តារាទូរទស្សន៍ និងសហគ្រិនគ្រឿងសម្អាងប្រាក់ពាន់លានដុល្លារ គីម កាដាសៀន។ AFP
ទីក្រុងឡូសអេនជឺលេស៖ តារាទូរទស្សន៍និងសហគ្រិនគ្រឿងសម្អាងប្រាក់ពាន់លានដុល្លារ គីម កាដាសៀន បានប្រឡងជាប់ថ្នាក់ច្បាប់ឆ្នាំទី ១ នៅរដ្ឋកាលីហ្វ័រនីញ៉ា ដែលធ្វើឲ្យនាងកាន់តែខិតទៅជិតការក្លាយជាមេធាវី។
មហាសេដ្ឋីជាស្ត្រីជំនួញរូបនេះបានប្រាថ្នាចង់បានសិទ្ធិអនុវត្តច្បាប់ជាយូរមកហើយ ហើយនាងបានសម្រេចជោគជ័យក្នុងការសាកល្បងលើកទី ៤ របស់នាង។
ដោយសំដៅលើការប្រឡងនិស្សិតច្បាប់ឆ្នាំទី១ដែលជាធម្មតាធ្វើឡើងបន្ទាប់ពីការសិក្សាបាន ១ ឆ្នាំ នាងបានប្រកាសតាមបណ្ដាញសង្គមថា៖ «ឱ្យព្រះជាម្ចាស់ខ្ញុំបានប្រឡងជាប់ Baby Bar Exam»។
នាងបានបន្តទៀតថា៖ «សម្រាប់នរណាដែលមិនដឹងពីដំណើរសិក្សារបស់ខ្ញុំនៅសាលាច្បាប់ ខ្ញុំចង់ប្រាប់ថាវាមិនងាយស្រួលទេសម្រាប់ខ្ញុំ»។
តារាស្រីល្បីចាយរាងខ្លាំងសម្បើមរូបនេះបានបរិយាយគ្មានសល់ថា៖ «ខ្ញុំបានសាកល្បង ៣ ដងហើយក្នុងរយៈពេល ២ ឆ្នាំ។ ខ្ញុំដួលហើយខ្ញុំខំងើបខំប្រឹងរៀនម្ដងទៀតរហូតដល់ខ្ញុំធ្វើបាន! បញ្ជាក់កាលពីប្រឡងលើកទី ៣ ខ្ញុំបានឆ្លងកូវីដកម្ដៅដល់ ៤០ អង្សា តែខ្ញុំមិនយកវាជាលេសមិនប្រឡងទេ»។
ការប្រឡងទាមទារឱ្យនិស្សិតសរសេរអត្ថបទចំនួន៤ និងសំណួរជ្រើសរើសពហុចម្លើយចំនួន ១០០ ទាក់ទិននឹងកិច្ចសន្យា ច្បាប់ព្រហ្មទណ្ឌ និងទោសទណ្ឌ។
គីម បានប្រឡងជាប់ថ្នាក់ច្បាប់ឆ្នាំទី១ដែលធ្វើឲ្យនាងកាន់តែខិតទៅជិតការក្លាយជាមេធាវី។ AFP
តួលេខបានដ្ឋបង្ហាញថាមានតែអ្នកធ្វើតេស្តប្រហែល១ភាគ៨ទៅ១ភាគ៤នៃអ្នកប្រឡងសរុបប៉ុណ្ណោះដែលអាចប្រឡងជាប់។
គីម នឹងត្រូវឆ្លងកាត់ការប្រឡង២ដងទៀតហើយនាងនឹងត្រូវបានវិនិច្ឆ័យពីការអនុវត្តច្បាប់ជាគំរូ និងក្រមសីលធម៌ល្អទើបត្រូវបានអនុញ្ញាតឱ្យអនុវត្តច្បាប់។
តារាទូរទស្សន៍រូបនេះធ្លាប់បានបញ្ចុះបញ្ចូលឱ្យមានកំណែទម្រង់យុត្តិធម៌ព្រហ្មទណ្ឌ និងសម្រាប់ការលើកលែងទោសចំពោះករណីបុគ្គល និងការកាត់ទោសប្រហារជីវិត។ នាងក៏ធ្លាប់បានទៅទស្សនាសេតវិមានដើម្បីជួបជាមួយអតីតប្រធានាធិបតីដូណាល់ត្រាំក្នុងឆ្នាំ ២០១៩។
នាងមិនមែនជាសមាជិកដំបូងនៃគ្រួសារដែលដើរលើវិថីច្បាប់នោះទេ។ ឪពុករបស់នាងគឺលោក រ៉ូប៊ើត កាដាសៀន ជាសមាជិកក្រុមអ្នកច្បាប់ ដែលបានការពារដោយជោគជ័យដល់តារាភាពយន្តវិវឌ្ឍខ្លួនក្លាយជាអត្តពលិក OJ Simpson ប្រឆាំងនឹងការចោទប្រកាន់ពីបទមនុស្សឃាត២ដងនៅក្នុងរឿងក្តីដ៏ល្បីបំផុតមួយនៅសហរដ្ឋអាមេរិកនៃសតវត្សរ៍ទី ២០។
គីម កាដាសៀន បានសរសេរនៅលើ Twitter កាលពីថ្ងៃចន្ទថា៖ «ប៉ារបស់ខ្ញុំពិតជាមានមោទនភាពណាស់ ហើយគាត់ពិតជាភ្ញាក់ផ្អើលខ្លាំងណាស់ដែលដឹងថានេះគឺជាផ្លូវរបស់ខ្ញុំ ហើយគាត់អាចនឹងក្លាយជាដៃគូសិក្សាដ៏ល្អបំផុតរបស់ខ្ញុំប្រសិនបើគាត់នៅរស់»។
គីម កាដាសៀន បច្ចុប្បន្នកំពុងលែងលះជាមួយស្វាមីរបស់នាង ដែលជាតារាចម្រៀងរ៉េបកាញ៉េវេស។
ប្រព័ន្ធផ្សព្វផ្សាយអាមេរិកបានរាយការណ៍កាលពីសប្តាហ៍មុនថា នាងបានដាក់ពាក្យសុំសេចក្ដីប្រកាសផ្លូវការពីភាពនៅលីវ និងដកនាមត្រកូលប្តីរបស់នាងចេញពីឈ្មោះផ្លូវការបច្ចុប្បន្នរបស់នាងគឺ គីមកាដាសៀន វេស។
អ្នកទាំង ២ មានកូន ៤ នាក់ដែលថ្មីៗនេះ កូន២នាក់ត្រូវបាននាងនាំយកទៅទស្សនាការសម្ដែងរបស់ កាញ៉េ វេស ហើយលោកក៏ឆ្លៀតឱកាសច្រៀងសុំអង្វរកណ្តាលទីដើម្បីឱ្យ គីម កាដាសៀន វិលមកផ្សះផ្សាជាមួយលោកវិញ៕
នាងក៏ធ្លាប់បានទៅទស្សនាសេតវិមានដើម្បីជួបជាមួយអតីតប្រធានាធិបតីដូណាល់ត្រាំក្នុងឆ្នាំ២០១៩។ AFP
