ភ្នំពេញៈអ្នកបង្កើតមាតិកា ឬគេនិយមហៅថាជា Youtuber ជាអាជីពមួយកំពុងមានប្រជាប្រិយភាព ពិសេសសម្រាប់យុវជនជំនាន់ក្រោយដែលមានគំនិតថ្មីៗក្នុងការផលិតវីដេអូដែលមានភាពទាក់ទាញមានអ្នកស្គាល់ច្រើន និងអាចរកចំណូលបានគួរសមថែមទៀតផង។
ក្នុងនោះអ្នកបង្កើតមាតិកាផ្ដោតលើការសម្រាយរឿងម្នាក់ដែលកំពុងមានប្រជាប្រិយភាពបានចែករំលែកបទពិសោធន៍ជោគជ័យក្នុងអាជីពនេះទោះបីរូបគេត្រូវរៀននៅសាកលវិទ្យាល័យដល់ទៅ២ជំនាញក៏ដោយ។
លោក ថុន គីមហេងឬគេស្គាល់ជាទូទៅថា OppaHeng ជាអ្នកផលិតវីដេអូសម្រាយរឿងម្នាក់ដែលមានស្រុកកំណើតនៅភូមិព្រែកតាជ័រឃុំស្វាយប្រទាល ស្រុកស្អាង ខេត្តកណ្ដាល។ យុវជនរូបនេះ ក៏ជានិស្សិតនៃសាកលវិទ្យាល័យភូមិន្ទភ្នំពេញជំនាញប្រព័ន្ធផ្សព្វផ្សាយនិងសារគមនាគមន៍និងជានិស្សិតនៃដេប៉ាតឺម៉ង់ភាសាបរទេសផងដែរ។
សម្រាប់ការបែងចែកពេលវេលាយុវជនវ័យ២២ឆ្នាំរូបនេះរៀបរាប់ថា នៅពេលចាប់ផ្ដើមផលិតដំបូងលោកពុំសូវផ្ដោតខ្លាំងទៅលើការផលិតវីដេអូប៉ុន្មានទេ ដោយសារជាវ័យត្រូវសិក្សាថែមទាំងរៀន២ជំនាញថែមទៀត ប៉ុន្តែការបន្តផលិតយូរៗ ធ្វើឱ្យលោកដឹងថាអាជីពនេះជាអាជីពដែលលោកស្រឡាញ់មិនអាចខ្វះបានទើបលោកព្យាយាមចែករំលែកពេលវេលាកាន់តែច្រើនមកផ្ដោតលើការផលិតវីដេអូវិញ។
លោកថុន គីមហេងបញ្ជាក់ថា៖«ខ្ញុំបានផ្ដោតលើការផលិតមាតិកាជាការសិក្សាដោយសារយើងទៅរៀនរាល់ថ្ងៃគឺសាលាមានជំនាញជាច្រើនដើម្បីឱ្យរៀន និងស្វែងរកជំនាញខ្លួនឯង ហើយខ្ញុំក៏អាចរកឃើញហើយទើបខ្ញុំផ្ដល់សារៈសំខាន់ទៅលើការផលិតមាតិកាច្រើនជាងពោលគឺធ្វើអ្វីដែលខ្លួនខ្ញុំស្រឡាញ់ជារឿងចម្បង»។
បច្ចុប្បន្ន យុវជនគីមហេង មាន channelយូធូបចំនួន ៤ផ្សេងៗគ្នាដែលchannelដើមមានអ្នកsubscribe ដល់ទៅជាង៧០ម៉ឺននាក់និងអាចរកចំណូលបានច្រើនទាំងពីក្រុមហ៊ុនយូធូបផង និងអ្នកដែលទាក់ទងផ្សាយពាណិជ្ជកម្មពីផលិតផលឬសេវាកម្មផ្សេងទៀតផង។
