រូបភាពពីគំនូរជីវចល The Legend of Khema។ រូបថត សហការី
ភ្នំពេញ: កែវភ្នែកពណ៌ខ្មៅមូល-ក្រឡង់ ចិញ្ចើមក្រាស់ខ្វង់ សមនឹងសាច់សម្បុរស្រអែម យុវជនអាយុខ្ទង់ ២០ ឆ្នាំ ជួតក្រមាលើថ្ងាស អាវពណ៌ខៀវ និងក្បិនពណ៌ខៀវបៃតង ដៃកាន់ត្បូងជះពន្លឺមួយ រត់ឆ្លងកាត់ឧបសគ្គគន្លឹះយន្ដ សំដៅទៅកាន់ប្រាង្គប្រាសាទកំពូល ៣ មួយ។
យុវជន ខេម៉ា មានភារកិច្ចយកត្បូងចរណៃទៅប្រគល់សងឱ្យវិហារនាងនាគ ដ៏ចំណាស់ដែលបន្សល់តាំងពីចក្រភពហ្វ៊ូណន។ ក្នុងបេសកកម្មនេះ ខេម៉ា ប្ដេជ្ញាចិត្ដបំពេញកិច្ចការឱ្យបានសម្រេចដោយខាងតែបាន។ ប៉ុន្ដែវាមិនងាយស្រួលដូចការរំពឹងទុករបស់យុវជនរូបនេះឡើយ។
ខេម៉ា គឺជាតួអង្គគំនូរជីវចលប្រឌិតនៃរឿង «The Legend of Khema» នៅក្នុងសម័យកាលចាប់បដិសន្ធិនៃចក្រភពខ្មែរដ៏រុងរឿង។ យុវជនខ្មែរមន ស្ថិតក្នុងចំណោមជនជាតិភាគតិច
រស់នៅក្នុងព្រៃជ្រៅនៃនគរកម្ពុជ ដែលគោរពព្រះពុទ្ធសាសនា និងបូជាអាទិទេព Sauveli ដែលជួយឃុំគ្រងជនជាតិនេះឱ្យរួចផុតពីសង្គ្រាម។
សកម្មភាពគំនូរជីវចលដ៏រស់រវើករបស់ខេម៉ា រត់ ហក់លោត ឆ្លងកាត់ឧបសគ្គ ក្រោមសម្រស់ធម្មជាតិនៃព្រៃព្រឹក្សា និងប្រាង្គប្រាសាទតែជាង ១ នាទី បានធ្វើឱ្យអ្នកទស្សនានៅលើបណ្ដាញសង្គមមិនទាន់អស់ចិត្ដ និងចង់ដឹងចង់ឃើញសកម្មភាព ក៏ដូចជាសាច់រឿងបន្ដទៀតរបស់ខេម៉ា។
អ្នកនៅពីក្រោយគំនូរជីវចល 3D ខ្លីដ៏គួរឱ្យចាប់អារម្មណ៍នេះ គឺជាយុវជនវ័យ ២២ ឆ្នាំ លោក ម៉េង យូឌីស័ក។
និស្សិតបញ្ចប់ការសិក្សានៅបរទេសរូបនេះចូលចិត្តទស្សនាភាពយន្តល្បីៗ និងបានចាប់ផ្ដើមស្រឡាញ់វិស័យក្រាហ្វិកឌីហ្សាញភាពយន្ដ រហូតប្ដូរជំនាញស្ថាបត្យកម្ម និងសំណង់ មកសិក្សាចាប់យកជំនាញគំនូរជីវចលនៅប្រទេសអូស្ដ្រាលី។
យុវជន ម៉េង យូឌីស័ក ជានិស្សិតរៀននៅអូស្ដ្រាលី ដែលទើបបញ្ចប់ការសិក្សាផ្នែកឌីហ្សាញ។ រូបថត សហការី
គំនូរជីវចល ខេម៉ា ដែលផ្ដើមចេញពីកិច្ចការសាលានេះត្រូវបាន យូឌីស័ក រៀបរាប់ថា៖ «ខ្ញុំបាននឹកឃើញរឿងមួយ ដែលកាលពី ២-៣ ឆ្នាំមុន ខ្ញុំចាប់ផ្ដើមនិពន្ធរឿងមួយឈ្មោះ (ខេម៉ា) ជារឿងប្រវត្ដិសាស្ដ្រប្រឌិតនៅសម័យព្រះបាទជ័យវរ្ម័នទី២។ ខ្ញុំយកឱកាសនេះផលិតគំនូរជីវចល ខេម៉ា សម្រាប់កិច្ចការសាលាតែម្ដងទៅ»។
