កាដូក្រមាដែលម្ចាស់ដើមការរៀបចំទុកជូនភ្ញៀវក្នុងថ្ងៃសិរីមង្គល។ រូបថត សហការី
ភ្នំពេញ: ជាមួយក្ដីស្រឡាញ់ និងចូលរួមចំណែកលើកស្ទួយបរិស្ថានតាមរយៈការកាត់បន្ថយការប្រើប្រាស់ប្លាស្ទិក កញ្ញា វួច ស៊ីវហាក់ ម្ចាស់ហាងលក់កាដូមង្គលការខ្មែរ ឬ (Cambodia Official Wedding Gift) បានសហការជាមួយសហគមន៍មូលដ្ឋានកែច្នៃបង្កើតកាដូសម្រាប់ពិធីអាពាហ៍ពិពាហ៍ទាំងឱកាសប្រើប្រាស់ក្នុងពិធីហែជំនូននិងការទទួលភ្ញៀវជប់លៀងពេលយប់។
ដោយផ្ដើមជំនួញអំឡុងពេលឆ្នាំ ២០១៧-១៨ កញ្ញាស៊ីវហាក់ បានឱ្យដឹងថា ពេលនោះមិនទាន់មានពលរដ្ឋខ្មែរនិយមដាក់ក្រមាជាកាដូថ្ងៃមង្គលការច្រើននៅឡើយ ហើយកញ្ញាក៏ជាបុគ្គលម្នាក់ដែលចូលរួមបំផុសការលក់ក្រមារបស់ប្រជាសហគមន៍ខ្មែរដោយមានគាំទ្រពីម្ចាស់ពិធីមង្គលការទៀតផង។
ម្ចាស់ហាងលក់ផលិតផលកាដូទាំងនៅផ្ទះនិងតាមអនឡាញរូបនេះបានប្រាប់ ភ្នំពេញ ប៉ុស្ដិ៍ថា៖ «ផលិតផលទាំងអស់សុទ្ធតែជារបស់ខ្មែរយើងទាំងអស់ដែលខ្ញុំប្រមូលទិញផលិតផលសិប្បកម្មសហគមន៍ជាច្រើនកន្លែងនៅក្នុងប្រទេសជាក់ស្ដែងស្មុគស្លឹកត្នោតនិងស្មុគឫស្សី យើងយកមកពីខេត្ដសៀមរាប»។
កញ្ញាបន្ដថា៖ «ខ្ញុំផ្ដោតសំខាន់លើផលិតផលក្រមាដែលអាចច្នៃចេញជាបន្ដោងសោហើយស្មុគស្លឹកត្នោត និងស្មុគឫស្សី យើងសម្រាប់ដាក់ផ្លែក្រូចជូនភ្ញៀវអំឡុងពេលហែជំនូនព្រឹកព្រលឹម។ កាលពីមុនយើងធ្លាប់ឃើញគេប្រើជាអាំងហាវ និងថង់ចិនខ្ចប់ស្ករគ្រាប់»។
នៅពេលមានងារជាកញ្ញាមុនចូលរោងការនៅចុងឆ្នាំ ២០១៩ មុនរោគរាតត្បាតកូវីដបានវាយប្រហារពិភពលោកតែបន្ដិចអតីតនិស្សិតផ្នែកទេសចរណ៍ អ្នកស្រី វង្ស បញ្ចះស្រីល័ក្ខ បានស្វែងរកហាងលក់ផលិតផលខ្មែរចេញពីសហគមន៍ខ្មែរសម្រាប់ជាកាដូជូនភ្ញៀវទាំងនៅពេលហែជំនូន និងទទួលភ្ញៀវក្នុងឱកាសជប់លៀងនាពេលរាត្រី។
អ្នកស្រី បញ្ចះស្រីល័ក្ខ បានប្រាប់ ភ្នំពេញ ប៉ុស្ដិ៍ថា៖ «មានអ្នកលក់កាដូខ្មែរច្រើនដែរ តែគ្មានហាងណាអាចធ្វើតាមការកុម្ម៉ង់របស់ខ្ញុំឡើយ ពីព្រោះខ្ញុំមិនចង់ដាក់ក្រមាបង់កធម្មតាៗនោះទេ។ ខ្ញុំចង់កែច្នៃវាទៅជាកាបូបយួរដៃតូចល្មម»។
