សូម្បីតែកោះតូចមួយនៅទ្វីបអង់តាកទិច សម្បូរទៅដោយសត្វភេនឃ្វីន (penguins ) និងត្រូវធ្វើដំណើរដោយទូករយៈពេល៧ថ្ងៃទើបទៅដល់ ក៏មិនអាចគេចផុតពីការកំណត់ពន្ធគយថ្មីរបស់ប្រធានាធិបតី សហរដ្ឋអាមេរិក ដូណាល់ ត្រាំ បានដែរ។
កោះនេះមានឈ្មោះថា Heard and McDonald ដែលជាទឹកដីមួយមានផ្ទៃក្រឡា ៤ពាន់គីឡូម៉ែត្រការ៉េ ហើយការចូលទៅកាន់កោះនេះត្រូវចំណាយពេល ៧ ថ្ងៃដោយទូក ចេញពីទីក្រុង Perth នៃប្រទេសអូស្ត្រាលី។ កោះនេះមិនសូវមានអ្នកចូលទៅជិត១០ឆ្នាំមកហើយ។ វាជាផ្នែកមួយនៃទឹកដីអូស្ត្រាលី។
នាយករដ្ឋមន្ត្រីអូស្ត្រាលី លោក Anthony Albanese បានថ្លែងថា ការសម្រេចរបស់លោកត្រាំ បង្ហាញថា គ្មានកន្លែងណាមួយនៅលើភពផែនដីនេះ អាចគេចផុតពីការដាក់ពន្ធរបស់លោក ត្រាំទេ។
កោះនេះរងការកំណត់ពន្ធ ១០ភាគរយ ប៉ុន្តែដែនកោះនេះពោរពេញដោយទឹកកក ហើយមនុស្សមិនអាចរស់នៅបាន និងជាទីតាំងដែលមានភ្នំភ្លើងសកម្មឈ្មោះ Big Ben ព្រមទាំងគ្រប់ដណ្ដប់ទៅដោយផ្ទាំងទឹកកក។ គេជឿថា មនុស្សបានចូលទៅកាន់កោះនេះចុងក្រោយនៅឆ្នាំ២០១៦។
មិនមានតួលេខពីធនាគារពិភពលោកអំពីទំហំពាណិជ្ជកម្មរវាងអាមេរិក និងកោះ Heard and McDonald នេះទេ ប៉ុន្តែ សហរដ្ឋអាមេរិកអះអាងថា នៅឆ្នាំ២០២៤ ការនាំចូលទំនិញពីកោះនេះទៅសហរដ្ឋអាមេរិកមានទំហំជាង ១លានដុល្លារ ភាគច្រើនជាគ្រឿងម៉ាស៊ីន និងអេឡិចត្រូនិក។
ប៉ុន្តែ លោក Mike Coffin សាស្ត្រាចារ្យនៅសាកលវិទ្យាល័យ Tasmania ធ្លាប់បានទៅក្បែរកោះនេះជាច្រើនលើកដើម្បីសិក្សាស្រាវជ្រាវ ហើយលោកថា កោះនេះមានតែសត្វភេនឃ្វីន និងមានក្រុមហ៊ុនអូស្ត្រាលីពីរដែលចាប់និងនាំចេញត្រី៕
