![](https://pppkhmer.sgp1.digitaloceanspaces.com/image/main/field/image/ace-energy-cambodia.jpg)
ការបង្ហាញពីការប្រើប្រាស់ចង្ក្រាននិងអុសបរិស្ថាននៅខេត្តសៀមរាមកន្លងទៅ ។ រូបថត ACE Energy Cambodia
សៀមរាបៈ អំពៅ គឺជាដំណាំមួយប្រភេទដែលផ្ដល់អត្ថប្រយោជន៍ជាច្រើនដោយគេអាចកែច្នៃទៅជាភេសជ្ជៈផង ឬចម្រាញ់ធ្វើជាស្ករផង។ បន្ទាប់ពីកិនសម្រិតយកទឹកឡើងខ្សោះអស់ហើយ កាករបស់វាត្រូវបានគេច្នៃទៅជារបស់ប្រើប្រាស់បរិស្ថានដូចជា ចានបរិស្ថានជាដើម។ លើសពីនេះបច្ចុប្បន្នសំណល់កាកអំពៅទាំងនោះគេថែមទាំងអាចច្នៃទៅជាអុសបរិស្ថានបានថែមទៀតផង។
ស្ថិតនៅភូមិជ្រាវ ក្រុងសៀមរាប ខេត្តសៀមរាប អាជីវកម្មមេត្រីបរិស្ថានមួយដែលមានឈ្មោះថា «ACE» តែងប្រមូលយកកាកអំពៅនិងសំណល់ឈើដែលគេបោះបង់ចោលមកកែច្នៃទៅជាអុសបរិស្ថានដែលមានតម្លៃសមរម្យនិងកំពុងទទួលបានការចាប់អារម្មណ៍ពីពលរដ្ឋ។
លោក សេង ចាន់វាសនា ប្រធានផ្នែកលក់ប្រចាំអាជីវកម្មមេត្រីបរិស្ថានខាងលើនេះបានរៀបរាប់ថា ស្ថាប័នរបស់លោកចាប់ផ្ដើមដំណើរការក្នុងឆ្នាំ២០២០ ពោលគឺមានរយៈពេលជិត៣ឆ្នាំមកហើយ។បច្ចុប្បន្នអាជីវកម្មមេត្រីបរិស្ថាននេះថែមទាំងមានរោងចក្រដំឡើងនិងកែច្នៃផ្ទាល់ដោយស្នាដៃកូនខ្មែរទៀតផង។
អាជីវកម្មបែបបរិស្ថានមួយនេះគឺមានផលិតផលិតផលដូចជាចង្ក្រានបរិស្ថាន អុសបរិស្ថាន ដែលផលិតចេញពីកាកអំពៅ និងកម្ទេចឈើ។
លោកសេង ចាន់វាសនា បានឱ្យដឹងថា មូលហេតុដែលនាំឱ្យមានការផលិតអុសបរិស្ថាននេះឡើងគឺដោយសារតែការសង្កេតឃើញថា នៅក្នុងក្រុងសៀមរាប មានសំណល់កាកអំពៅនិងសំណល់មែកឈើរប៉ាត់រប៉ាយច្រើនខ្លាំងពេក។
លោកបានប្រាប់ថា៖«ដោយសង្កេតឃើញថា វាអាចនឹងប៉ះពាល់ដល់បរិស្ថាន និងសណ្ដាប់ធ្នាប់ក្នុងក្រុងយើងនឹកឃើញថា បើសិនបើយើងយកកាកអំពៅនិងសំណល់ឈើទាំងនោះមកកែច្នៃទៅជាអុសមួយប្រភេទដែលល្អហើយវាអាចប្រើប្រាស់ជាមួយចង្ក្រានបរិស្ថានដែលយើងកំពុងផលិតបាននោះវាពិតជាល្អទាំងសម្រាប់អាជីវកម្មរបស់យើងនិងបរិស្ថាន»។
ក្នុងដំណើរការនៃការកែច្នៃអុសបរិស្ថាន២ប្រភេទនេះលោកវាសនា បានឱ្យដឹងថា អង្គភាពរបស់លោកបានចំណាយពេលរហូតដល់ទៅ២ឆ្នាំក្នុងការស្រាវជ្រាវទម្រាំអាចចេញជាផលិតផលសម្រេចបាន។
លោកសេង ចាន់វាសនា រៀបរាប់ដូច្នេះថា៖«ចំណុចចាប់ផ្ដើមគឺយើងផ្ដើមពីការផលិតដោយដៃសុទ្ធសាធគ្រានោះគឺអាចផលិតបានត្រឹម៣០-៤៥គីឡូក្រាមប៉ុណ្ណោះក្នុង១ថ្ងៃ បន្ទាប់មកទៀតយើងបានងាកទៅស្វែងរកម៉ាស៊ីនជំនួយដោយការទិញម៉ាស៊ីន១គ្រឿងពីសាធារណរដ្ឋឆែកដើម្បីជំរុញការផលិតរបស់យើងក្នុងបរិមាណច្រើន»។