យ៉ាងណាក៏ដោយនៅពេលចាប់ផ្ដើមដំបូងគេពុំបានគិតពីរឿងលុយជាធំនោះទេដោយសារពេលនោះជាពេលដែលគេបិទការរកចំណូលពីប្រព័ន្ធយូធូបដែលធ្វើឱ្យអ្នកបង្កើតមាតិកាជាច្រើនបានបោះបង់ តែគីមហេង បែរជាខិតខំរកអ្វីថ្មីៗបន្ថែមទៀតដោយសារជាអាជីពដែលខ្លួនស្រឡាញ់។
លោកបានប្រាប់ថា៖«នៅពេលដែលចូលទៅមើលព័ត៌មានពីវីដេអូដែលខ្ញុំផលិត ខ្ញុំមិនបានមើលពីចំនួនលុយដែលវីដេអូនោះរកបាននោះទេតែខ្ញុំមើលពីចំនួនអ្នកមើល អ្នកចូលចិត្ត ហើយមានមតិយោបល់អ្វីខ្លះនិយាយអ្វីពីវីដេអូខ្ញុំ»។
គួរបញ្ជាក់ដែរថាលោកថុន គីមហេង ឬOppaHengបានចាប់ផ្ដើមផលិតមាតិកាលើប្រព័ន្ធយូធូបតាំងពីឆ្នាំ២០១៨ តែមានគេទទួលស្គាល់ និងចាប់ផ្ដើមសម្រាយរឿងនៅខែមីនា ឆ្នាំ២០២១។លោកបញ្ជាក់ពីមូលហេតុផងដែរថា៖«ខ្ញុំធ្វើវីដេអូសម្រាយរឿង ដោយសារបងៗអ្នកមើលរឿងនាពេលបច្ចុប្បន្នពុំមានពេលវេលាច្រើនក្នុងការតាមដានសាច់រឿងដល់ទៅ ១-២ម៉ោងនោះទេទើបខ្ញុំផលិតជាវីដេអូសម្រាយរឿងខ្លីត្រឹម ៣០នាទីវិញដោយការបន្ថែមនូវពាក្យពេចន៍កំប្លែងធ្វើយ៉ាងណាឱ្យអ្នកស្ដាប់និងទស្សនាទទួលបាននូវអារម្មណ៍មួយថ្មីប្លែកខុសពីការមើលរឿងពេញ»។
លោកបន្ថែមថា មិនត្រឹមតែចំណេញពេលនោះទេវីដេអូសម្រាយរឿងក៏អាចជួយសម្រួលដល់អ្នកដែលមិនសូវចេះភាសាក៏អាចមើលនិងយល់ពីសាច់រឿងដែលពួកគាត់ចង់មើលបាន។ ណាមួយលោកក៏មើលឃើញពីសក្ដានុពលនៃការផលិតមាតិកាពិសេសលើបណ្ដាញយូធូប ដែលដើមឡើយយើងចាប់ផ្ដើមធ្វើvlogធ្វើ reactionនិងថតជាវីដេអូលេងហ្គេមជាដើម ហើយក៏ផ្លាស់ប្ដូរមកផលិតសម្រាយរឿងនិងមានអ្នកស្គាល់រហូតដល់បច្ចុប្បន្ននេះ។
មនុស្សម្នាចាប់ផ្ដើមស្គាល់OppaHengបន្ទាប់ពីការផលិតប្រមាណ១០ វីដេអូ ដែលគេបានមើលឃើញពីការខិតខំប្រឹងប្រែងផលិតគេចូលចិត្តនិងគាំទ្រ ដែលជាពេលមួយធ្វើឱ្យអ្នកបង្កើតមាតិការូបនេះមានអារម្មណ៍ថា លែងឯកាទៀតហើយពោលគឺមានអ្នកមើលវីដេអូរបស់លោកច្រើន។
