ពលរដ្ឋក្រីក្រអាចទទួលបានកញ្ចប់ជំនួយពី «ធុងសហគមន៍ស៊ីក្លូ»។ រូបថត សហការី
ភ្នំពេញ៖ អ្នកដំណើរតាមដងផ្លូវនឹងមានអារម្មណ៍ចម្លែកចិត្ដនៅពេលបានឃើញប្រអប់ធុងមួយរាងដូចទូទឹកកកជិះនៅលើស៊ីក្លូនៅម្ដុំមាត់ទន្លេ និងមុខវត្ដបទុម ខុសពីស៊ីក្លូដឹកមនុស្ស និងអីវ៉ាន់ដទៃ។ អ្នកដំណើរអាចហៅស៊ីក្លូនេះឱ្យឈប់ ដោយមិនមែនឡើងជិះនោះទេ តែផ្ដល់ជំនួយផ្សេងៗដាក់ក្នុងធុងនេះ។
ទើប ២ ខែ Local4Local បន្ដបង្កើតយុទ្ធនាការ «ធុងសហគមន៍ស៊ីក្លូ» ឬក៏ «ធុងស៊ីក្លូ» ដោយមានជំនួយពីសមាគមស៊ីក្លូផងដែរ។
អំឡុងពេលបិទខ្ទប់កាលពីខែមេសា Local4Local ជាកម្មវិធីដំណើរការដោយយុវជនតែម្នាក់ត្រូវបានបង្កើតឡើងពីសំណាក់និស្សិតកម្ពុជាដែលជាប់គាំងដោយសារតែការរឹតត្បិតការធ្វើដំណើរបន្ដការសិក្សានៅសហរដ្ឋអាមេរិក ដើម្បីផ្ដល់ជំនួយជាអាហារដល់ជនក្រីក្រនៅភ្នំពេញ។
«ធុងសហគមន៍ស៊ីក្លូ» គឺជាធុងស្បៀងអាហារ និងសម្ភារប្រើប្រាស់ចាំបាច់ចល័តដំបូងនៅភ្នំពេញ ដែលបរិច្ចាគពីសំណាក់អ្នកមានទឹកចិត្ដសប្បុរស និងត្រូវបានចែកចាយដល់អ្នកត្រូវការជំនួយតាមរយៈស៊ីក្លូ។
អ្នករត់ស៊ីក្លូ ដែលនឹងទទួលបានប្រយោជន៍ពីកម្មវិធីនេះ នឹងធ្វើការចែកចាយសម្ភារ និងស្បៀងបរិច្ចាគនៅតាមតំបន់ពលរដ្ឋក្រីក្ររស់នៅ។
លោក តាំង ហ៊ួងហាវ អាយុ ២១ ឆ្នាំ ស្ថាបនិក Local4Local ប្រាប់ ភ្នំពេញ ប៉ុស្ដិ៍ថា៖ «ធុងសហគមន៍ស៊ីក្លូបង្ហាញពីសាមគ្គីភាពក្នុងសហគមន៍តាមរយៈការចែករំលែក និងទឹកចិត្ដចំពោះអ្នកត្រូវការជំនួយ។ វាក៏បានផ្ដល់ប្រយោជន៍ដល់អ្នករត់ស៊ីក្លូឱ្យមានការងារស្ថិតស្ថេរ ក៏ដូចជាអ្នករស់នៅតាមចិញ្ចើមផ្លូវមានបាយហូប»។
យុវជន តាំង ហ៊ួង ហាវ ស្ថាបនិកកម្មវិធីសប្បុរសធម៌ Local4Local។ រូបថត សហការី
លោកបន្ដថា៖ «ពួកគេសប្បាយចិត្ដ ពីព្រោះខ្ញុំនិយាយជាមួយពួកគាត់ ហើយពួកគាត់តបវិញថា ធ្វើល្អបានល្អ ហើយពួកគាត់ជឿលើអំពើបុណ្យ ដោយការចែកទានដល់អ្នកត្រូវការបំផុត»។
បច្ចុប្បន្ន មានធុងសហគមន៍ចល័តតែ ១ ប៉ុណ្ណោះ ហើយវានឹងធ្វើដំណើរនៅបរិវេណមាត់ទន្លេ និងមុខវត្ដបទុមនាពេលព្រឹក ហើយជួនកាលនៅពេលរសៀល។
លោក ហាវ ដែលមានគំនិតបង្កើតកម្មវិធីមនុស្សធម៌ដំបូងដោយអ្នករត់ស៊ីក្លូម្នាក់ដែលដឹករូបលោកជុំវិញទីក្រុងភ្នំពេញនិយាយថា៖ «មនុស្សគ្រប់រូបអាចបរិច្ចាគសម្ភារប្រើប្រាស់ដូចជា អាហារក្ដៅៗ ម៉ាស់ ទឹក គ្រឿងកំប៉ុង សៀវភៅ សម្លៀកបំពាក់ និងអាហារមិនឆាប់ខូច»។
យុវជនរូបនេះ គ្រោងដាក់ពង្រាយធុងសហគមន៍ពីចន្លោះ ៨ ទៅ ១០ ធុងបន្ថែមទៀតក្នុងរាជធានីភ្នំពេញ ហើយលោកក៏ទំនងជាចង់បន្ដពង្រីកទៅកាន់បណ្ដាខេត្ដមួយចំនួនទៀត។