បច្ចុប្បន្នអាជីវកម្មមួយនេះអាចផលិតអុសបរិស្ថានបានចន្លោះពី៤០០-៤៥០គីឡូក្រាមក្នុង១ថ្ងៃបើគិតជាម៉ោងគឺអាចផលិតបាន៣០-៤០គីឡូក្រាមក្នុង១ម៉ោង។
លោក ចាន់វាសនា បានរៀបរាប់ថា អុសបរិស្ថានរបស់លោកអាចប្រើជំនួសធ្យូងបានបើសិនបើអ្នកប្រើប្រាស់ប្រើជាមួយចង្ក្រានបរិស្ថាន តែបើសិនបើប្រើជាមួយនឹងចង្ក្រានធម្មតាវានឹងមិនអស់ពីលទ្ធភាពនោះទេ ពោលវាមិនអាចបំប្លែងទៅជាចំហេះភ្លើង១០០ភាគរយទេ។
ប្រធានផ្នែកលក់រូបនេះបានឱ្យដឹងទៀតថា អុសកាកអំពៅគឺមានភាពងាយស្រួលនិងចំណេញជាងអុសធម្មតា។ក្នុងការចម្អិនអាហារមួយពេលឬដាំបាយគឺប្រើអស់អុសនេះត្រឹម៣ដុំប៉ុណ្ណោះ។លើសពីនេះគឺចំណេញពេលវេលា វាមិនប៉ះពាល់ធម្មជាតិ។
ជាមួយគ្នានេះលោកចង់ជំរុញឱ្យប្រជាពលរដ្ឋងាកមកប្រើប្រាស់អុសបរិស្ថាននិងចង្ក្រានបរិស្ថានដោយហេតុថា អ្នកប្រើប្រាស់មិនចាំបាច់ចំណាយពេលក្នុងការកាប់ឈើឬប្រើជីវម៉ាសដែលមានផ្សែងប៉ះពាល់ដល់សុខភាពអ្នកប្រើផងនិងប៉ះពាល់បរិស្ថានផង។
លោកសេង ចាន់វាសនា បន្តថា អុសបរិស្ថាននេះវានឹងបង្កលក្ខណៈងាយស្រួលខ្លាំងដល់អាជីវករនិងពលរដ្ឋដែលរស់នៅទីប្រជុំជននិងទីក្រុង។សម្រាប់តម្លៃនៃអុសបរិស្ថានដែលច្នៃចេញពីកាកអំពៅនិងសំណល់មែកឈើនេះលោកនិយាយថា វាមានតម្លៃ៨ពាន់រៀលក្នុង១៥គីឡូក្រាមឬស្មើនឹង១គីឡូ៥០០រៀល។
ដោយឡែកសម្រាប់ចង្ក្រានបរិស្ថានវិញលោកសេង ចាន់វាសនា ថា ចង្ក្រានបរិស្ថាននេះគឺជាចង្ក្រានឆ្លាតវៃដែលអាចជួយសម្រួលដល់ការប្រើប្រាស់របស់ប្រជាពលរដ្ឋទូទៅអាជីវករហើយអាចជួយទៅដល់បរិស្ថានតាមរយៈការកាត់បន្ថយផ្សែងរហូតទៅដល់៩៥ភាគរយឯណោះ។
ជាមួយគ្នានេះវាអាចជួយការបញ្ចេញផ្សែងទៅកាន់បរិយាកាសហើយវារួមចំណែកកាត់បន្ថយការចំណាយរបស់ពលរដ្ឋ។ សេង ចាន់វាសនា បានឱ្យដឹងដែរថា វាអាចប្រើប្រាស់បានសម្រាប់គ្រប់កាកសំណល់លើកលែងតែប្លាស្ទិក។អ្នកប្រើប្រាស់អាចប្រើជាអុសធម្មតាធ្យូងគ្រាប់ត្នោតធាងត្នោតត្រឡោកដូងឬស្រកីដូងជាដើម។
បច្ចុប្បន្ននេះអាជីវកម្មកែច្នៃនៅខេត្តសៀមរាបនេះផលិតចង្ក្រានបានជាង១ម៉ឺនហើយ សម្រាប់ចែកចាយក្នុងស្រុក។លោកសេង ចាន់វាសនា ក៏បានបញ្ជាក់ដែរថា ផលិតផលបរិស្ថានរបស់លោកកំពុងទទួលបានការគាំទ្រនិងសាទរខ្លាំងគួរសមរហូតលក់អស់ៗពីស្តុក។
ទាក់ទិនទៅនឹងការលក់នេះ លោកសេង ចាន់វាសនា បានឱ្យដឹងថា៖ «ចំពោះអុសបរិស្ថានវិញជាមធ្យម យើងអាចលក់បានចន្លោះពី៣តោន-៥តោនក្នុង១ខែ ចំណែកឯចង្ក្រានជាមធ្យមយើងអាចលក់បានចន្លោះពី២៥០គ្រឿងទៅដល់ជាង៣០០គ្រឿងក្នុង១ខែ»៕