លោក គីស៊ីដា ថា លោកមិនបានជួបរឿងព្រឺសម្បុរនៅភូមិគ្រឹះផ្លូវការទេ។ រូបថត AFP
ក្រុងតូក្យូ: លោកនាយករដ្ឋមន្ត្រី ជប៉ុន ហ្វឹមីអូ គីស៊ីដា បានថ្លែងកាលពីថ្ងៃចន្ទថា លោកទទួលទានដំណេកលក់ស្កប់ស្កល់ បន្ទាប់ពីចូលស្នាក់នៅភូមិគ្រឹះផ្លូវការ ដែលត្រូវបានទុកទំនេរចោលអស់រយៈពេល ៩ ឆ្នាំ និងជាជាទីរួមរឹតដោយពាក្យចចាមអារ៉ាមថាមានខ្មោចលង។
ភូមិគ្រឹះជាលំនៅឋានផ្លូវការរបស់នាយកដ្ឋមន្ត្រីស្ថិតនៅតំបន់ប្រណីត កណ្ដាលក្រុងតូក្យូ ត្រូវបានរក្សាទុកដោយគ្មានអ្នកស្នាក់ ក្នុងអំឡុងពេលកាន់អំណាចពីអតីតនាយករដ្ឋមន្ត្រី លោក យ៉ូស៊ីហ៊ីដេ ស៊ូហ្គា និងលោក ស៊ីនហ្សូ អាបេ។
លោក ស៊ីនហ្សូ អាបេ ក៏ធ្លាប់បានច្រានចោលនូវហេតុផលដែលថា លោកមិនបានមកនៅក្នុងភូមិគ្រឹះចំណាស់ដិតដាមដោយប្រវត្តិសាស្ត្របង្ហូរឈាម និងបន្សល់នូវជំនឿតៗគ្នាថាទីនោះមានវិញ្ញាណខ្មោច។
ទីតាំងនេះធ្លាប់ជាមុខសញ្ញានៃការប៉ុនប៉ងធ្វើរដ្ឋប្រហារក្នុងឆ្នាំ ១៩៣៦ ដោយមានមន្ត្រីជាន់ខ្ពស់ជាច្រើនរូប រួមទាំងរដ្ឋមន្ត្រីហិរញ្ញវត្ថុត្រូវបានធ្វើឃាតដោយក្រុមយោធាវ័យក្មេង។
ហេតុការណ៍អកុសលនេះ បានបង្កនូវពាក្យចចាមអារ៉ាម និងរបាយការណ៍អស់រយៈពេលជាច្រើនឆ្នាំមកហើយថា ទីនោះមានវិញ្ញាណអ្នកស្លាប់វិលវល់ និងចេញលងមនុស្សនៅតាមច្រកដើរជាដើម។
ទោះជាជប៉ុនទំនើបជឿនលឿន យ៉ាងណាក៏ដោយ ប្រជាជនខ្លះនៅមានអារម្មណ៍ និងជំនឿលើព្រលឹងខ្មោចព្រាយបិសាច។
ប៉ុន្តែលោក គីស៊ីដា បាននិយាយថា លោកមានអារម្មណ៍ស្រស់ស្រាយក្រោយពីស្នាក់នៅរាត្រីដំបូងក្នុងលំនៅឋានផ្លូវការនោះ។
នៅពេលដែលលោកត្រូវបានសួរថា តើលោកមានពើបប្រទះហេតុការណ៍ព្រឺសម្បុរដូចដែលគេល្បីតៗគ្នាដែរឬទេ លោកបានថ្លែងប្រាប់អ្នកយកព័ត៌មានវិញថា៖ «ខ្ញុំបានទទួលទានដំណេកយ៉ាងស្កប់ស្កល់ម្សិលមិញ»។
លោកបានបន្តថា៖ «ខ្ញុំអត់ទាន់បានឃើញអ្វីនៅឡើយទេ»៕ AFP