ពេលសួរហាងលក់កាដូមង្គលការខ្មែរ ម្ចាស់ហាងធានាថា អាចធ្វើតាមការបញ្ជាទិញ ដោយខិតខំចេញម៉ូដគំរូឱ្យអ្នកស្រីមើល មុនពេលសម្រេចចិត្ដកុម្ម៉ង់យករហូតដល់ជាង ១ ពាន់ឈុត ស្មុគរាប់រយរួមទាំងបន្ដោងសោរាប់រយបន្ថែមទៀត។
អ្នកស្រីបាននិយាយថា៖ «ខ្ញុំទិញស្មុគរចនាប័ទ្មជាកន្ដ្រកតូចសម្រាប់ផ្លែក្រូចជូនភ្ញៀវពេលហែជំនូនប្រមាណ ៩០ គូ ក្រមាច្នៃម៉ូដជាកាបូបយួរដៃជិត ១ ៥០០ ឈុត រួមទាំងបន្ដោងសម្រាប់សឺគួរ ២០០ ថែមទៀត។ ខ្ញុំបានកុម្ម៉ង់គាត់ ៥ ខែ មុនដោយឱ្យច្បាស់ថាផលិតផលទាំងអស់ត្រូវបានផលិតរួចរាល់មុនពេលថ្ងៃមង្គលការមកដល់»។
ចំពោះការផលិតបន្ដោងពីសាច់ក្រមាខ្មែរ ម្ចាស់ហាង ស៊ីវហាក់ បានឱ្យដឹងថា ចាប់ផ្ដើមពីកាត់តាមពុម្ព រួចដេរម្ដង ១ៗ ទៅតាមចំណង់ចំណូលចិត្តនៃការកុម្ម៉ង់របស់ភ្ញៀវ។
ស្ដ្រីវ័យ ៣០ ឆ្នាំ ស៊ីវហាក់ ដែលមិនប្រាប់អំពីប្រភពទទួលទិញវត្ថុសិប្បកម្មដោយសំអាងលើបញ្ហាប្រកួតប្រជែង អ្នកផ្គត់ផ្គង់បាននិយាយថា កញ្ញាទិញតែក្រមាពីសិប្បកម្មក្នុងស្រុកដែលមានក្រមាអំបោះឆៅ និងនីឡុង រួចឱ្យក្រុមការងារអង្គុយដេរខ្លួនឯង។ វាជាកាដូសម្រាប់ទទួលភ្ញៀវមកពិសាភោជនាហារពេលល្ងាច។
ថ្វីដ្បិតតែវាគ្រាន់តែជាកាដូជូនភ្ញៀវបន្ទាប់បន្សំយ៉ាងណាក៏ដោយក៏អ្នកលក់កាដូរូបនេះបានផ្ដល់តម្លៃសំខាន់លើផលិតផលក្រមាខ្មែរសុទ្ធដែលចេញពីសហគមន៍នានាទូទាំងប្រទេស។
ដោយអះអាងថា កុម្ម៉ង់ទិញក្រមាពីសិប្បកម្មតែមួយ កញ្ញា ស៊ីវហាក់ បានឱ្យដឹងថា សិប្បកម្មក្រមាអាចផ្គត់ផ្គង់ទាន់តម្រូវការរបស់កញ្ញា ដោយគ្រាន់តែចំណាយពេលពី ៥ ទៅ ១០ ថ្ងៃ កាដូក្រមាក្នុងពិធីអាពាហ៍ពិពាហ៍ត្រូវបានវេចខ្ចប់រួចជាស្រេច។
ស្មុគស្លឹកត្នោតមានតម្លៃខ្ពស់បន្ដិច ដោយសារទាំងវត្ថុធាតុដើមដែលប្រើបណ្ដូលស្លឹកត្នោតនិងនីតិវិធីធ្វើក៏ទាមទារពេលវេលាយូរនោះ ដូច្នេះចំពោះភ្ញៀវដែលត្រូវការប្រើស្មុគជាកាដូជំនូនពេលព្រឹកពី ១០០ ទៅ ៣០០ ត្រូវកុម្ម៉ង់មុនយ៉ាងលឿនណាស់ក៏ ២ ខែមុនដែរ។
កញ្ញាម្ចាស់ហាង ដែលមិនទាន់បានចូលរោងផ្ទឹមខ្លួនឯងរូបនេះបានឱ្យដឹងថា៖ «ចំពោះតម្បាញស្មុគនេះមានទាំងជនពិការអង្គុយចាក់ត្បាញឱ្យយើង ហើយយើងផ្ដល់ជូនពួកគាត់វិញនូវកម្រៃមួយដ៏សមរម្យ»។
