លោកព្រឹទ្ធាចារ្យ គង់ ណៃ និងលោក វណ្ណដា ដែលផលិតកម្មបារមីផ្សព្វផ្សាយលើ YouTube។ រូបថត Baramey Production
ភ្នំពេញៈ បទចម្រៀងប្រភេទអូរីជីណលខ្មែរថ្មីបែបសហសម័យមានចំណងជើងថា «Time to Rise» របស់ផលិតកម្មបារមី (Baramey) ដែលបកស្រាយរួមគ្នារវាងព្រឹទ្ធាចារ្យកោសល្យវោហារ ចាប៉ីដងវែងលោកតា គង់ ណៃ និងតារាចម្រៀងរ៉េបប្រុសលោក វណ្ណដា ទទួលបានការគាំទ្រយ៉ាងខ្លាំងពីប្រិយមិត្តអ្នកស្តាប់នៅក្នុងបណ្តាញសង្គមយូធូប ដោយមានចំនួនរហូតដល់ទៅ ១០០ លានដង (100 M views)។ នេះបើតាមការបញ្ជាក់ពីកញ្ញា ម៉ម ឡូរ៉ា ដែលជាចាងហ្វាងផលិតកម្មបារមីកាលពីថ្ងៃទី ២៥ ខែតុលា ឆ្នាំ ២០២២ តាមរយៈហ្វេសប៊ុកផ្ទាល់ខ្លួន។
បទចម្រៀង «Time to Rise»ជាសំនៀងដើមរួមគ្នារវាងអ្នកច្រៀងចាប៉ីដងវែងជើងចាស់ និងជាម្ចាស់ពានរង្វាន់សិល្ប:វប្បធម៌ហ្វូកុអូកានៃប្រទេសជប៉ុនឆ្នាំ ២០១៧ លោកតា គង់ណៃ ជាមួយតារារ៉េបវ័យក្មេងលោក វណ្ណដា ដែលផ្ដិតយកទិដ្ឋភាពដ៏ស្រស់ស្អាតនៅក្នុងសារមន្ទីរជាតិ ដែលមានការគាំទ្រតាំងពីចេញដំបូងមកនេះ ត្រូវបានបង្ហោះនៅលើបណ្ដាញសង្គម YouTube នៅយប់ថ្ងៃទី ២៨ ខែមីនា ឆ្នាំ ២០២១ បានទទួលការទស្សនាជាង ១ លានដងក្នុងរយៈពេលក្រោម ២៤ ម៉ោង។
បើគិតមកទល់ថ្ងៃទី ២៥ ខែតុលា ឆ្នាំ ២០២២ បទ«Time to Rise» ស្រូបបានប្រិយមិត្តចូលចិត្ត និងស្រឡាញ់ទាញយកទៅស្តាប់ និងទស្សនាបានចំនួន ១០០ លានដង ដែលធ្វើឱ្យក្រុមអ្នកផលិត និងតារាចម្រៀងផ្ទាល់មានក្តីរំភើបក្រៃលែង។
កញ្ញា ម៉ម ឡូរ៉ា ចាងហ្វាងផលិតកម្មបារមីឱ្យដឹងថា៖ «នាងខ្ញុំសូមអរគុណចំពោះការជឿជាក់លើពួកយើងទាំងអស់គ្នានៅបារមី!ពួកយើងស្រឡាញ់អ្នកទាំងអស់គ្នា! ខ្ញុំពិតជាមានមោទកភាពខ្លាំងណាស់សម្រាប់ក្រុមការងារBaramey ទាំងមូល ហើយជាពិសេសសប្បាយចិត្តសម្រាប់ វណ្ណដា និងលោកព្រឹទ្ធាចារ្យ គង់ ណៃ។ ១០០ លាន Views Verified! ពិតជានិយាយលែងចេញហ្មង!»។
ឯម្ចាស់បទតារាប្រុសមាឌល្អិត វណ្ណដា ក៏បង្ហាញអារម្មណ៍រីករាយដែរថា៖ «ជាដំបូងបំផុតនោះ គឺខ្ញុំសូមអរគុណទៅកាន់ព្រឹទ្ធាចារ្យ គង់ ណៃ សម្រាប់ការចូលរួមជាវត្តមានដ៏ខ្ពង់ខ្ពស់របស់គាត់នៅក្នុងបទចម្រៀង «Time to Rise»។អរគុណទៅកាន់អ្នកគាំទ្រទាំងក្នុង និងក្រៅប្រទេស ជាពិសេសសម្រាប់ការគាំទ្រកន្លងមក។
