ប៉ារីស៖ ទីភ្នាក់ងារដេញថ្លៃ Sotheby''s បាននិយាយកាលពីថ្ងៃព្រហស្បតិ៍ថា មួកដែលត្រូវបានពាក់ដោយស្ដេចណាប៉ូឡេអុងក្នុងអំឡុងពេលយុទ្ធនាការយោធាឆ្នាំ ១៨០៧ របស់ទ្រង់ អាចត្រូវបានដេញថ្លៃលក់រហូតដល់ ៦០ ម៉ឺនអឺរ៉ូ (៧១ ម៉ឺនដុល្លារ) នៅខែកញ្ញាខាងមុខនេះ។
ទីភ្នាក់ងារដេញថ្លៃ Sotheby''s បានឱ្យដឹងនៅមុនការដេញថ្លៃវត្ថុអនុស្សាវរីយ៍រំឭកខួប ២០០ ឆ្នាំ នៃការសោយទីវង្គតរបស់ព្រះអង្គថា នេះជាមួកមួយក្នុងចំណោមមួក ១៩ របស់របស់ស្ដេចណាប៉ូឡេអ៊ុង ដែលអ្នកប្រវត្តិសាស្ត្របានសម្គាល់ឃើញពីភាពពិសេសរបស់វា។
មួកចុងក្រោយមួយដែលត្រូវបានដាក់ដេញថ្លៃ ប្រៀបបានទៅនឹងនិមិត្តរូបសង្គ្រាមពីកន្លែងនៃការបរាជ័យចុងក្រោយរបស់ស្ដេចណាប៉ូឡេអុង ដោយវាត្រូវបានទិញក្នុងតម្លៃ ៣៥ ម៉ឺនអឺរ៉ូកាលពីឆ្នាំ ២០១៨។
មួកចុងក្រោយបង្អស់ដែលត្រូវបានគោះញញួរដេញថ្លៃ ត្រូវបានទិញដោយអ្នកនយោបាយស្កុតលែនគឺលោក Sir Michael Shaw Stewart ដែលគ្រួសាររបស់លោកជាម្ចាស់កម្មសិទ្ធិចាប់តាំងពីពេលនោះមក។
មួកនោះត្រូវបានគេជឿជាក់ថាត្រូវបានពាក់ក្នុងអំឡុងពេលជ័យជម្នះសមរភូមិណាប៉ូលឡេអុងប្រឆាំង នៅឆ្នាំ ១៨០៧។
នៅឆ្នាំ ២០១៤ មួកខ្មៅត្រូវបានលក់ក្នុងតម្លៃ ១,៩ លានអឺរ៉ូដល់សេដ្ឋីម្ចាស់សម្ព័ន្ធហាងម្ហូបអាហារ និងកសិកម្មរបស់ប្រទេសកូរ៉េខាងត្បូង ហារីម ដែលជាផ្នែកមួយនៃការលក់ការដេញថ្លៃ ដែលប្រមូលដោយក្រុមគ្រួសាររាជវង្សម៉ូណាកូ។
អ្នកប្រមាញ់វត្ថុអនុស្សាវរីយ៍ស្ដេចណាប៉ូឡេអុង ក៏ហ៊ានចំណាយប្រាក់ជាវមកុដមាសដ៏ផុយស្រួយដែលរចនាឡើងសម្រាប់ការគ្រងរាជ្យរបស់ព្រះអង្គនៅឆ្នាំ ១៨០៤។
មកុដនោះត្រូវបានលក់ក្នុងតម្លៃ ៦២៥ ០០០ អឺរ៉ូក្នុងឆ្នាំ ២០១៧ ខណៈគ្រឿងអលង្ការមួយឈុតដែលពាក់ដោយបុត្រីចិញ្ចឹមរបស់ព្រះអង្គក៏ត្រូវបានលក់ក្នុងតម្លៃ ១,៤ លានអឺរ៉ូកាលពីខែឧសភា៕ AFP/HR