និស្សិតឌីហ្សាញ និង 3D animation ពីសាកលវិទ្យាល័យបច្ចេកវិទ្យាក្រុងស៊ីដនី ត្រូវបានតម្រូវឱ្យផលិតគំនូរជីវចលបែបឧស្សាហកម្មដូចនៅបណ្ដាប្រទេសក្នុងតំបន់អឺរ៉ុបត្រឹម ១ នាទីកន្លះសម្រាប់ឱ្យខាងសាលាដាក់ពិន្ទុ។
អ្នកបង្កើតគំនូរជីវចល ខេម៉ា ដែលរំលេចតួអង្គខ្មែរតាមស្ដង់ដាគំនូរជីវចលអឺរ៉ុប ក្នុងរយៈពេល ១,១៨ នាទី រូបនេះបានបន្តថា៖ «ខ្ញុំគិតថា រយៈពេលប្រមាណ ១ ខែនេះ វាមានល្បឿនលឿនគ្រាន់បើដែរ ដោយសារខ្ញុំធ្វើតែម្នាក់ឯង។ ប៉ុន្ដែ ខ្ញុំក៏ឆ្លៀតយកឱកាសនេះបន្ដស្នាដៃសាច់រឿងតែម្ដង ពីព្រោះគោលដៅរបស់ខ្ញុំចង់បង្កើតរឿងភាគគំនូរជីវចល ខេម៉ា នេះមែនទែននៅក្នុងស្រុកខ្មែរយើងតែម្ដង»។
ការផលិតសាច់រឿងនេះ យូឌីស័ក បាននិយាយថា ផលិតករត្រូវសិក្សាស្រាវជ្រាវច្រើនអំពីប្រវត្ដិសាស្ដ្រ ព្រោះអត់សូវមានការកត់ត្រា រវាងសម័យហ្វ៊ូណន និងសម័យចេនឡា។
យូឌីស័ក បានអះអាងថា៖ «ទោះបីយ៉ាងណា ទាំងការសរសេរសៀវរភៅ និងការផលិតគំនូរជីវចល ខ្ញុំផ្ដោតលើប្រវត្ដិសាស្ដ្របែបប្រឌិត ដោយខ្ញុំចង់យកស្ទីលតាមអឺរ៉ុប ចិន និងជប៉ុន ដែលពួកគេយកប្រវត្ដិសាស្ដ្រមែនទែនមក និងបន្ថែមបន្ថយខ្លះ ដើម្បីឱ្យមាន appeal (ភាពទាក់ទាញ) ដែលរំលេចនូវភាពល្អមើល និងចូលចិត្ដ»។
លោកទទួលស្គាល់ថា មហិច្ឆតាចង់ផលិតគំនូរជីវចល 3D ខេម៉ា ឱ្យចេញជារូបរាង ទៅតាមសាច់រឿងរបស់លោកបាននិពន្ធកន្លងមក វាត្រូវការពេលវេលាទាំងផ្នែកស្រាវជ្រាវប្រវត្ដិសាស្ដ្រ ការឌីហ្សាញ ជាពិសេសការបង្កើតក្រុមការងារដ៏ល្អមួយ។
លោកបានបន្ដថា៖ «វានៅវែងឆ្ងាយទៀតដែរ ដោយសារឥឡូវ ខ្ញុំទើបរៀនចប់ ខ្ញុំអត់ទាន់មាន team។ ខ្ញុំអត់ទាន់រក artists និងសមាជិកផ្សេងៗទៀត ខ្ញុំនៅធ្វើម្នាក់នៅឡើយ»។
កាលពីខែឧសភា សាកលវិទ្យាល័យរបស់លោកក៏បានឱ្យលោកចូលរួមជាមួយសមាជិក ៤ នាក់ផ្សេងទៀត ក្នុងការផលិតគំនូរជីវចលមួយដែលត្រូវបានដាក់បញ្ចាំងនៅបារាំងក្នុងមហោស្រព Annecy International Animation Film Festival។
3D Animation។ រូបថត សហការី
