តួសម្តែងក្នុងឈុត១នៃល្ខោនគំនិត។ រូបថត សហការី
បាត់ដំបងៈ អង្គការល្ខោនគំនិត (LKO) មានមូលដ្ឋាននៅទីក្រុងបាត់ដំបងបង្កើតភាពកក្រើកក្នុងពិភពល្ខោនព្រោះវាជួយការពារ និងអភិវឌ្ឍល្ខោនខោលជាទម្រង់ល្ខោនបុរាណខ្មែរ។
អង្គការល្ខោនគំនិត មានបេសកកម្មលើសពីក្រុមល្ខោនដែលចលករអភិវឌ្ឍន៍សហគមន៍របស់ខ្លួនតាមរយៈការប្រើល្ខោនជាឧបករណ៍សម្រាប់ការផ្លាស់ប្តូរសង្គម។
លោកឈិតចាន់ភីរ៉ាក់ ស្ថាបនិកនិងជានាយកអង្គការល្ខោនគំនិត បាននិយាយថា៖«ការទស្សនាកម្មវិធីអង្គការតែងតែផ្ដល់ការយល់ដឹងថ្មីៗ និងស៊ីជម្រៅអំពីបុគ្គលក្រុមឬបញ្ហាហើយជាមួយនឹងគំនិតមួយចំនួនអំពីសកម្មភាពដែលពួកគេអាចធ្វើដោយខ្លួនឯងដើម្បីកែលម្អស្ថានភាព»។
អង្គការដែលបានហៅខ្លួនថា ក្រុមល្ខោនមូលដ្ឋានមានគោលដៅផ្ដល់សំឡេងដល់អ្នកដែលមិនធ្លាប់ត្រូវបានគេស្ដាប់ឮក្នុងការអភិវឌ្ឍល្ខោននិយាយភាសាខ្មែរ។ពាក្យ «ល្ខោនគំនិត» ដែលអង្គការប្រើប្រាស់ឈ្មោះនេះដើម្បីលើកទឹកចិត្តមនុស្សឱ្យចូលរួមក្នុងការគិតស៊ីជម្រៅ។
លោកចាន់ភីរ៉ាក់ បានឱ្យដឹងថា៖«ទស្សនិកជនរបស់យើងមិនដែលនៅស្ងៀមទេព្រោះភាពពិសេសរបស់យើងគឺយើងបង្កើតកម្មវិធីការសម្ដែងបែបវេទិការួម ដែលយើងអញ្ជើញទស្សនិកជនចូលរួមជាមួយការសម្តែងលើឆាកដោយជំនួសតួសម្តែងហើយព្យាយាមផ្លាស់ប្តូរលទ្ធផលសាច់រឿង»។
លោកបានបន្ដថាវិធីសាស្ត្រនេះផ្តល់សិទ្ធិអំណាចដល់មនុស្សឱ្យធ្វើការរួមគ្នាយ៉ាងសកម្មក្នុងការដោះស្រាយបញ្ហាបង្កើនសំឡេងរបស់ពួកគេនិងអភិវឌ្ឍជំនាញការគិតប្រកបដោយការត្រិះរិះពិចារណា។
លោកចាន់ភីរ៉ាក់ បាននិយាយថា អង្គការល្ខោនគំនិតចែករំលែកចំណេះដឹងតាមរយៈការសម្តែងដើម្បីផ្សព្វផ្សាយល្ខោននិយាយដែលកំពុងប្រឈមនឹងការបាត់ខ្លួនដោយសារកង្វះខាតក្រុមល្ខោនអាជីពទូទាំងប្រទេសដែលបច្ចុប្បន្នមានតែ ៣ក្រុមប៉ុណ្ណោះកំពុងដំណើរការ។
សមាជិកក្រុមរបស់អង្គការល្ខោនគំនិតមានទស្សនៈវិជ្ជមានចំពោះសិល្បៈល្ខោនបើទោះបីជាមានប្រវត្តិលំបាកក៏ដោយ។លោកចាន់ភីរ៉ាក់ បានរំឭកថា៖ «ក្នុងនាមជាក្រុមសិល្បករល្ខោនក្រៅប្រព័ន្ធដែលសុទ្ធតែជាមិត្តភក្តិយើងបានចាប់ផ្ដើមដំណើរការគម្រោងជាមួយស្ត្រីដែលប្រឈមនឹងអំពើហិង្សាក្នុងឆ្នាំ២០១៧។ការងាររបស់យើងបានទាក់ទាញចំណាប់អារម្មណ៍ពីម្ចាស់ជំនួយដែលផ្តល់ការគាំទ្រដល់ពួកយើងដើម្បីរៀបចំជាផ្លូវការ។ជាលទ្ធផលយើងអាចចុះឈ្មោះជាអង្គការក្រៅរដ្ឋាភិបាលក្នុងស្រុកនៅឆ្នាំ២០១៩»។
