![](https://pppkhmer.sgp1.digitaloceanspaces.com/image/main/field/image/malala-wedding.jpg)
ម្ចាស់ពានណូបែលសន្ដិភាព ដែលធ្លាប់រងការបាញ់ប្រហារ បានរៀបការកាលពីថ្ងៃអង្គារ។ Instagram/MalalaYousafzai
ក្រុងឡុងដ៍៖ ម្ចាស់ពានណូបែលសន្ដិភាព ម៉ាឡាឡា យូសាហ្វហ្សៃ ដែលត្រូវបានបាញ់ប្រហារដោយក្រុមតាលីបង់ជនជាតិប៉ាគីស្ថាន ចំពោះការធ្វើយុទ្ធនាការអប់រំក្មេងស្រី បានរៀបការកាលពីថ្ងៃអង្គារក្នុងកម្មវិធីតូចមួយ នៅក្រុងប៊ើមីងហេម ភាគកណ្ដាលប្រទេសអង់គ្លេស។ នេះបើយោងតាមការប្រកាសរបស់សាមីខ្លួននៅលើបណ្ដាញសង្គម។
អ្នកនាងបានសរសេរនៅលើ Twitter អមដោយរូបភាពជាច្រើនសន្លឹកជាមួយស្វាមីនៅថ្ងៃមង្គលថា៖ «ថ្ងៃនេះ ជាឱកាសដ៏មានតម្លៃក្នុងឆាកជីវិតខ្ញុំ។ អាសស័រ (ម៉ាលិក) និងរូបខ្ញុំបានរៀបមង្គលការជាប្ដីប្រពន្ធពេញមួយជីវិតហើយ»។
អ្នកនាងបានបន្ដថា៖ «យើងបានរៀបចំកម្មវិធីនីកកាមួយតូចនៅផ្ទះក្នុងទីក្រុងប៊ើមីងហេមជាមួយសាច់ញាតិ។ សុំបួងសួងឱ្យយើងខ្ញុំទាំង២នាក់ផង។ យើងមានក្ដីរំភើបរីករាយដែលបានដើរលើវិថីជីវិតរួមគ្នា»។
![](https://pppkhmer.sgp1.cdn.digitaloceanspaces.com/image/main/malala-wedding-1.jpg)
ម្ចាស់ពានណូបែលសន្ដិភាពម៉ាឡាឡាយូសាហ្វហ្សៃប្រកាសពីមង្គលការនាងក្នុងបណ្ដាញសង្គម។ Instagram/MalalaYousafzai
ពេលអ្នកនាងស្ថិតក្នុងវ័យ ១៥ ឆ្នាំ យូសាហ្វហ្សៃ ត្រូវបានបាញ់ចំក្បាលដោយក្រុមជីវពលប៉ាគីស្ថានតេរីក-អ៊ី-តាលីបង់ ជាខ្សែស្រឡាយក្រុមតាលីបង់អាហ្វហ្គាន នៅទីក្រុងលំនៅឋាននៃជ្រលង Swat ខណៈជិះរថយន្ដក្រុងសាលាក្នុងឆ្នាំ ២០១២។
អ្នកនាងបានជាសះស្បើយក្រោយសម្រាកព្យាបាលជាច្រើនខែទាំងនៅផ្ទះ និងបរទេសមុនពេលសរសេរសៀវភៅរួមគ្នាមួយដែលលក់ដាច់បំផុតក្រោមចំណងជើងថា «ខ្ញុំឈ្មោះ ម៉ាឡាឡា»។
យូសាហ្វហ្សៃ ទទួលបានពានណូបែលសន្ដិភាពតាំងពីអាយុ ១៧ ឆ្នាំ ក្នុងឆ្នាំ ២០១៤ ជាពានដែលទទួលបានរួមគ្នាជាមួយ កៃឡាស សាទីយ៉ាធី។
![](https://pppkhmer.sgp1.cdn.digitaloceanspaces.com/image/main/malala-wedding-2.jpg)
នាង និងស្វាមីបានរៀបចំកម្មវិធីនីកកាមួយតូចនៅផ្ទះក្នុងទីក្រុងប៊ើមីងហេមជាមួយសាច់ញាតិ។
អ្នកនាង បានបញ្ចប់ការសិក្សាកាលពីឆ្នាំមុនពីសាកលវិទ្យាល័យអុកហ្វដ ក្នុងផ្នែកទស្សនវិជ្ជា នយោបាយ និងសេដ្ឋកិច្ច។
បច្ចុប្បន្ន ក្នុងវ័យ ២៤ ឆ្នាំ អ្នកនាងបន្ដគាំទ្រដល់ការអប់រំក្មេងស្រី ជាមួយអង្គការមូលនិធិ ម៉ាឡាឡា ដែលបានវិនិយោគទឹកប្រាក់ ២ លានដុល្លារក្នុងប្រទេសអាហ្វហ្គានីស្ថាន។
អ្នកនាងក៏បានចុះកិច្ចព្រមព្រៀងជាមួយ Apple TV+ ដែលនឹងផលិតជាសាច់រឿងនិងឯកសារអំពីដំណើរជីវិតអ្នកនាងដោយផ្ដោតលើស្ដ្រី និងកុមារ៕ AFP/HR
![](https://pppkhmer.sgp1.cdn.digitaloceanspaces.com/image/main/malala-wedding-3.jpg)
នាង និងស្វាមីបានរៀបចំកម្មវិធីនីកកាមួយតូចនៅផ្ទះក្នុងទីក្រុងប៊ើមីងហេមជាមួយសាច់ញាតិ។