ការបង្ហាញពីទម្រង់ក្បាច់គុនបុរាណខ្មែរឈ្មោះ «ល្បុក្កតោ» ក្រុមជ័យតេជះ។ រូបថត ហ្វេសប៊ុក
ភ្នំពេញៈ ថ្មីៗនេះ តារាសម្តែងស្រីល្បីដែលអាចសម្តែងបានគ្រប់ទម្រង់ និងចេះក្បាច់គុនល្បុក្កតោបុរាណខ្មែរ កញ្ញា ពេជ្រ ចរណៃ ធ្វើឱ្យភ្ញាក់ផ្អើលក្នុងបណ្តាញសង្គម ជាមួយនឹងសារស្នើសុំដល់ក្រសួងអប់រំឱ្យបញ្ចូលការហាត់គុនល្បុក្កតោក្នុងកម្មវិធីសិក្សាចាប់ពីថ្នាក់បឋមដល់ថ្នាក់វិទ្យាល័យ ដើម្បីលើកស្ទួយវិស័យកីឡាជាមត៌កវប្បធម៌បុរាណខ្មែរមួយនេះ។
តារាសម្តែងស្រីល្បីដែលអាចសម្តែងបានគ្រប់ទម្រង់ និងចេះក្បាច់គុនល្បុក្កតោបុរាណខ្មែរ កញ្ញា ពេជ្រ ចរណៃ។
តារាស្រីដែលហក់ចូលវិស័យសិល្បៈសម្តែងជាង ១០ ឆ្នាំ តែទើបមកទាញបានភាពល្បីនឹងវិស័យថ្មីជាកីឡាការិនីគុនល្បុក្កតោ ដែលខ្លួនបានចូល-ហាត់រៀនប្រើពេលជិត ៦ ឆ្នាំ ចុងក្រោយ មានឈ្មោះពិតកញ្ញា អ៊ិត កន្និកា ហៅកញ្ញា ពេជ្រ ចរណៃ បង្ហាញនូវសំណើប្រកបដោយគំនិតសុទិដ្ឋិនិយមនេះ ក្រោយពីខ្សែភាពយន្តស្តីពីល្បុក្កតោខ្មែរ បានឈ្នះពានអន្តរជាតិជាប្រវត្តិសាស្ត្រមានប្រមាណចំនួន ២៥ ឯណោះ។
តារាសម្តែងស្រីរូបស្រស់វ័យ ២៥ ឆ្នាំ កញ្ញា ពេជ្រ ចរណៃ បង្ហាញពីចំណាប់អារម្មណ៍ផ្ទាល់ខ្លួនតាមរយៈវីដេអូនៃកិច្ចសម្ភាសន៍នឹងសារព័ត៌មានអនឡាញមួយថា៖ «ប្រសិនជាអាចនោះ នាងខ្ញុំចង់ឱ្យខាងក្រសួងអប់រំ បញ្ចូលការហាត់គុនល្បុក្កតោ ដែលជាមរតកវប្បធម៌បុរាណខ្មែរមួយនេះ ដើម្បីបង្ហាត់បង្រៀនទៅដល់ប្អូនៗ ជាកូនខ្មែរនៅតាមសាលាចាប់ពីកម្រិតនៃបឋមរហូដល់ថ្នាក់វិទ្យាល័យតែម្តង»។
កញ្ញា ពេជ្រ ចរណៃ បានបន្តថា៖ «នាងខ្ញុំគិតថា ការធ្វើបែបនេះ ចង់ឱ្យពិភពលោកកាន់តែស្គាល់យើង និងធ្វើឱ្យកីឡាជាមត៌កវប្បធម៌នៃគុនខ្មែរបុរាណមានអ្នកចូលចិត្តហាត់ច្រើន ព្រោះល្បុក្កតោ គឺជាកីឡាមួយមិនមានការប្រកាន់នូវជាតិសាសន៍នោះឡើយ គឺថាហាត់បានទាំងជនជាតិខ្មែរយើង និងអាចហាត់បានទាំងជនបរទេស»៕
វីដេអូ៖