គោលបំណងរបស់អង្គការគឺដើម្បីបញ្ចូលសំឡេងដែលមិនធ្លាប់ឮទៅក្នុងរាល់ការសម្តែងល្ខោននៅកម្ពុជានិងបង្កើតឱកាសបន្ថែមទៀតសម្រាប់ការផលិតការសម្តែងនិងការចូលរួមល្ខោនដែលបង្ហាញពីរឿងរ៉ាវផ្ទាល់ខ្លួនផ្សេងៗ។
សហស្ថាបនិកអង្គការបានបន្ដថា៖ «ការសម្ដែងរបស់យើងទាំងអស់ចាប់ផ្តើមពីបញ្ហាជីវិតពិតដែលប្រជាជនកម្ពុជាកំពុងជួបប្រទះ មិនថាយើងកំពុងធ្វើការជាមួយអ្នកខ្វះខាតក្នុងការចែករំលែករឿងរបស់ពួកគេឬចាប់ដៃគូជាមួយអង្គការក្រៅរដ្ឋាភិបាលធំដើម្បីបង្កើតកម្មវិធីផ្អែកលើប្រធានបទនោះ»។
ស្ត្រី ១ក្រុមនៅខេត្តបាត់ដំបងបានសម្ដែងរឿង «យប់ស្ងាត់» ដែលផ្អែកលើបទពិសោធន៍ផ្ទាល់ខ្លួននៃអំពើហិង្សាក្នុងគ្រួសារ។ការសម្តែងនេះគឺជាផ្នែកមួយនៃយុទ្ធនាការប្រឆាំងនឹងអំពើហិង្សាផ្អែកលើយេនឌ័ររយៈពេល១៦ថ្ងៃដែលប្រព្រឹត្តទៅនៅថ្ងៃទី៦ខែធ្នូឆ្នាំ២០២២ដោយមានការចូលរួមពីសមាជិកសហគមន៍និងមន្ត្រីរដ្ឋាភិបាល។
លោកចាន់ភីរ៉ាក់ បានលើកឡើងថា៖«អំពើហិង្សាលើស្ត្រីនិងកុមារីគឺជាបញ្ហាប្រឈមត្រូវដោះស្រាយបន្ទាន់នៅក្នុងសហគមន៍របស់យើង។ដូច្នេះអង្គការល្ខោនគំនិតតែងតែធ្វើការជាមួយក្រុមគោលដៅនេះហើយយើងអនុវត្តជាប្រចាំនៅក្នុងព្រឹត្តិការណ៍នានាក្នុងអំឡុងពេលនៃយុទ្ធនាការ១៦ថ្ងៃ»។
អង្គការល្ខោនគំនិតបានសហការអង្គការដៃគូសម្រាប់ការអភិវឌ្ឍជនបទ (PRD) សម្រាប់ការសម្ដែងល្ខោនវេទិការឿង«ឡើងចុះ»ដែលផ្តោតលើការតស៊ូរបស់កសិករដំឡូងមី។
លោកនិយាយថា៖«ថ្មីៗនេះយើងបានផលិតរឿង «ឡើងចុះ»អំពីការដាំដំឡូងដោយសហការជាមួយ PRD និងសាកលវិទ្យាល័យ Melbourne ហើយកាលពីឆ្នាំមុនយើងក៏បានធ្វើការជាមួយ Samaritan''s Purse លើយុទ្ធនាការប្រឆាំងការជួញដូរមនុស្សផងដែរ»។
វាគួរឱ្យចាប់អារម្មណ៍ណាស់ដែលឃើញការរួមបញ្ចូលគ្នារវាងទម្រង់សិល្បៈសម្តែងនិងចំណេះដឹងកសិកម្ម ដើម្បីឆ្ពោះទៅរកគោលបំណងរួមក្នុងការជួយកសិករដំឡូងមីឱ្យជម្នះការលំបាករបស់ពួកគេ។
លោកចាន់ភីរ៉ាក់ បានឱ្យដឹងថាពួកគេជឿជាក់ថាល្ខោនមិនត្រឹមតែបង្កើតទំនុកចិត្តនិងការយល់ដឹងពីខ្លួនឯងសម្រាប់បុគ្គលប៉ុណ្ណោះទេប៉ុន្តែថែមទាំងជំរុញការពិភាក្សាជាវិជ្ជមាននិងគាំទ្រសហគមន៍ក្នុងការជម្នះឧបសគ្គ។