ទន្ទឹមគ្នានេះដែរការងារអ្វីក៏មានបញ្ហាប្រឈមផងដែរ តួយ៉ាង Youtuberបានជួបផលលំបាកផងដែរគឺទាក់ទងនឹងបច្ចេកទេសកាត់ត ដោយសារវីដេអូសម្រាយរឿង ត្រូវយកវីដេអូរឿងរបស់គេមកកាត់និងបញ្ចូលសំឡេងយ៉ាងណាឱ្យត្រូវតាមគោលការណ៍របស់យូធូបទើបគេអនុញ្ញាតឱ្យផ្សព្វផ្សាយបាន។
លោកថុន គីមហេងបន្ថែមទៀតថា៖ «យើងត្រូវយល់ដឹងពីគោលការណ៍ផ្សេងៗនិងរបៀបយកវីដេអូមកប្រើដែលទាមទារឱ្យយើងរៀនសូត្រនិងអនុវត្តជារឿយៗ។ ណាមួយយើងត្រូវមានភាពច្នៃប្រឌិតខ្ពស់ក្នុងការបកប្រែរឿងបរទេសក៏ដូចជារៀបពាក្យពេចន៍ធ្វើយ៉ាងណាឱ្យអ្នកស្ដាប់អាចងាយស្រួលយល់ និងត្រូវជាមួយនឹងន័យដើមរបស់រឿងហើយដំបូងៗក៏ពុំមានអ្នកមើលច្រើនដែរតែចេះតែព្យាយាមដោយសារស្រឡាញ់អាជីពនេះ»។
ដោយឡែកពេលផលិតដំបូងអ្នកដែលចូលមើលវីដេអូដែលបានផូស្តហើយនោះគឺរូបលោកខ្លួនឯង បន្ទាប់មកអ្នកដែលបានsubscribe ដំបូងគេបងស្រីរបស់លោកហើយបន្តបន្ទាប់ទើបមានមិត្តភក្ដិដែលជាអ្នកជួយគាំទ្រលោកជារឿយៗ។
ចំណែកអ្នកដែលជំរុញទឹកចិត្តយុវជនរូបនេះគឺអ្នកនៅជុំវិញខ្លួនដូចជាក្រុមគ្រួសារមិត្តភក្ដិ និងអ្នកទស្សនាទាំងអស់ដែលតែងតែគាំទ្រ និងស្រឡាញ់ចូលចិត្ត ដោយសារតែការផលិតវីដេអូ ត្រូវការជាចំបាច់នូវអ្នកមើលនិងជួយចែករំលែកបន្តដែលធ្វើឱ្យវីដេអូនោះកាន់តែល្បីល្បាញ។
អ្នកផលិតមាតិកាបែបសម្រាយរឿងរូបនេះក៏បានផ្តាំផ្ញើដល់អ្នកដែលស្រឡាញ់អាជីពនេះដែរថា បើសិនជាអ្នកស្រឡាញ់អ្វីមួយអ្នកគួរតែចាប់ផ្ដើមធ្វើវា ទោះបីអ្នកមិនទាន់ប្រាកដ១០០ភាគរយក៏ដោយព្រោះវាសុទ្ធសឹងតែជាមេរៀនដែលបង្រៀនពីអ្វីដែលអ្នកចង់ធ្វើពិតប្រាកដ។
មួយវិញទៀតអ្នកផលិតក៏ត្រូវតែត្រៀមចិត្តផងដែរដោយសារការចាប់ផ្ដើមពីចំណុចដំបូងគឺត្រូវឆ្លងកាត់នូវភាពឯកាគ្មានអ្នកគាំទ្រ និងជួបកត្តាប្រឈមផ្សេងៗទៀតទើបរកអ្វីដែលជាខ្លួនឯងបានតែយ៉ាងណា Youtuberរូបនេះក៏លើកទឹកចិត្តនិងរីករាយក្នុងការចែករំលែកបទពិសោធន៍ដល់អ្នកដែលចាប់អារម្មណ៍លើវិស័យមួយនេះផងដែរ៕