គូឡាឡាំពួ៖ ពាក់វ៉ែនតាខ្មៅ និងរ៉ូបក្រឡាខ្លា តារាចម្រៀងហ៊ីបហបម៉ាឡេស៊ី SYA កាន់ក្បាលមេក្រូបន្លឺបទ អំពាវនាវឱ្យមានការលើកកម្ពស់ស្ត្រី នៅទឹកដីដែលប្រណិបតន៍តឹងរឹងចំពោះស្ត្រីក្រោមច្បាប់មូស្លីម។
តារាចម្រៀងក្រោមទ្រនំផលិតកម្ម Def Jam ដែលជាស្លាកសញ្ញានៅពីក្រោយកំពូលតារាពី Jay-Z និង រីអាណា រហូតដល់ BTS និង ចេស្ទីន ប៊ីប៊ើរ បទចម្រៀងដំបូងរបស់នាង SYA មានឈ្មោះថា Pretty Girl Bop កំពុងប្រឈមនឹងភាពចម្រូងចម្រាស់នៅទឹកដីកំណើតដែលពលរដ្ឋភាគច្រើនកាន់សាសនាអ៊ិស្លាម។
តារាចម្រៀងសក់ខ្មៅវែង SYA បាននិយាយថា៖ «ខ្ញុំគ្រាន់តែចង់ឱ្យស្ត្រីមានអារម្មណ៍ពោរពេញដោយសេចក្ដីសុខក្នុងភាពជាខ្លួនឯង»។
នាងបន្តទៀតថា៖ «ខ្ញុំមិនចាំបាច់ធ្វើខ្លួនជាអ្នកផ្សេងនោះទេ ដើម្បីឲ្យសមនឹងអ្វីដែលសង្គមយើងយល់ឃើញថាល្អ»។
នាងស្ថិតក្នុងចំណោមសិល្បករវ័យក្មេងនៅប្រទេសម៉ាឡេស៊ី សិង្ហបុរី ឥណ្ឌូណេស៊ី ថៃ និងហ្វីលីពីន ដែលត្រូវបានចុះកុងត្រាដោយផលិតកម្មលំដាប់ពិភពលោក Def Jam។
ទទួលបានការកោតសរសើរពីឧស្សាហកម្មនេះថាជាតារាកំពុងរះ តារាចម្រៀងស្រីវ័យ ២៥ ឆ្នាំរូបនេះនិយាយថា នាងប្រឈមមុខនឹងការរំលោភបំពានលើអ៊ីនធឺណិតពីអ្នកដែលជឿថា អាកប្បកិរិយារបស់នាងមិនសមរម្យសម្រាប់នារីម៉ូស្លីមវ័យក្មេង។
តារារ៉េបរូបនេះ បង្ហើបថា៖ «ខ្ញុំទទួលបានសម្ដីមើលងាយជាច្រើនដែលរំខានដល់អារម្មណ៍ ដោយអ្នកខ្លះចោទខ្ញុំថាជាស្រីពេស្យា និងខ្លះទៀតសួរថាតើខ្ញុំកាន់សាសនាអី»។
ជនអគតិមួយចំនួនតែងលើកសំណួរថា៖ «តើនាងជាមូស្លីមមែនទេ? នាងស៊ីមួយយប់ថ្លៃប៉ុន្មាន? ហេតុអ្វីបានជានាងលេងសាច់សម្ញែងខ្លួនប្រាណទាំងផ្ទាំងៗដូច្នេះ»។
ខណៈពេលដែលម៉ាឡេស៊ីជាប្រទេសរីកចម្រើន សង្គមជំនឿសាសនានៅតែអភិរក្សនិយម ដោយតែងតែមានអ្នករិះគន់ថា សិទ្ធិស្ត្រីមិនត្រូវបានការពារគ្រប់គ្រាន់ទេ ហើយការយាយីមកលើនារីភេទគឺជារឿងធម្មតា។
សម្រាប់តារាចម្រៀង SYA ដែលមានឈ្មោះពិត នួរ បាទ្រីស៊ីយ៉ា ម៉ូហាមាដ ណាហ្សរី នាងយល់ថា សិល្បៈ និងសាសនាគួរតែបែងចែកឱ្យដាច់ពីគ្នា។
តារាចម្រៀងរូបនេះនិយាយថា៖ «តើ (សាសនា) ទាក់ទងអ្វីជាមួយខ្ញុំជាសិល្បករ ហើយអ្វីដែលខ្ញុំបង្កើត?»។
សិល្បការិនីរូបនេះបានចំណាយពេលកុមារភាពនៅក្រៅប្រទេស និងទទួលបានឱកាសឡើងឆាកតន្ត្រីដោយចៃដន្យ ក្រោយពីនាងបានបង្ហោះការងារច្រៀងរាំខ្លះតាមអ៊ីនធឺណិត។
នៅពេលធំឡើង SYA បានចូលរួមក្នុងកម្មវិធីបង្ហាញទេពកោសល្យ និងស្តាប់ចម្រៀងអាមេរិកដូចជាបទ ប្រ៊ីដនី ស្ពៀរ និងម៉ៃឃើល ជេកសិន ជាដើម។
នៅប្រទេសម៉ាឡេស៊ី ដែលសិល្បករខ្លះត្រូវប្រឈមនឹងវិធានការអាជ្ញាធរ តារាចម្រៀងស្រីរូបនេះ សម្គាល់ថា សិល្បករប្រុសមានសេរីភាពច្រើនក្នុងការរ៉េបរឿងរសើបក្នុងប្រទេសអភិរក្សដោយមិនខ្លាចរងការរិះគន់។
នាងបាននិយាយថា៖ «សម្រាប់ប្រុសៗគឺគ្មានការកំណត់ទេ ប្រសិនបើពួកគេចង់ច្រៀងរ៉េបពីបញ្ហាសិច ឬជក់គ្រឿងញៀន។ ពួកគេរួចខ្លួនរហូត»។
តារាចម្រៀងម៉ាឡេស៊ីរលកថ្មី SYA សង្ឃឹមថា តន្ត្រីរបស់នាងជំរុញចិត្តស្ត្រីផ្សេងទៀត មិនមែនដើម្បីត្រាប់តាមនាងទេ ប៉ុន្តែត្រូវមានទំនុកចិត្តលើខ្លួនឯងកាន់តែខ្លាំង។
នាងបាននិយាយថា៖ «ខ្ញុំមិនចង់ក្លាយជាគំរូដ៏ល្អឥតខ្ចោះនោះទេ។ អ្នកអាចទទួលយកការបំផុសគំនិតពីខ្ញុំ (ដើម្បី) ធ្វើជាបុគ្គលតាមក្ដីស្រមៃរបស់អ្នក»៕ AFP