យុវសិស្ស ១៥ រូបដែលបានសិក្សាពីការផលិតភាពយន្តឯកសារនៅមជ្ឈមណ្ឌល Bophana ។ រូបថត BOPHANA CENTRE
ភ្នំពេញៈជាលទ្ធផលសម្រាប់គម្រោង «ក្រឡេកមើលទន្លេមេគង្គ» ក្នុងសហគមន៍តាមរយៈភាពយន្តឯកសារនៅមជ្ឈមណ្ឌលបុប្ផាណារយៈពេល ១២ ខែ មានយុវជន ១៥ រូប បានផលិតភាពយន្តឯកសារខ្លីចំនួន ១៧ រឿង ដែលក្នុងនោះចំនួន ១២ រឿងផលិតនៅរាជធានីភ្នំពេញ និងខេត្តកណ្តាលនិង៥រឿងផលិតនៅលើទឹកដីនៃខេត្តស្ទឹងត្រែង។
នាឱកាសចែកវិញ្ញាបនបត្របញ្ចប់ការសិក្សាដល់សិក្ខាកាមកាលថ្ងៃទី ១២ ខែតុលា ឆ្នាំ ២០២២ លោក ជា សុភាព នាយកប្រតិបត្តិនៃមជ្ឈមណ្ឌលធនធានសោតទស្សន៍បុប្ផាណា បានថ្លែងបញ្ជាក់ពីគម្រោងនេះថា គឺជាការផ្តល់អាហារូបករណ៍ដល់យុវជនកម្ពុជាចំនួន ១៥ នាក់មានអាយុចន្លោះពី ១៨ ឆ្នាំដល់ ៣០ ឆ្នាំ ដើម្បីចូលរួមក្នុងវគ្គបណ្តុះបណ្តាលផ្នែកផលិតភាពយន្តឯកសារនិងពហុប្រព័ន្ធផ្សព្វផ្សាយ។
លោក ជា សុភាព ថ្លែងថា៖ «ការសម្រេចបាននូវសមិទ្ធផលទាំងនេះ មិនមែនជារឿងចៃដន្យនោះទេ ប៉ុន្តែកើតឡើងមកពីការប្តេជ្ញាចិត្ត និងការតស៊ូយ៉ាងមុតមាំរបស់យុវជនទាំង១៥រូប ក្រោមការជួយជ្រោមជ្រែង ទាំងផ្នែកស្មារតី សម្ភារ និងបច្ចេកទេសរបស់ក្រុមការងារគម្រោង ការគាំទ្រផ្នែកហិរញ្ញវត្ថុរបស់ម្ចាស់ជំនួយ ការចូលរួមសហការពីតួអង្គនៅក្នុងភាពយន្ត និងសមាជិកសហគមន៍ ជាពិសេសកិច្ចសហការ និងសម្របសម្រួលរបស់រដ្ឋបាលថ្នាក់ខេត្ត និងថ្នាក់មូលដ្ឋាន»។
បើតាមលោក ជា សុភាព ភាពយន្តឯកសារខ្លីជាច្រើនក្នុងចំណោមភាពយន្តឯកសារខ្លីទាំង ១៧ រឿងនេះត្រូវបានគេជ្រើសរើស និងចាក់បញ្ចាំងជាលើកដំបូងនៅមហោស្រពភាពយន្តអន្តរជាតិកម្ពុជាលើកទី១១កាលពីខែកក្កដាឆ្នាំ ២០២២កន្លងមកនេះក្រោមវត្តមានរបស់តំណាងស្ថាប័នរដ្ឋ ម្ចាស់ជំនួយ អង្គការដៃគូ សង្គមស៊ីវិល សមាជិកសហគមន៍សិស្ស និស្សិត និងសាធារណជនទូទៅជាង ៤០០ នាក់។
ចំពោះសិស្សទាំង ១៥ រូបក៏ធ្លាប់បានផ្សព្វផ្សាយពីគម្រោង និងភាពយន្តរបស់ខ្លួននៅក្នុងវេទិកាយុវជនថ្នាក់ជាតិឆ្នាំ ២០២២ ដែលសហការរៀបចំឡើងដោយអង្គការតម្លាភាពកម្ពុជា (TI Cambodia) អង្គការអាក់សិនអេតកម្ពុជា