បទ «Time to Rise» អាចនិយាយបានថា ជាបទចម្រៀងមួយដែលប្រៀបដូចជាកញ្ចក់ឆ្លុះបញ្ចាំងពីការអភិរក្ស និងអភិវឌ្ឍលើកតម្កើងមរតកជាតិដែលអាចធ្វើឱ្យប្រជាជនក្នុង និងក្រៅប្រទេសជាច្រើនលើសកលលោកបានស្គាល់ពីសិល្បៈខ្មែរដោយទទួលបានការគោរព ការសាទរ ក្តីស្រឡាញ់ និងទទួលស្គាល់វិស័យសិល្បៈនៅកម្ពុជា។ អរគុណក្រុមការងារទាំងអស់ដែលចូលរួមធ្វើឱ្យ Project នេះកើតមានឡើង។ នេះជាកំណត់ត្រាថ្មីមួយទៀតសម្រាប់ទំព័រចុងឆ្នាំនេះ អបអរ ១០០ លានទស្សនារបស់ «Time to Rise»។
ទោះជាយ៉ាងណា ទម្រាំមានការគាំទ្រខ្លាំងបែបនេះ ក្រុមការងារផលិតកម្មបារមី និងតារាចម្រៀងក៏ទទួលរងភាពបរាជ័យជាច្រើនលើកផងដែរ ក្នុងការខិតខំផលិតបទចម្រៀងប្រភេទអូរីជីណលបែបខ្មែរសម័យទំនើបនេះ។ នេះបើតាមការបញ្ជាក់ពី កញ្ញា ម៉ម ឡូរ៉ា ។
កញ្ញា ម៉ម ឡូរ៉ា បានរំឭកថា៖«គេបានប្រាប់ខ្ញុំថា ការធ្វើបទ Original គឺមិនអាចទៅរួចទេ។ ខ្ញុំចាំបានផងដែរនូវកិច្ចសន្ទនាមួយជាមួយលោក ArnChorn-Pond ដែលគាត់បាននិយាយថា អាជីវកម្មខ្លះមិនឱ្យតម្លៃសិល្បៈប្រពៃណីរបស់យើង ហើយគិតថា សិល្បៈនេះតូចទាបគួរឱ្យខ្មាសគេណាស់។ ជាមួយពាក្យទាំងនោះ គាត់បានជំរុញខ្ញុំឱ្យធ្វើអ្វីមួយអំពីវា! ពេលខ្ញុំពិចារណា ពីការចងចាំនេះ ខ្ញុំដឹងថាមានមនុស្សមួយចំនួន មិនមានអារម្មណ៍សប្បាយចិត្តនឹងគំនិតនៃភាពអស្ចារ្យរបស់ខ្មែរនោះទេ។ ឥឡូវនេះខ្ញុំយល់ហើយថា ហេតុអ្វីបានជាវាគួរឱ្យខ្លាចសម្រាប់ពួកគេ»។
តារាចម្រៀង អ្នកនិពន្ធ និងតន្ត្រីករ កូនកាត់ខ្មែរ-អាមេរិក កញ្ញា ម៉ម ឡូរ៉ា បានបន្តថា៖«នេះគឺដោយសារតែការបរាជ័យគឺកើតឡើងញឹកញាប់ពេក ហើយមនុស្សជាច្រើនប្រហែលជាមានអារម្មណ៍ថា យើងបានចាញ់គ្រប់គ្រាន់ហើយ។ ចាប់ពីថ្ងៃនេះតទៅ ខ្ញុំមានជំនឿចិត្តខ្លាំងជាងពេលមុនទៅទៀតថា នេះគឺគ្រាន់តែជាការចាប់ផ្ដើមតែប៉ុណ្ណោះ។ លោកព្រឹទ្ធាចារ្យ គង់ ណៃ និង វណ្ណដា បាននិយាយថា វាដល់ពេលហើយដែលយើងក្រោកឡើងគឺដល់ពេល «Time to Rise»! ប្រជាជនយើងក៏បានយល់ដែរគឺយល់ព្រមដល់ទៅ ១០០ លានដង! តោះកម្ពុជា ក្រោកឡើងវិញ!»៕
