លោក Elon Musk និងប្រធានាធិបតីសហរដ្ឋអាមេរិក ដូណាល់ ត្រាំ នៅក្នុងការិយាល័យនៃសេតវិមាន។ AFP
លោក Elon Musk ប្រធានក្រុមហ៊ុន Tesla បាននិយាយថា លោកនឹងបន្ថយតួនាទី និងពេលវេលារបស់លោកនៅក្នុងរដ្ឋបាលរបស់លោក ត្រាំ ខណៈដែលប្រាក់ចំណេញ និងប្រាក់ចំណូលរបស់ក្រុមហ៊ុន Tesla បានធ្លាក់ចុះយ៉ាងខ្លាំងក្នុងរយៈពេលបីខែដំបូងនៃឆ្នាំ ២០២៥នេះ។
ការលក់រថយន្ត Tesla បានធ្លាក់ចុះ ហើយម៉ាកយីហោបានប្រឈមនឹងការរិះគន់ខណៈដែលលោក Musk បានក្លាយជាឥស្សរជននយោបាយដ៏សំខាន់នៅសេតវិមាន។
នៅថ្ងៃអង្គារ ក្រុមហ៊ុន Tesla បានរាយការណ៍ថា ប្រាក់ចំណូលពីការលក់រថយន្តបានធ្លាក់ចុះ ២០% ក្នុងត្រីមាសទីមួយនៃឆ្នាំ ២០២៥ បើប្រៀបធៀបនឹងរយៈពេលដូចគ្នាកាលពីឆ្នាំមុន ខណៈដែលប្រាក់ចំណេញបានធ្លាក់ចុះជាង ៧០%។
នៅក្នុងត្រីមាសទី១នៃឆ្នាំនេះ ប្រាក់ចំណូលរបស់ Tesla ទទួលបាន ១៩,៣ ពាន់លានដុល្លារ ធ្លាក់ចុះ ៩% ធៀបនឹងឆ្នាំមុន ដែលតួលេខនេះទាបជាងការរំពឹងទុក ២១,១ ពាន់លានដុល្លារ។
ក្រុមហ៊ុនបានបញ្ជាក់ប្រាប់អ្នកវិនិយោគថា បញ្ហានេះអាចនឹងបន្តកើតមាន និងមិនផ្តល់ការព្យាករណ៍កំណើននោះទេ ប៉ុន្តែបានអះអាងថា ការផ្លាស់ប្តូរនៃទស្សនៈនយោបាយ អាចប៉ះពាល់ដល់តម្រូវការយ៉ាងធ្ងន់ធ្ងរ។
លោក Elon Musk ថ្លែងថា ការបែងចែកពេលវេលារបស់លោកទៅលើទីភ្នាក់ងារប្រសិទ្ធភាពរដ្ឋាភិបាល (DOGE) នឹងត្រូវកាត់បន្ថយ ចាប់ពីខែឧសភា តទៅ។ លោកនឹងចំណាយពេលត្រឹមតែ ១ ទៅ ២ ថ្ងៃក្នុងមួយសប្តាហ៍លើកិច្ចការរដ្ឋាភិបាល។
ការធ្លាក់ចុះនៃស្ថានភាពហិរញ្ញវត្ថុរបស់ក្រុមហ៊ុនថ្មីៗនេះ កើតឡើងចំពេលមានការតវ៉ាជុំវិញតួនាទីរបស់លោក Musk នៅក្នុងរដ្ឋបាលថ្មីរបស់ប្រធានាធិបតី ដូណាល់ ត្រាំ ហើយលោក Musk ខ្លួនឯងក៏បានទទួលស្គាល់ថា តួនាទីរបស់លោកបានធ្វើឱ្យលោកមានពេលវេលាតិចតួចសម្រាប់ផ្ដោតទៅលើទៅលើក្រុមហ៊ុន។
លោក Musk បានបរិច្ចាគជាង ២៥០ លានដុល្លារដល់យុទ្ធនាការបោះឆ្នោតរបស់លោក ត្រាំ។ លោកក៏ជាអ្នកនាំមុខគេក្នុងគំនិតផ្តួចផ្តើមរបស់លោក ត្រាំ ក្នុងការបង្កើតទីភ្នាក់ងារប្រសិទ្ធភាពរដ្ឋាភិបាល (DOGE) ដើម្បីកាត់បន្ថយការចំណាយសហព័ន្ធ និងកាត់បន្ថយកម្លាំងពលកម្មនៅក្នុងរដ្ឋាភិបាលអាមេរិក។
វត្តមានរបស់លោកនៅក្នុងផ្នែកនយោបាយបានបង្កឱ្យមានការតវ៉ា និងការធ្វើពហិការលើផលិតផលរថយន្ត Tesla នៅជុំវិញពិភពលោក៕ ប្រភព៖ BBC