ដោយមិនពាក់ព័ន្ធនឹងការផ្គត់ផ្គង់ស្មុគឱ្យកញ្ញា ស៊ីវហាក់ អ្នកស្រីសូត ធូរ ជាអ្នកចាក់ស្មុគមានបទពិសោធជិត ២០ ឆ្នាំបានឱ្យដឹងថា អ្នកស្រីជាអ្នកចាក់ស្មុគជូនភ្ញៀវដែលកុម្ម៉ង់នៅភ្នំពេញរហូតដល់រាប់ពាន់ស្មុគក្នុង ១ ថ្ងៃ ដោយអ្នកស្រីសហការជាមួយក្រុមស្ដ្រីជាច្រើនភូមិ។
អ្នកស្រី ធូរ ដែលល្បីខាងលក់នំអាកោត្នោតនៅព្រះដាក់បានប្រាប់ ភ្នំពេញ ប៉ុស្ដិ៍ថា៖ «នៅមុនកូវីដយើងអាចទទួលការកុម្ម៉ង់ច្រើនបំផុតរហូតដល់ ៣ ០០០ ស្មុគ ជាស្មុគផលិតពីស្លឹកត្នោត។ កាលពេលនោះយើងទទួលការកុម្ម៉ង់ ១ ថ្ងៃ ពី ១ ០០០ ទៅ ២ ០០០ ស្មុគ ប៉ុន្ដែសព្វថ្ងៃខ្ញុំ និងក្រុមស្ដ្រី ៨ ភូមិនៃស្រុកបន្ទាយស្រី ចាប់ផ្ដើមទទួលការកុម្ម៉ង់ជាង ១ ០០០ ស្មុគហើយ»។
កាលពីមុនកូវីដ ម្ចាស់ហាងលក់កាដូមង្គលការខ្មែរទទួលការកុម្ម៉ង់កាដូ ១ រោងមានក្រមាពីជាង ១ ពាន់ទៅ ២ ពាន់ សម្រាប់ពិធីជប់លៀងទទួលភ្ញៀវចូលរួមរហូតដល់រាប់រយតុ។
យ៉ាងណាមិញកញ្ញា ស៊ីវហាក់ ទទួលស្គាល់ថា អំឡុងសម័យបិទខ្ទប់រយៈពេល ២ ឆ្នាំនេះកាដូមង្គលការត្រូវបានបិទជិតឈឹងដោយមិនមានការកុម្ម៉ង់អ្វីទាល់តែសោះ។
ស្ដ្រីសហគ្រិនដែលចេះបត់បែនរូបនេះ បានអះអាងថា៖ «អំឡុងពេលវិបត្ដិកូវីដ ១៩ យើងងាកពីការកុម្ម៉ង់ផលិតផលសហគមន៍មកផលិតជាម៉ាស់ ដូចជាម៉ាស់ក្រមា ម៉ាស់ក្រណាត់និងមួកក្រមាវិញ។
ប៉ុន្ដែក្រោយពេលកូវីដបានធូរស្រាល ម្ចាស់ហាងលក់ផលិតផលសិប្បកម្មខ្មែររូបនេះបានអះអាងថា យ៉ាងច្រើនបំផុត កញ្ញាទទួលការកុម្ម៉ង់ត្រឹម ១ ៣០០ ក្រមាក្នុង ១ រោង ខណៈរោងការខ្លះកុម្ម៉ង់ត្រឹម ៣០០ ឬ ៥០០ ក្រមាប៉ុណ្ណោះ។
លើសពីនេះទៀតដោយសារតែចិត្ដស្រឡាញ់សម្ភារប្រើប្រាស់កែច្នៃពីផលិតផលធម្មជាតិម្ចាស់ហាងលក់កាដូមង្គលការខ្មែរក៏មិនប្រើប្រាស់សម្ភារប្លាស្ទិកទាំងសម្រាប់ការវេចខ្ចប់ និងវត្ថុកាដូនោះទេ។
កញ្ញា ស៊ីវហាក់ បាននិយាយថា៖ «យើងព្យាយាមប្រើប្រាស់ផលិតផលមិនមែនប្លាស្ទិកដែលអាចចូលរួមចំណែកមិនធ្វើឱ្យប៉ះពាល់បរិស្ថាន។ កាដូស្មុគនេះ ភ្ញៀវអាចយកទៅទុកប្រើសម្រាប់ដាក់អ្វីផ្សេងៗទៀតដែលខុសពីថង់ប្លាស្ទិក ឬក្រដាសត្រូវបានបោះចោលពេលភ្ញៀវហែកយកវត្ថុខាងក្នុង»។
