រូបភាពចុងភៅឆ្នើមលោក លូ ម៉េង។ រូប Luu Meng
ជាចុងភៅឆ្នើម ជនជាតិខ្មែរ ដ៏ល្បីល្បាញមួយរូបដែលបានពុះពារឧបសគ្គមកជាង ៣០ឆ្នាំ ក្នុងវិស័យម្ហូបអាហារទាំងក្នុងស្រុក និងក្រៅស្រុក លោក លូ ម៉េង មានទីកំណើតនៅរាជធានី ភ្នំពេញ។ ក្រោយបញ្ចប់មធ្យមសិក្សាទុតិយភូមិ លោកបានបន្តការសិក្សាជំនាញ Tourism Hospitality management នៅទីក្រុងបាងកកព្រះរាជា ណាចក្រថៃ រួចបន្តការសិក្សានៅប្រទេសម៉ាឡេស៊ី ដោយលោកចាប់ជំនាញជាចុងភៅ។ លោក មានបងប្អូនចំនួន ៣នាក់ លោកជាកូនច្បងក្នុងគ្រួសារ។
ក្រោយបញ្ចប់ការសិក្សាក្នុងឆ្នាំ១៩៩២ លោកបានវិលត្រឡប់ មកប្រទេសកម្ពុជា វិញ និងបានផ្ដើមការងារដំបូងរបស់លោកជាចុងភៅ។ លោកបានឱ្យដឹងថា៖ «ខ្ញុំចាប់ផ្ដើមការងារជាចុងភៅពីថ្នាក់ក្រោមបំផុតរហូតដល់ថ្នាក់លើ»។
លោកបានធ្វើដំណើរតាមបណ្ដាតំបន់ជាច្រើនក្នុងប្រទេសកម្ពុជា ដើម្បីរិះរករូបមន្តធ្វើម្ហូបរបស់ប្រជាជនខ្មែរយកមកចងក្រងជាសៀវភៅក្នុងបំណងថែរក្សា រសជាតិ និងកេរដំណែលម្ហូបអាហារខ្មែរដ៏សម្បូរបែប។ លោកក៏បានលើកកម្ពស់វិស័យ ម្រេចកំពតទៅកាន់ទីផ្សារអន្តរជាតិឱ្យកាន់តែមានការទទួលស្គាល់ និងការប្រើប្រាស់ជុំវិញពិភពលោកដែលបានជួយទៅដល់កសិករកម្ពុជាជាច្រើនស្រទាប់។
មកទល់ពេលនេះ លោកបានក្លាយជាម្ចាស់ក្រុមហ៊ុនម្ហូបអាហារ និងភេសជ្ជៈដ៏ធំមួយនៅប្រទេសកម្ពុជា ហើយលោកដើរតួយ៉ាងសំខាន់ក្នុងវិស័យម្ហូបអាហារនេះ។ ហើយសម្រាប់ឆ្នាំ ២០២២ នេះ លោកក៏ត្រូវបានជ្រើសរើសជា «បុគ្គលល្អឯក» ដែលរៀបចំដោយក្រុមហ៊ុនស្រាបៀរ ABC ផងដែរ។
ទាក់ទិននឹងជំនាញជាចុងភៅនេះ លោក លូម៉េង មានប្រសាសន៍ឱ្យដឹងបន្តថា៖ «កាលនោះខ្ញុំរៀនខាងគ្រប់គ្រងសណ្ឋាគារ និងបដិសណ្ឋារកិច្ចពិតមែន ប៉ុន្តែវិស័យនេះមានច្រើនផ្នែក ហើយខ្ញុំចាប់យកជំនាញជាចុងភៅ ព្រោះខ្ញុំចូលចិត្តជំនាញនេះ»។
សូមបញ្ជាក់ថា បច្ចុប្បន្នលោក លូ ម៉េង ជា CEO ក្នុងក្រុមហ៊ុនមួយ AlMOND HOTEL ជាអ្នកដឹកនាំមួយរូបក្នុងក្រុមហ៊ុន THALIAS ហើយក៏ជាចុងភៅជំនាញនៅក្នុង Restaurants Almond Hotel នោះផងដែរ។ ក្រៅពីនេះ លោកបានចូលរួមចងក្រងសៀវភៅម្ហូបអាហារបាន២ ចំណងជើងរួចមកហើយ ហើយឆ្នាំ២០២៣ នេះ លោកនឹងចងក្រងសៀវភៅម្ហូបអាហារភាគ ៣ បន្ថែមទៀត។
លោកបានផ្ដល់អនុសាសន៍ដូច្នេះថា៖ «យុវជននៅក្មេងដែលស្រឡាញ់អាជីពដូចខ្ញុំដែរ សូមយកចិត្តទុកដាក់ ស្រឡាញ់វប្បធម៌ដែលយើងមាន។ ដូចខ្ញុំនេះ ខ្ញុំនៅតែបន្តទៅមុខតៗទៀត ព្រោះការងារនេះវាសំខាន់ខ្លាំងណាស់ ព្រោះមួយថ្ងៃយើងហូបបីពេល ទាំងភ្ញៀវ ទាំងមិត្តភក្ដិ ទាំងអ្នកតូច ទាំងអ្នកធំ ទាំងមនុស្សទូទៅក៏ដោយ សុទ្ធតែត្រូវការហូបបីពេល។
ម្ហូបអាហារជាកត្តាចម្បងសម្រាប់ការរស់នៅប្រចាំថ្ងៃ បើយើងស្រឡាញ់អាជីពហ្នឹង យើងកាន់វាឱ្យមាំ ហើយធ្វើឱ្យឆ្ងាញ់ នោះអ្នកដែលពិបាកចិត្តក៏ត្រូវការយើង អ្នកសប្បាយចិត្តក៏ត្រូវការយើង ហើយម្ហូបអាហារធ្វើឱ្យមនុស្សសប្បាយរីករាយទាំងអស់គ្នា»។
លោកបានសង្កត់បន្ថែមថា៖«អាជីពនេះពិតជាសំខាន់ មិនថាស្ថិតក្នុងពេលណាទេ មានកូវីដ មិនមានកូវីដក៏ដោយ ក៏មានអ្នកត្រូវការអ្នកជំនាញខាងនេះដែរ»៕
