផ្ទាល់ខ្លួន៕