(AAC) មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) អង្គការសិល្បៈខ្មែរអមតៈ (CLA) អង្គការដាយកូនា (Diakonia) និងអង្គការយេនឌ័រនិងអភិវឌ្ឍន៍ដើម្បីកម្ពុជា (GADC) កាលពីខែសីហា ក្រោមវត្តមានអ្នកចូលរួមជាច្រើននាក់ និងបានជាប់ជាក្រុម ដែលមានប្រជាប្រិយភាពជាងគេ។
លោក ទៀង ពិសិដ្ឋ ប្រធានផ្នែករដ្ឋបាល និងអ្នកសម្របសម្រួលនៃគម្រោងរបស់មជ្ឈមណ្ឌលធនធានសោតទស្សន៍បុប្ផាណា ក៏បានឱ្យដឹងពីខ្សែភាពយន្តខ្លីទាំង ៥ រឿង ដែលផលិតនៅក្នុងទឹកដីខេត្តស្ទឹងត្រែងនោះដែរ។ លោកបញ្ជាក់ថា៖ «សិក្ខាកាមទាំង ១៥ នាក់ នោះមានទី ១ រឿង «បេះដូងរ៉ាមសា» សហការដឹកនាំរឿងដោយលោក សន វណ្ណាត, លោក អ៊ឹម វាសនា និងកញ្ញា គង់ រស្មី។ ទី ២ រឿង «ស្រមោលអ្នកណា?» សហការដឹកនាំរឿងដោយ លោក គីម វណ្ណហេង, លោក សោម រ៉ាក់លីវ និងកញ្ញា ជា សុខនី។ ទី ៣ រឿង «ភោគទ្រព្យមេគង្គ» សហការដឹកនាំរឿងដោយកញ្ញា យី លុយហេង, លោក ប៉ាន់ វង្សវិចិត្រ និងលោក ចាន់ ស៊ីណាត។ ទី ៤ រឿង «ដានឪផ្លូវកូន» សហការដឹកនាំរឿងដោយលោក ម៉ម សុធារ៉ា, លោកម៉ៅ ភារក្ស និងកញ្ញា កុល សុវណ្ណពេជ្រ វិច្ឆិកា និងទី៥រឿង «ជម្រកបៃតង» សហការដឹកនាំរឿងដោយលោក ចូវ គីមស្រុង, កញ្ញា អូត ស្រីពេជ្រ និងកញ្ញា ម៉ៅ មែនសុជាតា»។
គម្រោង «ក្រឡេកមើលទន្លេមេគង្គ»ក្នុងសហគមន៍តាមរយៈភាពយន្តឯកសារនៅមជ្ឈមណ្ឌលបុប្ផាណានេះមានការគាំទ្រពីអង្គការ BBC Media Action និងទទួលបានមូលនិធិពីទីភ្នាក់ងារអភិវឌ្ឍន៍អន្តរជាតិនៃប្រទេសស៊ុយ
អែត (SIDA និងទីភ្នាក់ងារស្វ៊ីស សម្រាប់ការអភិវឌ្ឍនិងកិច្ចសហប្រតិបត្តិការ (SDC) និងទទួលការផ្តល់ប្រឹក្សាបច្ចេកទេសពីអង្គការ WWF នៃគម្រោងអភិបាលកិច្ចទន្លេមេគង្គ របស់អង្គការអុកស្វាម គម្រោងអច្ឆរិយភាពនៃទន្លេមេគង្គ វេទិកានៃអង្គការមិនមែនរដ្ឋាភិបាល រដ្ឋបាលជលផល ក្រសួងបរិស្ថាន និងក្រសួងវប្បធម៌ និងវិចិត្រសិល្ប:។
កម្មវិធីប្រគល់វិញ្ញាបនបត្របញ្ជាក់ការសិក្សាដល់សិក្ខាកាមទាំង ១៥ រូបនេះ បានប្រព្រឹត្ដទៅ ក្រោមអធិបតីភាពដ៏ខ្ពង់ខ្ពស់ លោកសោម សុគន្ធ រដ្ឋលេខាធិការប្រចាំការ និងជាតំណាងលោកស្រីភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ។
