ស្នាដៃជាទម្រង់របាំសហសម័យដំឡើងថ្មីរបស់លោក ង៉ែត រ៉ាឌី ឈ្មោះថា «សកេរ» ។ រូបថត CLA Facebook & Roof Dance Team Page
ភ្នំពេញៈ ស្នាដៃបង្កើតថ្មីបែបឌីជីថល ជាទម្រង់ល្ខោនខោល និងរបាំសហសម័យជាល្ខោនអាន មានឈ្មោះថា «សកេរ» ដែលទើបសម្តែង ក្នុងកម្មវិធីរដូវវប្បធម៌ឆ្នាំ ២០២២ កន្លងមកថ្មី ដំឡើងដោយលោក ង៉ែត រ៉ាឌី នឹងត្រូវដាក់បញ្ចាំងបែបឌីជីថលតាមអនឡាញ នៅថ្ងៃទី ១៥ ខែ មីនា ឆ្នាំ ២០២២ អាចទស្សនាដោយសេរី។
នេះបើយោងតាមសេចក្តីជូនដំណឹងពីគេហទំព័រផ្លូវការ នៃអង្គការសិល្បៈខ្មែរអមតៈ បានឱ្យដឹងថា៖ «សកេរ» គឺជាស្នាដៃបែបឌីជីថល (របាំកុន) ដោយបង្ហាញទម្រង់ល្ខោនខោល និងរបាំសហសម័យល្ខោនអាន ដើម្បីបកស្រាយអំពីដំណើររឿងរាមកេរ្តិ៍ ដោយដកស្រង់ត្រង់ឈុត «ថ្វាយព្រះទម្រង់»។ ស្នាដៃនេះ មានបញ្ចូលដោយការពោល ស្មូត ភ្លេងពិណពាទ្យ និងសំឡេងអេឡិចត្រូនិក ហើយនឹងដាក់បញ្ចាំងជូនទស្សនាតាមអនឡាញ នាថ្ងៃទី ១៥ ខែ មីនា ឆ្នាំ ២០២២។ ប្រសិនបើលោកអ្នកធ្លាប់បានទស្សនាស្នាដៃ «ឫសគល់» របស់លោក ង៉ែត រ៉ាឌី ក្នុងរដូវវប្បធម៌ឆ្នាំ ២០២០ នោះ ទាំងអស់គ្នា នឹងចង់ដឹងថា តើនឹងមានភាពអស្ចារ្យបន្ថែមទៀតយ៉ាងណាសម្រាប់ស្នាដៃបន្ទាប់នេះ»។
គួរបញ្ជាក់ផងដែរថា ស្នាដៃដំឡើងថ្មីដោយលោក ង៉ែត រ៉ាឌី មានឈ្មោះថា «សកេរ» https://www.facebook.com/Cambodianlivingarts/videos/361396518711487 ដែលជាប់ក្នុងចំណោមស្នាដៃសិល្បៈទទួលបានការឧបត្ថម្ភដំឡើងដោយអង្គការខ្មែរអមតៈក្នុងរដូវវប្បធម៌លើកទី៣ ក្រោមប្រធានបទរួមថា «ទង្វើថ្ងៃនេះ ផលតបស្នងថ្ងៃស្អែក» ហើយត្រូវបង្ហាញជូនទស្សនិកជនចំនួន២ថ្ងៃកាលពីថ្ងៃទី ២២ ដល់ទី ២៣ ខែ មករា ឆ្នាំ ២០២២ នៅហាងកាហ្វេ Java សាខាទួលទំពូង។
ស្នូរសំឡេងភ្លេងលាន់រងំសំឡេងស្មូត្រ សំឡេងពោល កាយវិការ រាំឆ្លាស់គ្នា យ៉ាងរស់រវើករបស់តួអង្គទាំង ៤ សុទ្ធតែជាបុរស ហើយនៅកណ្តាលមានបង្គោលបួនមានបណ្តុបមុខខ្មុកតួអង្គ ព្រះរាម ហនុមាន ក្រុងរាពណ៍ និងមកុដសីតា និងនៅចំហៀង មានតាំងកញ្ចក់ធំមួយផ្ទាំង។ ខណៈទាំងនេះគឺជាសម្រង់ក្នុងឈុតព្រះរាមផ្ញើព្រះទម្រង់តាមហនុមាន ឱ្យយកទៅជូន នាងសីតា ដែលត្រូវក្រុងរាពណ៍ចាប់ទៅ។ ទោះបីមិនមែនជាការសម្តែងផ្ទាល់ក្តី តែការបញ្ចាំងស្នាដៃឌីជីថលមួយនេះមិនធ្វើឱ្យទស្សនិកជនងាកភ្នែកចាកចេញពីអេក្រង់មានការបង្ហាញទម្រង់របាំ សហសម័យនោះទេ ដែលមានរយៈពេលជិត ១ ម៉ោង។
លោក ង៉ែត រ៉ាឌី គឺជាអ្នករាំរបាំសហសម័យម្នាក់ ដែលចាប់ផ្តើមហាត់ក្បាច់រាំ តាំងពីមានអាយុ ១១ ឆ្នាំមក។ លោក រ៉ាឌី
https://www.facebook.com/Cambodianlivingarts/videos/301480558601647 បានខិតខំប្រឹងប្រែងដុសខាត់សិល្ប:ខ្លួន រហូតមានការទទួលស្គាល់ពីកម្មវិធីនៅលើឆាកអន្តរជាតិ តាមបណ្តាប្រទេសនានាដូចជា សហរដ្ឋអាមេរិក អឺរ៉ុប និងអាស៊ី។
លោក រ៉ាឌី បានយល់ច្បាស់ថា ដើម្បីក្លាយជាសិល្បករមានភាពលេចធ្លោម្នាក់ គឺត្រូវមានការឆ្លងកាត់នូវការលំបាកហើយក៏ត្រូវឱ្យលោកខំប្រឹងហ្វឹកហាត់ជារៀងរាល់ថ្ងៃ ប៉ុន្តែកិច្ចការទាំងនេះ មិនបានធ្វើឱ្យលោកមានការចុះញ៉មនោះទេ ដោយឡែក មែនតែធ្វើឱ្យលោកប្រឹងកាន់តែខ្លាំង និងស្គាល់ពីខ្លួនឯងកាន់តែច្បាស់៕
