ស្ត្រីប៉េរូនៅហាងសាឡនបរិច្ចាគសក់ជួយសម្អាតប្រេងពីសមុទ្រ។ រូបថត AFP
ក្រុងលីម៉ា: ហាងសាឡននៅប៉េរូ បានផ្ដល់សេវាកាត់សក់ឥតគិតថ្លៃដល់សប្បុរសជនទូទាំងប្រទេសដែលហ៊ានបរិច្ចាគសក់ ជួយសង្គ្រោះជីវមច្ឆាសមុទ្រ ដែលរងគ្រោះដោយសារការធ្លាយប្រេងកាលពីថ្មីៗនេះ។
អាជ្ញាធរបានឱ្យដឹងថា ប្រេងប្រមាណជិត ១២ ០០០ ធុង បានធ្លាយចូលមហាសមុទ្រប៉ាស៊ីហ្វិកកាលពីថ្ងៃទី ១៥ ខែមករា។ កន្លែងស្តុកប្រេងត្រូវបានវាយប្រហារដោយរលកស៊ូណាមិ ក្រោយពីមានបន្ទុះភ្នំភ្លើងនៅសមុទ្រជិតដែនកោះតុងហ្គា ឯនាយចម្ងាយជាង ១ ម៉ឺនគីឡូម៉ែត្រ។
សក់ដែលត្រូវបានបរិច្ចាគនឹងត្រូវបញ្ជូនទៅអង្គការ ដើម្បីប្រើប្រាស់វាលាងសម្អាតឆ្នេរសមុទ្រ។
ចូលរួមសកម្មភាពកាត់សក់សង្គ្រោះមច្ឆាសមុទ្រនេះ ម្ចាស់ហាងសាឡន វ័យ ៣៨ ឆ្នាំ Betina Inga បាននិយាយថា៖ «ខ្ញុំបាននាំកូនស្រីខ្ញុំមកកាន់ទីនេះ ហើយពេលដែលនាងឮថាសត្វសមុទ្រកំពុងរងគ្រោះ នាងក៏ព្រមកាត់សក់ជួយពួកវា»។
យ៉ាងណាមិញ ជាងកាត់សក់វ័យ ២៧ ឆ្នាំ កញ្ញា Berenice Lazarte ដែលបម្រើការក្នុងវិស័យនេះយូរហើយ ពុំដឹងថាសក់មានអត្ថប្រយោជន៍ក្នុងការសម្អាតការបំពុលបរិស្ថាននេះទេ។
នាងបាននិយាយថា៖ «ខ្ញុំមិនដឹងសោះថា សក់អាចជួយស្ដារសមុទ្រ និងស្រូបសម្អាតប្រេងដែលធ្លាយ។ អ៊ីចឹងខ្ញុំគិតថា បើយើងមានហាងសាឡនយើងត្រូវតែនាំគ្នាជួយបរិស្ថាន»។
ស្ថិតក្នុងចំណោមអ្នកបរិច្ចាគសក់ កញ្ញា Keila Vasquez អាយុ ១៨ ឆ្នាំ បានរួសរាន់មកឱ្យជាងកាត់សក់។
នាងបាននិយាយថា៖ «សក់អាចដុះលឿន តែជីវិតសត្វវិញ វាងាយនឹងបាត់បង់ណាស់។ ខ្ញុំចង់ទុកសក់វែងពេលណាក៏បាន តែខ្ញុំចង់ធ្វើអ្វីខ្លះដើម្បីជីវិតសត្វទាំងនោះ»៕ AFP/HR
