ក្រុងប៉ារីស៖ ហ៊ួន ហ៊ួន គឺជាខ្លាឃ្មុំផេនដាយក្សមួយក្បាលដែលត្រូវបានឱ្យបារាំងខ្ចីពីចិន បានផ្ដល់កំណើតកូនភ្លោះកាលពីព្រឹកព្រលឹមថ្ងៃនេះ។ នេះបើយោងតាមសួនសត្វ Beauval។
អ្នកគ្រប់គ្រងសួនសត្វ Zoo-Parc de Beauval ឃុំ Saint-Aignan ភាគកណ្ដាលប្រទេសបារាំង លោក Rodolphe Delord បាននិយាយថា៖ «កូនផេនដាទាំងពីរមានពណ៌ផ្កាឈូក។ ពួកវាមានសុខភាពល្អបរិបូណ៌ និងធំធាត់ល្មមតាមវ័យ។ ពួកវាពិតជាអស្ចារ្យមែន»។
ការបង្កាត់ពូជផេនដា ទាំងនៅក្នុងសួន និងព្រៃ ពិតជាបង្កការលំបាកខ្លាំង ដោយសារក្រុមអ្នកជំនាញបានឱ្យដឹងថា ផេនដាតិចតួចបំផុតមានអារម្មណ៍ចង់បង្កកំណើត ឬដឹងពីអ្វីដែលខ្លួនធ្វើពេលពួកវាធ្វើ។
បញ្ហាស្មុគស្មាញផ្សេងៗទៀត ទ្វារទៅកាន់ការបង្កកំណើតពិតជាតូចចង្អៀតដោយសារផេនដាញីមានចំណង់តែម្ដងក្នុងមួយឆ្នាំចន្លោះពី ២៤ ទៅ ៤៨ ម៉ោងប៉ុណ្ណោះ។
ហ៊ួន ហ៊ួន និងដៃគូ យួន ហ្ស៊ី ជាតារាល្បីប្រចាំសួនសត្វ Beauval បានបង្កការភ្ញាក់ផ្អើលដល់បុគ្គលិកសួនសត្វកាលពីខែមីនាពេលពួកវាចាប់ផ្ដើមចុះសម្រុងគ្នា និងបានរួមភេទ ៨ដងអំឡុងពេលចុងសប្ដាហ៍។
ក្រុមពេទ្យសត្វក៏បានអនុញ្ញាតការបង្កកំណើតសិប្បនិម្មិត ដើម្បីឱ្យកាន់តែប្រាកដចំពោះពូជថ្មីរបស់ពួកវា។
កូនដំបូងរបស់ ហ៊ួន ហ៊ួន ឈ្មោះ យួន ម៉េង ពេលនេះមានទម្ងន់ជាង ១០០ គីឡូក្រាម និងនាឆ្នាំនេះ ត្រូវបានបញ្ជូនទៅកាន់ប្រទេសចិន ជាទីដែលមានខ្លាឃ្មុំផេនដាយក្សប្រមាណ ១៨០០ក្បាលរស់នៅក្នុងព្រៃ និងប្រមាណ ៥០០ ក្បាលទៀតនៅក្នុងសួនសត្វ។
កូនតូចៗទើបកើតពីផ្ទៃ ហ៊ួន ហ៊ួន នឹងមិនទាន់ត្រូវបានដាក់ឈ្មោះនោះទេ រហូតដល់ ១០០ ថ្ងៃ ហើយស្ដ្រីទីមួយចិន ផេង លីយួន ភរិយារបស់ប្រធានាធិបតីចិន ស៊ី ជីងពីង ជាអ្នកដាក់ឈ្មោះឱ្យពួកវា៕ AFP/HR