លោក សោម សុគន្ធ មានប្រសាសន៍លើកទឹកចិត្តដល់យុវជនឱ្យខិតខំសិក្សារៀនសូត្រពីការផលិតភាពយន្តឯកសារឱ្យកាន់តែមានគុណភាព ដើម្បីចូលរួមថែរក្សា និងលើកកម្ពស់វប្បធម៌ ប្រពៃណី ទំនៀមទម្លាប់របស់កម្ពុជា។
លោកបានបញ្ជាក់ថា៖ «ការចូលរួមរបស់យុវជនក្នុងការទទួលយកចំណេះដឹងនិងបទពិសោធថ្មីពាក់ព័ន្ធនឹងការផលិតភាពយន្តឯកសារ ដែលជាសកម្មភាពមួយក្នុងការរួមចំណែកអភិវឌ្ឍវិស័យភាពយន្តនៅកម្ពុជា។ ការសិក្សាផ្នែកបច្ចេកទេសថត សិល្បៈនៃការដឹកនាំរឿង ការសរសេរសាច់រឿង និងបច្ចេកទេសកាត់តរូបភាព ពិតជាមានសារៈសំខាន់ណាស់សម្រាប់អ្នកផលិតភាពយន្តឯកសារ។ តែអ្វីសំខាន់ជាងនេះគឺខ្លឹមសារ និងសច្ចៈភាព ដែលបានបង្ហាញនៅក្នុងភាពយន្តឯកសារនោះតែម្តង»។
គោលបំណងសំខាន់របស់គម្រោងនេះ គឺផ្តល់ការបណ្តុះបណ្តាលជំនាញបច្ចេកទេស និងជំនាញទន់ដល់យុវជនកម្ពុជា ដើម្បីឱ្យពួកគេចេះសម្របខ្លួនជាមួយប្រជាជននៅតាមសហគមន៍ដែលធ្វើឱ្យពួកគេអាចស្វែងយល់ពីបរិស្ថាន ជីវភាពរស់នៅ និងវប្បធម៌របស់ប្រជាជនកម្ពុជា ដែលរស់នៅអាស្រ័យផលទៅលើទន្លេមេគង្គ។
លោក ជា សុភាព បង្ហើបប្រាប់ថា៖ «គោលបំណងសំខាន់មួយទៀត គឺផ្សព្វផ្សាយភាពយន្តឯកសារដែលផលិតដោយយុវជនជយលាភីទាំង ១៥ រូប នៅក្នុងគម្រោងនេះ ដើម្បីជំរុញ និងបង្កើនការចូលរួម របស់យុវជនជាច្រើនផ្សេងទៀតក្នុងសហគមន៍ ដើម្បីចូលរួមអភិវឌ្ឍ សហគមន៍របស់ខ្លួនប្រកបដោយចីរភាព។ សិក្ខាកាមបានសិក្សាពីដំណើរការនៃការផលិតភាពយន្តទាំងផ្នែកទ្រឹស្តី និងការអនុវត្តជាក់ស្តែងនៅគ្រប់ដំណាក់កាលនៃការផលិតភាពយន្តឯកសារដែលរួមមានដំណាក់កាលមុនផលិត, ដំណាក់កាលផលិតនិងដំណាក់កាលក្រោយផលិត ។
លោកបន្ថែមថា៖ «តាមរយៈគម្រោងនេះ សិក្ខាកាមបានប្រើប្រាស់វិធីសាស្ត្រសំខាន់ ២ ទី ១ គឺវិធីសាស្ត្រចូលរួមសង្កេត ។ ដោយសារសិក្ខាកាមបានរស់នៅជារៀងរាល់ថ្ងៃជាមួយប្រជាជនក្នុងសហគមន៍ និងចូលរួមសង្កេតស្វែងយល់ពីបញ្ហានានាដែលប្រជាជនក្នុងសហគមន៍នៅតាមដងទន្លេមេគង្គ កំពុងជួបប្រទះ ដើម្បីត្រៀមខ្លួន សម្រាប់ការផលិតភាពយន្ត។ វិធីសាស្ត្រទី ២ គឺវិធីសាស្ត្រចូលរួមផលិតភាពយន្តឯកសារ។