ដោយសារតែគំនិតផ្ដួចផ្ដើមធុងសហគមន៍ ឬធនាគារស្បៀងនេះហាក់ដូចជាថ្មីនៅកម្ពុជា លោក ហាវ និយាយថា លោករំពឹងថា សកម្មភាពដ៏សប្បុរសនេះនឹងជំរុញឱ្យមានការបង្កើតឡើងកម្មវិធីស្រដៀងគ្នានេះនៅទូទាំងប្រទេស។
លោក ហាវ ដែលបានធ្វើដំណើរមកលេងឪពុកម្ដាយ និងបានជាប់នៅក្នុងប្រទេសតាំងពីខែមីនា ឆ្នាំ ២០២០ បាននិយាយថា៖ «ខ្ញុំលើកទឹកចិត្ដម្ចាស់ភោជនីយដ្ឋាន និងហាងលក់ដូរនានាដាក់ប្រអប់បរិច្ចាគនៅក្នុងហាងរបស់ខ្លួនដោយការសរសេរពាក្យពេចន៍លើកទឹកចិត្ដភ្ញៀវធ្វើការបរិច្ចាគធនធាន និងសម្ភារផ្សេងៗ។ ១ ថ្ងៃម្ដង អ្នករត់ស៊ីក្លូអាចមកប្រមូល និងធ្វើការចែកចាយដល់អ្នកក្រីក្រ»។
អ្នករត់ស៊ីក្លូយកស្បៀងអាហារ និងសម្ភារប្រើប្រាស់ចែកដល់អ្នកខ្វះខាត។ រូបថត សហការី
លោកបាននឹកឃើញបង្កើតធុងសហគមន៍ផ្ដល់វត្ថុផ្សេងៗដោយឥតគិតថ្លៃដំបូងដែលដំឡើងនៅមុខផ្ទះ និងសាលារៀនលើអនឡាញ ហើយលោកចង់នាំយកគំនិតនេះមកអនុវត្ដនៅកម្ពុជា។
លោកបាននិយាយថា៖ «អំឡុងពេលកូវីដ ១៩ វាជាវេលាដ៏លំបាកសម្រាប់ការធ្វើដំណើរចេញក្រៅ។ ដូច្នេះ ធុងសហគមន៍ស៊ីក្លូក៏ចាប់ផ្ដើមលេចជារូបរាង ដោយសារវាអនុញ្ញាតឱ្យធុងសប្បុរសធម៌នេះធ្វើដំណើរទៅដល់កន្លែងអ្នកចង់បរិច្ចាគ»។
Local4Local ផ្ដោតទៅលើការជួយអ្នករស់នៅតាមចិញ្ចើមផ្លូវ ងាយរងគ្រោះពីវិបត្ដិកូវីដ ១៩។ អ្នកលក់ចំណីអាហារតាមចិញ្ចើមផ្លូវមានការលក់ដូរធ្លាក់ចុះ ហើយអ្នករត់ស៊ីក្លូពិបាករកម៉ូយអំឡុងពេលវិបត្ដិដែលរុញគ្មានភ្ញៀវនេះ។
Local4Local បង្កើតកម្មវិធីជាច្រើនទៀត ដូចជា Food Coupon ដែលដំណើរការពាក់កណ្ដាលខែមិថុនានេះ ដោយចាប់ផ្ដើមពីអ្នករត់ស៊ីក្លូ ១៣០ នាក់។
អ្នករត់ស៊ីក្លូម្នាក់នឹងទទួលបានបុងអាហារ ១០ សន្លឹក ដែលមានសុពលភាពប្រើប្រាស់ ២ សប្ដាហ៍ ហើយបុងនីមួយៗអាចប្ដូរយកអាហារ ១ ឈុត នៅតាមតូបអាហារលើចិញ្ចើមផ្លូវ ដែលបានកំណត់។
លោក ហាវ បានលើកឡើងថា គោលបំណងចែកបុងអាហារ គឺចង់កាត់បន្ថយការប៉ះពាល់គ្នាដោយផ្ទាល់អំឡុងពេលកូវីដ និងអាចប្រើបានគ្រប់គ្នាសម្រាប់អាហារឥតគិតថ្លៃ។
ស្របពេលកម្មវិធីសប្បុរសធម៌នៅកម្ពុជានេះ លោកនិយាយពីការវិលត្រឡប់ទៅសិក្សាថា៖ «ខ្ញុំនៅសិក្សាឆ្នាំទី៣ ឯ Minnesota ហើយខ្ញុំនឹងវិលទៅអាមេរិកវិញនៅអំឡុងខែកញ្ញា។ យ៉ាងណាមិញ ខ្ញុំរំពឹងថា Local4Local នៅតែមានដំណើរការ»។
សម្រាប់ព័ត៌មានលម្អិត សូមទាក់ទង mailto:haotang101@gmail.com ឬបរិច្ចាគតាមគណនី ABA Taing Huang Hao: 002 851 840៕
វីដេអូ៖