ខេម៉ា គ្រាន់តែជាចំណុចចាប់ផ្ដើមមួយដែលយុវជន យូឌីស័ក ឈានជើងចូលប្រឡូកក្នុងវិស័យភាពយន្ដ 3D ដោយលោកបានបង្កើតល្ខោនស្ទូឌីយូផ្ដោតលើបច្ចេកវិទ្យារួម។
លោក យូឌីស័ក បានបញ្ជាក់ថា៖ «ខ្ញុំចង់ឱ្យ ល្ខោនស្ទូឌីយោ ជាស្ទូឌីយោហូលីវូដមួយ ដែលរួមបញ្ចូលគ្នាទាំងអស់ទាំងការផលិតគំនូរជីវចល 3D ការឌីហ្សាញបែប VFXs។ នេះជាគោលដៅរបស់ខ្ញុំ»។
លោកបានឱ្យដឹងថា៖ «ខ្ញុំចង់ឱ្យខ្មែរយើងមានវិស័យកុន ឬ media នេះឱ្យខ្លាំងដែលអាចប្រជែងជាមួយពិភពលោកបាន។ ដូចជា នៅជប៉ុន គំនូរជីវចលរបស់គេល្បីមែនទែន ហើយអាមេរិក រឿងរបស់ក្រុមហ៊ុន Marvel ក៏ល្បីល្បាញខ្លាំង»។
ក្រៅពីទទួលកិច្ចការរាយរងតាមតម្រូវការអតិថិជន ល្ខោនស្ទូឌីយោ នឹងចាប់ផ្ដើមដំណើរពីការគំនូរជីវចលភាគ ខេម៉ា និងបន្ដទៅធ្វើតុក្កតាខ្លីៗ ក៏ដូចជាភាពយន្តផ្សេងៗទៀត។
លោក យូឌីស័ក បានឱ្យដឹងថា៖ «យោងតាមការនិពន្ធជាសាច់រឿងខេម៉ានេះ ខ្ញុំគិតថា វាមានប្រវែងពី ៣ ទៅ ៤ រដូវកាល ដែលមិនវែងខ្លាំង បើធៀបនឹងរឿងសម័យឥឡូវ»។
យ៉ាងណាមិញ លោកប្រមើមើលថា ការដាក់បញ្ចាំងស្នាដៃនេះ គឺជាឧបសគ្គមួយដែរ ដោយសារលោកអត់-ទាន់ដឹងអំពីទីផ្សារនៅស្រុកខ្មែរ។
លោកលើកឡើងថា៖ «ខ្ញុំមិនដឹងថា អាចលក់របៀបមេ៉ច ហើយសិនជារឿងដុំ វាអាចដាក់បញ្ចាំងក្នុងរោងកុនបាន។ តែជាប្រភេទគំនូរជីវចលភាគ ត្រូវការដាក់បញ្ចាំងលើអនឡាញ ដូចជា Netflix អី។ ខ្ញុំអត់ទាន់ដឹងថា ខ្ញុំត្រូវធ្វើយ៉ាងដូចម្ដេច។ អ៊ីចឹង ខ្ញុំត្រូវការពេលវេលាស្រាវជ្រាវតទៅទៀត»។
បើទោះបីជា ខេម៉ា ត្រូវបានឃុំគ្រងប្រកបដោយសុខសុវត្ថិភាព និងបញ្ចៀសអស់រាល់ឧបសគ្គផងទាំង-ពួងយ៉ាងណាក៏ដោយ ក៏តួអង្គដ៏មានភាពស្វាហាប់រូបនេះបានធ្លាក់ទៅក្នុងភ្នក់ភ្លើងដ៏ចលាចលដើម្បីភ្លក្សរសជាតិជីវិតស្ថិតក្នុងភាពលំបាក។
នៅទីបញ្ចប់ ខេម៉ា បានសម្រេចគោលដៅបេសកកម្មនៃដំណើរផ្សងព្រេងទៅដល់ Java Kingdom Authority Gate។
ព័ត៌មានលម្អិត និងការទស្សនាវីដេអូគំនូរជីវចល «The Legend of Khema» សុំចូលទៅកាន់ទំព័រហ្វេសប៊ុក @lakhonstudio ឬវេបសាយ https://studiolakhon.wixsite.com/lakhon/៕
វីដេអូ៖
