តារាម៉ូដែល ចម្រៀង និងសម្ដែងលោក ភេង ថាខន ចូលរួមក្នុងការតវ៉ាកាលពីថ្ងៃទី១៧ ខែកុម្ភៈ ឆ្នាំ២០២១។ ហ្វេសប៊ុក/AFP
ក្រុងយ៉ាំងហ្គោន៖ ក្រុមអ្នកច្បាប់របស់លោកបាននិយាយកាលពីថ្ងៃចន្ទថា តារាសម្តែង តារាចម្រៀង និងតារាម៉ូដែលឈានមុខគេនៅមីយ៉ាន់ម៉ាដែលស្ថិតក្នុងបញ្ជីខ្មៅរបបយោធាសម្រាប់សកម្មភាពគាំទ្រការតវ៉ាគាំទ្រលទ្ធិប្រជាធិបតេយ្យត្រូវបានកាត់ទោសឱ្យជាប់ពន្ធនាគាររយៈពេល៣ឆ្នាំ។
តារាប្រុសរូបសង្ហាលោក ភេង ថាខន (Paing Takhon) អាយុ ២៥ឆ្នាំ ដែលជាតារាដ៏ល្បីល្បាញសាយភាយប្រជាប្រិយភាពពីមីយ៉ាន់ម៉ា ដល់ថៃ បានធ្វើសកម្មភាពនៅក្នុងបាតុកម្មដ៏ធំដែលបានធ្វើឱ្យកក្រើកប្រទេស បន្ទាប់ពីរដ្ឋប្រហារខែកុម្ភៈ តាមរយៈវត្តមានចូលរួមការប្រមូលផ្តុំគ្នា និងតាមរយៈប្រព័ន្ធផ្សព្វផ្សាយសង្គមរបស់លោក។
ប្អូនស្រីរបស់លោកបាននិយាយថា លោកត្រូវបានចាប់ខ្លួនក្នុងអំឡុងពេលការវាយឆ្មក់ពេលព្រឹកព្រលឹមនៅផ្ទះម្តាយរបស់លោកនៅទីក្រុងយ៉ាំងហ្គោនក្នុងខែមេសា ខណៈដែលរបបយោធាបានតាមប្រមាញ់តារាល្បីជាង ១០០នាក់ដែលគាំទ្រចលនានេះ។
តារាម៉ូដែល ចម្រៀង និងសម្ដែងលោក ភេង ថាខន ចូលរួមក្នុងការតវ៉ាកាលពីថ្ងៃទី១១ ខែកុម្ភៈ ឆ្នាំ២០២១។ AFP/ហ្វេសប៊ុក
កាលពីថ្ងៃចន្ទ លោក Khin Maung Myint ទីប្រឹក្សាច្បាប់របស់តារាប្រុសរូបនេះបានប្រាប់ AFP ថា៖ «លោកត្រូវបានកាត់ទោសឲ្យជាប់ពន្ធនាគាររយៈពេល ៣ ឆ្នាំដោយប្រើកម្លាំងធ្ងន់។
ទីប្រឹក្សាច្បាប់រូបនេះបាននិយាយថា៖ «ក្រុមគ្រួសារមានការសោកស្ដាយយ៉ាងខ្លាំងចំពោះការកាត់ទោសរូបលោក» ដោយបន្ថែមថា ពួកគេកំពុងពិចារណាថា តើត្រូវប្តឹងឧទ្ធរណ៍ ឬអត់?
កាលពីខែកុម្ភៈ លោក ភេង ថាខន ដែលមានអ្នកតាមដានជាង១លាននាក់នៅលើបណ្ដាញសង្គមហ្វេសប៊ុក និងអ៊ីនស្តាក្រាម បានបង្ហោះរូបភាពខ្លួនឯងក្នុងឈុតខោពណ៌ស ជាមួយនឹងមេហ្គាហ្វូន មួក និងខ្សែចងខ្លួនពេលតវ៉ា។
ជាមួយស្ទាយរូបសាក់ និងសក់វែងរួញបន្តិច តារាមីយ៉ាន់ម៉ា លោក ភេង ថាខន ត្រូវបានគេចាត់ទុកថាមានរូបរាងសង្ហាប្រចាំនៅអាស៊ី។ ហ្វេសប៊ុក
លោកបានបង្ហោះនៅលើអ៊ីនស្តាក្រាមថា៖ «ជួយយើងបញ្ឈប់ឧក្រិដ្ឋកម្មប្រឆាំងមនុស្សជាតិ»។
ភេង ថាខន ក៏ល្បីនៅប្រទេសថៃ និងបានលេចមុខក្នុងទូរទស្សន៍ និងកម្មវិធីនានា។
នៅក្នុងខែមករា លោកបានកោរសក់បួសជាព្រះសង្ឃព្រះពុទ្ធសាសនាមួយរយៈពេលខ្លី ដោយបង្ហោះរូបភាពរបស់លោកក្នុងស្បង់ចីវរពណ៌ក្រមៅ។
តារាម៉ូដែល ចម្រៀង និងសម្ដែងលោក ភេង ថាខន ចូលរួមក្នុងការតវ៉ាកាលពីថ្ងៃទី១៧ ខែកុម្ភៈ ឆ្នាំ២០២១។ AFP
ភ្លាមៗក្រោយរដ្ឋប្រហារ របបយោធាបានចុះបញ្ជីខ្មៅតារាល្បីៗប្រមាណ ១២០នាក់ ហើយតារាមួយចំនួនកំពុងតែគេចខ្លួនពីការតាមចាប់។
កាលពីខែឧសភា រាជិនីសម្រស់ដ៏ល្បីឈ្មោះ Htar Htar Htet បានបង្ហោះរូបថត១សន្លឹកលើបណ្ដាញសង្គហ្វេសប៊ុក ដែលបង្ហាញពីការស្លៀកពាក់ឈុតប្រយុទ្ធពណ៌ខ្មៅ និងកាន់កាំភ្លើងវែង។
គ្រូហាត់កាយសម្ព័ន្ធរូបនេះបានសរសេរថា៖ «ដល់ពេលត្រូវវាយបកវិញហើយ»៕ AFP
តារាមីយ៉ាន់ម៉ា លោក ភេង ថាខន ធ្លាប់បានកោរសក់បួសមួយរៈពេលខ្លី។ ហ្វេសប៊ុក