កញ្ញាបញ្ជាក់ថា៖ «គោលបំណងចម្បងរបស់យើងផ្ដោតលើបញ្ហាបរិស្ថានគួបផ្សំនឹងការស្រឡាញ់ចូលចិត្ដ និងលើកស្ទួយផលិតផលខ្មែរ ដែលជួយលើការផ្សព្វផ្សាយផង និងផ្ដល់ការងារដល់សហគមន៍ផងដែរ»។
ចំពោះការលើកស្ទួយបរិស្ថាន និងជួយសង្គមនេះមានការគាំទ្រពីបងប្អូនខ្មែរ ដែលការបើករដូវមង្គលការនេះមានអតិថិជនចាប់ផ្ដើមកក់កាដូទុកមុនជាហូរហែដោយភ្ញៀវខ្លះបានលក់មុនរយៈពេលកន្លះឆ្នាំទៅ ១ ឆ្នាំឯណោះ។
លោក នេត្រ ភក្ដ្រា រដ្ឋលេខាធិការ និងជាអ្នកនាំពាក្យក្រសួងបរិស្ថានតែងតែថ្លែងលើកទឹកចិត្ដដល់ក្រុមហ៊ុន និងសិប្បកម្មដែលកែច្នៃផលិតផលមិនមែនប្លាស្ទិក ឬវត្ថុធាតុដើមធម្មជាតិដែលហៅថា ជីវប្លាស្ទិកជាសម្ភារប្រើប្រាស់។លោកបានឱ្យដឹងថា ការប្រើប្រាស់របស់របរទាំងនេះ គឺធ្វើឱ្យប្រជាពលរដ្ឋជាអ្នកប្រើប្រាស់មានសុខភាពល្អ និងមានផាសុកភាព។
អ្នកនាំពាក្យក្រសួងបរិស្ថានរូបនេះ បាននិយាយថា៖ «ប្រជាពលរដ្ឋមានការយល់ដឹងច្រើនអំពីផលលំបាកចំពោះបរិស្ថានចំពោះការប្រើប្រាស់ផលិតផលប្លាស្ទិក និងបានផ្លាស់ប្ដូរឥរិយាបថចំពោះការកាត់បន្ថយការប្រើប្រាស់ប្លាស្ទិក»។
ក្រោយពេលរាជរដ្ឋាភិបាលបើកប្រទេស និងបើកឱ្យមានពិធីមង្គលការឡើងវិញបណ្ដើរៗដំបូងៗ នៅតាមរោងការនីមួយៗត្រូវបានគេសង្កេតឃើញថា កូនកំលោះកូនក្រមុំ រមែងហុចដបអាកុលជូនភ្ញៀវសម្រាប់បាញ់សម្លាប់មេរោគប៉ុន្ដែក្រោយកូវីដ ១៩ កាន់តែធូរស្រាលខ្លាំង បច្ចុប្បន្ននេះប្រជាពលរដ្ឋនិយមប្រើប្រាស់ក្រមាជាកាដូជូនភ្ញៀវឡើងវិញ។
ម្ចាស់ហាងហាងលក់កាដូមង្គលការខ្មែរបានលើកឡើងថា៖ «រឿងអ្វីពួកគាត់មិនចូលចិត្ដកាដូខ្មែរយើង បើរៀបចំស្អាតឡើងភ្លឹងៗ ដូចជាការយកក្រដាសកងមកខ្ចប់ក្រមាជាដើម»។
កញ្ញាបន្ដថា៖ «ការវេចខ្ចប់ក៏ជាកត្ដាសំខាន់ផងដែរដោយកន្លងមកយើងបត់ក្រមាឱ្យស្អាតរួចចងកៅស៊ូវាធ្វើឱ្យសាច់ក្រមាទក់ ពេលភ្ញៀវលាវាឡើង។ដូច្នេះយើងត្រូវគិតអំពីបញ្ហានេះ ដោយប្ដូរជាស៊កជាមួយក្រដាសកងវិញ»។
ចំពោះតម្លៃបន្ដោងសោក្រមា ១ ត្រឹមតែ ០,៣៨ ដុល្លារ ដោយ ១០០ បន្ដោងមានតម្លៃ ៣៨ ដុល្លារប៉ុណ្ណោះ បើភ្ញៀវអត់ត្រូវការការវេចខ្ចប់។ ក្រមាមានតម្លៃចាប់ពី ០,៥០ ដុល្លារឡើងទៅ ហើយស្មុគអាស្រ័យលើចំនួននៃការកុម្ម៉ង់ដែលមានតម្លៃចាប់ពី ១,៨០ ដុល្លារឡើង៕
