ភ្នំពេញ៖ នៅទីបំផុតកុនភាគរឿង «ស្នាមស្នេហ៍សមុទ្ររាម» ដែលជាការថតសម្តែងតួឯកដំបូងរបស់អតីតកញ្ញាឯកចក្កវាឡកម្ពុជាឆ្នាំ ២០១៩ កញ្ញា សំណាង អេលីណា ជិតចាក់បញ្ចាំងនៅតាមកញ្ចក់ទូរទស្សន៍ហើយ ក្រោយពីបានចេញ Trailer នាពេលថ្មីៗនេះ។
ចំពោះកុនភាគរឿង «ស្នាមស្នេហ៍សមុទ្ររាម» គឺកុនភាគមានចំនួន ៤៥ ភាគ ជាស្នាដៃនិពន្ធ និងដឹកនាំសម្តែងរបស់អ្នកស្រី ពាន់ ភួងបុប្ជា ដែលធ្លាប់តែរួចម្តងមកហើយ តែដោយសាររឿងនេះ ទទួលបានការគាំទ្រខ្លាំងពីទស្សនិកជន ទើបធ្វើឱ្យផលិតករជើងចាស់ល្បីឈ្មោះរូបនេះ សម្រេចចិត្តថតសាជាថ្មីឡើងវិញ កាលពីដំណាច់ឆ្នាំ ២០២០ កន្លងមក ដែលត្រៀមនឹងចាក់បញ្ចាំងនៅលើកញ្ចក់ទូរទស្សន៍ ភីអិនអិន ក្នុងពេលឆាប់ៗខាងមុខ។
ស្របពេលទូរទស្សន៍ ភីអិនអិន បង្ហាញ Trailer រឿង «ស្នាមស្នេហ៍សមុទ្ររាម» ក៏ដូចជា បទចម្រៀងក្នុងរឿងនេះ កាន់តែធ្វើឱ្យអ្នកគាំទ្រជាច្រើន បង្ហាញចំណាប់អារម្មណ៍ និងចង់ទស្សនារឿងនេះ ឆាប់បំផុត ពីព្រោះពួកគេចង់ដឹងថា តើរឿងចាស់ ដែលថតកាលពី ១៧ ឆ្នាំ មុន និងរឿងថតថ្មីទើបថតនេះ វានឹងមានអ្វីខុសប្លែកគ្នាបែបណាខ្លះ?
រឿង «ស្នាមស្នេហ៍សមុទ្ររាម» ថតថ្មីនេះ ប្រជុំដោយតួសម្តែងថ្មីចាស់ ដែលមានទេពកោលស្យសម្តែងល្អ មិនចាញ់តួសម្តែងមុនៗឡើយ ដោយតួអង្គសំខាន់ៗរួមមានលោក ពៅ ពិសិដ្ឋ លោក ខាត់ វ៉ៃហាំង លោក បញ្ញា សិទ្ធ កញ្ញា អឿន រ៉ូហ្សា និងកញ្ញា សំណាង អេលីណា ជាដើម។
បើតាមការប្រកាសពីគេហទំព័រផ្លូវការរបស់ទូរទស្សន៍ភីអិនអិន រឿង «ស្នាមស្នេហ៍សមុទ្ររាម» ដែលកញ្ញា សំណាង អេលីណា ថតជាតួឯកស្រី ជាមួយនឹងតួឯកប្រុសលោក ខាត់ វ៉ៃហាំង នឹងផ្តើមចាក់បញ្ចាំងនៅលើកញ្ចក់ទូរទស្សន៍នៅយប់ថ្ងៃទី ១០ ខែ សីហា ឆ្នាំ ២០២១ ខាងមុខនេះ។
គេនៅចាំបានថា ក្រោយវិលត្រឡប់ពីការទទួលភារកិច្ចដ៏ធំជាតំណាងបវរកញ្ញាចក្កវាឡកម្ពុជាឆ្នាំ ២០១៩ ក៏លេចឮដំណឹងដែរថា កញ្ញា សំណាង អេលីណា មានផលិតកម្មកុនចំនួន ២ បានផ្តល់តំណែងតួឯកកុនឱ្យនាដើមឆ្នាំ ២០២០ តែកញ្ញាមិនអាចទទួលព្រោះជាប់រវល់សិក្សានៅថ្នាក់មហាវិទ្យាល័យលើជំនាញទំនាក់ទំនងអន្តរជាតិនៃសាកលវិទ្យាល័យបញ្ញាសាស្ត្រ។
ស្រីស្រស់សោភាវ័យ ២០ ឆ្នាំ សំណាង អេលីណា ជាម្ចាស់ពានបវរកញ្ញាចក្កវាឡកម្ពុជាឆ្នាំ ២០១៩ បានឱ្យ ភ្នំពេញ ប៉ុស្តិ៍ ដឹងពីបច្ចុប្បន្នភាពនៃការងារកញ្ញាផងដែរតាមរយៈអ្នកគ្រប់គ្រង។ បើតាមប្រភពអ្នកគ្រប់គ្រងសុំមិនបញ្ចេញឈ្មោះនោះ បានឱ្យដឹងថា៖ «កាលពីដើមឆ្នាំ ២០២០ អេលីណា មានផលិតកម្មកុន ២ បានផ្តល់កិត្តិយសឱ្យនាងគ្រងតំណែងជាតួឯកទាំង ២ រឿង។ តែ អេលីណា មិនអាចទទួលបានព្រោះជាប់រវល់រៀនសាកលវិទ្យាល័យ។ ចំពោះសមត្ថភាពសម្តែងកុន អេលីណា គាត់អាចទៅរួច ព្រោះគាត់ក៏មានទេពកោសល្យដែរ»៕