លោកបានប្រាប់ភ្នំពេញប៉ុស្តិ៍ថា៖ «នៅក្នុងគម្រោងមួយចំនួនយើងគាំទ្រសមាជិកសហគមន៍ឱ្យបង្កើតកម្មវិធីផ្ទាល់ខ្លួនដែលជួយបង្កើនសំឡេងរបស់ពួកគេដូចជារឿង «រាត្រីស្ងាត់»សម្ដែងដោយស្ត្រីប្រឈមនឹងអំពើហិង្សារឿង «ផ្លូវរបស់យើង»សម្ដែងដោយជនពិការនិងរឿង«ឈុតស»សម្ដែងដោយសមាជិកនៃសហគមន៍ LGBTQ+»។
អង្គការបន្ទាយស្រីតែងតែអញ្ជើញអង្គការល្ខោនគំនិតមកសម្តែងក្នុងព្រឹត្តិការណ៍យុទ្ធនាការ១៦ថ្ងៃដោយអង្គការបានសម្ដែងរឿង«ត្រីនាំសំណាង»នៅមជ្ឈមណ្ឌលក្រុងបាត់ដំបងក្នុងឆ្នាំ២០១៩និងរឿង«ចុងបញ្ចប់នៃក្តីស្រឡាញ់»នៅស្រុកបាណន់ក្នុងឆ្នាំ២០២១។
លោកចាន់ភីរ៉ាក់ បានបន្ថែមថាស្ត្រីដែលបានចូលរួមក្នុងកម្មវិធីរបស់អង្គការល្ខោនគំនិត ក៏អាចទទួលបានការគាំទ្ររួមទាំងការណែនាំផ្នែកច្បាប់និងការទទួលបានជម្រកសុវត្ថិភាពពីអង្គការបន្ទាយស្រីផងដែរ។
អង្គការល្ខោនគំនិតតែងតែធ្វើដំណើរពីបាត់ដំបងទៅកាន់គោលដៅនានាដូចជាសំឡូតប៉ៃលិននិងរតនគិរីហើយគ្រោងនឹងធ្វើទេសចរណ៍កាន់តែទូលំទូលាយនៅក្នុងប្រទេសកម្ពុជាចាប់ពីឆ្នាំ២០២៣។
អ្នកស្រីBonny Coombeសហស្ថាបនិកអង្គការល្ខោនគំនិតបាននិយាយថា៖«ការងាររបស់យើងពាក់ព័ន្ធនឹងការអនុញ្ញាតឱ្យសមាជិកសហគមន៍លើកឡើងពីការព្រួយបារម្ភអំពីបញ្ហានានា ដូចជាការរើសអើងប្រឆាំងនឹងបុគ្គល LGBTQ+ ការមិនរាប់អានជនពិការដោយសារតែខ្វះទីកន្លែងសម្រាប់ពួកគេនិងកង្វះអន្តរាគមន៍សហគមន៍ដើម្បីការពារអំពើហិង្សាលើស្ត្រី»។
អ្នកស្រីបានឱ្យដឹងថាទស្សនិកជនរមែងនិយាយអំពីបញ្ហា ២ផ្សេងទៀតសូម្បីតែនៅពេលដែលប្រធានបទនៃកម្មវិធីមិននិយាយដោយផ្ទាល់ក៏ដោយ។
មួយក្នុងចំណោមនោះគឺមិនអាចសងប្រាក់កម្ចីក្រៅផ្លូវការជាមួយការប្រាក់ខ្ពស់ដែលនាំទៅរកជម្រើសប្រថុយប្រថានផ្សេងទៀតដូចជាការធ្វើចំណាកស្រុកដោយគ្មានឯកសារឬការទន្ទ្រានដីដែលគេដឹងថាមានគ្រោះថ្នាក់ដោយសារសំណល់នៃសង្គ្រាម។
បញ្ហា ១ទៀតគឺការសេពគ្រឿងស្រវឹងនិងគ្រឿងញៀនដែលធ្វើឱ្យស្ត្រីនិងកុមារីរងគ្រោះកាន់តែធ្ងន់ធ្ងរ។ អង្គការល្ខោនគំនិតកំពុងស្វែងការដោះស្រាយបញ្ហាទាំង ២នេះនាពេលខាងមុខ។
លោកចាន់ភីរ៉ាក់ បានបញ្ជាក់ថា ល្ខោននិយាយ ជាទម្រង់សិល្បៈមិនសូវបានស្គាល់ច្រើននៅកម្ពុជាហើយដើម្បីធ្វើឱ្យវាក្លាយជាសិល្បៈដ៏រីកចម្រើនអង្គការត្រូវមានមនុស្សជាច្រើនចូលរួម។
សម្រាប់ព័ត៌មានលម្អិតសូមចូលទៅកាន់គេហទំព័រហ្វេសប៊ុក @lakhonkomnitឬទំនាក់ទំនងតាមរយៈអ៊ីមែលlakhonkomnit@gmail.com៕
