យុវជននៅក្នុងពិព័រណ៍សៀវភៅ Big Bad Wolf Books កាលពីថ្ងៃ ២២ ខែកុម្ភៈ។ ហេង ជីវ័ន
ភ្នំពេញ: ចាប់ពីថ្ងៃបើកទ្វារពិព័រណ៍ និងលក់សៀវភៅក្នុងព្រឹត្ដិការណ៍ Big Bad Wolf Books កាលពីថ្ងៃទី ២២ ខែកុម្ភៈ និងគ្រោងបិទបញ្ចប់នៅថ្ងៃទី ១២ ខែមីនា ខាងមុខ នៅផ្សារទំនើបអូឡាំព្យា ជាន់ផ្ទាល់ដី សៀវភៅប្រមាណ ៣០ ភាគរយត្រូវបានលក់ចេញក្នុងចំណោមសៀវភៅកន្លះលានក្បាល។
អ្នកស្រី Geetha Nair ប្រធានផ្នែក PR នៃក្រុមហ៊ុន Big Bad Wolf Books បានប្រាប់ ភ្នំពេញ ប៉ុស្ដិ៍ កាលពីយប់ថ្ងៃទី ២ ខែមីនានេះថា៖ «យើងបានលក់សៀវភៅអស់ប្រមាណ ៣០ ភាគរយ ហើយសៀវភៅដែលពេញនិយមជាងគេ គឺសៀវភៅកុមារ»។
អ្នកស្រីបាននិយាយថា នៅរយៈពេលប្រមាណ ១០ ថ្ងៃ ទៀតនេះ Big Bad Wolf Books អាចលក់សៀវភៅបានជាង ៥០ ភាគរយ។អ្នកស្រី Nair បានបន្ដថា៖ «យើងត្រូវបង្កើនការលក់ ដែលមិនបានធ្វើរយៈពេល ២ ឆ្នាំមកហើយ។ ដូច្នេះ យើងរំពឹងថា ចុងសប្ដាហ៍នេះ និងមួយសប្ដាហ៍ទៀត ការលក់នឹងកើនឡើងខ្លាំង»។
គួរបញ្ជាក់ថា លោក ខៀវ កាញ៉ារីទ្ធ រដ្ឋមន្ត្រីក្រសួងព័ត៌មាន បានថ្លែងនៅថ្ងៃបើកសម្ពោធពិព័រណ៍សៀវភៅនោះថា ជាមួយសៀវភៅកន្លះលានក្បាលសម្រាប់ឆ្នាំនេះ លោកគិតថា ចំនួនលក់អស់យ៉ាងតិច ៣០ ម៉ឺនក្បាល។
លោកបានបញ្ជាក់ថា អ្នកខ្លះគិតថា លក់សៀវភៅថោក សុទ្ធតែជាសៀវភៅចាស់ៗ វាមិនមែនអ៊ីចឹងទេ វាជាសៀវភៅថ្លៃ ល្អ និងថោក។ ជាក់ស្ដែង សៀវភៅខ្លះតម្លៃ ៨០ ទៅ ១០០ ដុល្លារ Big Bad Wolf Books លក់តែ ៣០ ដុល្លារ ២០ ដុល្លារ ឬ ១៥ ដុល្លារ។ អ៊ីចឹង គួរតែទិញ៕