តាមរយៈវិធីសាស្ត្រនេះ សិក្ខាកាមបានជូនដំណឹងអំពីផែនការផលិតភាពយន្តរបស់ខ្លួន និងធ្វើការយ៉ាងជិតស្និទ្ធ ជាមួយអាជ្ញាធរមូលដ្ឋាន ព្រមទាំងការចូលរួមសហការប្រកបដោយសាមគ្គីភាព ទំនុកចិត្ត និងភាពស្មោះត្រង់ជាមួយប្រជាជនក្នុងសហគមន៍និងតួអង្គដើម្បីរួមគ្នាផលិតភាពយន្តឯកសារស្តីពីសក្តានុពលនិងកត្តាប្រឈមរបស់ទន្លេមេគង្គ ដើម្បីលើកកម្ពស់ការយល់ដឹងនិងការចូលរួមរបស់យុវជន និងភាគីពាក់ព័ន្ធ ក្នុងគោលដៅធានានិរន្តរភាព របស់ជីវិតរស់នៅរបស់មនុស្ស និងជីវចម្រុះតាមដងទន្លេមេគង្គ»។
តាមការបណ្តុះបណ្តាលនៅមជ្ឈមណ្ឌលបុប្ផាណាមានអត្រា៨០ភាគរយនៃសិក្ខាកាមទទួលបានការងារធ្វើនិងបន្តការសិក្សាក្នុងវិស័យភាពយន្ត និងពហុប្រព័ន្ធផ្សព្វផ្សាយទាំងនៅក្នុង និងក្រៅស្រុក។ ឆ្នាំនេះភាពយន្តឯកសារដែលបានផលិតដោយសិក្ខាកាមនៃមជ្ឈមណ្ឌលបុប្ផាណាត្រូវបានជ្រើសរើសយកទៅចាក់បញ្ចាំង និងចូលរួមប្រកួតប្រជែងនៅក្នុងមហោស្រពភាពយន្តអន្តរជាតិនៅប្រទេសបារាំងនិងប្រទេសអូស្ត្រាលី។
នេះជាមោទនភាព និងជាកម្លាំងចលករ ដែលជំរុញឱ្យមជ្ឈមណ្ឌលបុប្ផាណា បន្តបោះជំហានរបស់ខ្លួនទៅមុខប្រកបដោយសុទិដ្ឋិនិយមលើការបណ្តុះបណ្តាលសមត្ថភាព និងជំនាញដល់យុវជនកម្ពុជាដោយរួមបញ្ចូលទាំងយុវជនជាជនជាតិដើមភាគតិចដើម្បីបន្តលើកកម្ពស់ការយល់ដឹងរបស់ប្រជាជនជាពិសេសយុវជនកម្ពុជាតាមរយៈការផលិតភាពយន្តឯកសារ។
ជាមួយគ្នានេះ លោក ជា សុភាព ក៏បានថ្លែងអំណរគុណចំពោះភាគីពាក់ព័ន្ធនានាផងដែរថា៖ «យើងនៅតែចិញ្ចឹមចិត្តក្នុងការបន្តធ្វើកិច្ចការងារនេះ ដើម្បីចូលរួមចំណែកធ្វើឱ្យសង្គមកម្ពុជាកាន់តែមានភាពប្រសើរឡើង។ ខ្ញុំសូមថ្លែងអំណរគុណយ៉ាងជ្រាលជ្រៅចំពោះក្រសួងវប្បធម៌ និងវិចិត្រសិល្បៈ និងក្រសួងបរិស្ថាន ដែលបានគាំទ្រគម្រោងនេះក៏ដូចជាគាំទ្របេសកកម្មការងារ របស់មជ្ឈមណ្ឌលបុប្ផាណា តាំងពីដើមរៀងមក»។
ជាពិសេស ទៀតនោះលោកបានអរគុណទៅដល់តួអង្គនៅក្នុងភាពយន្តឯកសារខ្លីទាំង ៥ រឿង ប្រជាពលរដ្ឋ អាជ្ញាធរ ស្រុកបុរីអូរស្វាយសែនជ័យ អាជ្ញាធរឃុំកោះស្នែង អាជ្ញាធរឃុំព្រះរំកិល គណៈកម្មការនេសាទសហគមន៍កោះខឌិន សហគមន៍នេសាទកោះស្នែង សហគមន៍ព្រៃឈើកោះកី សហគមន៍អេកូទេសចរណ៍សម្រស់កោះហាន សហគមន៍នេសាទភូមិឈើទាលតូច មន្ទីរបរិស្ថានខេត្តស្ទឹងត្រែង និងរដ្ឋបាលខេត្តស្ទឹងត្រែង ដែលបានសហការ និងសម្របសម្រួលដល់សិក្ខាកាម និងក្រុមការងារនៃគម្រោង ក្នុងការផលិតភាពយន្តឯកសារខ្លីទាំង ៥ នេះ ដោយជោគជ័យ ៕
