លោក ទីវ តារារិទ្ធិ ពេលកំពុងជិះកង់រៃអង្គាសថវិកា ដើម្បីជួយកុមារកាលពីថ្ងៃទី ៩ កក្កដា។ រូបថត ACH page
ភ្នំពេញៈ យុវជនខ្មែរម្នាក់ស្ម័គ្រចិត្តជិះកង់ជាលក្ខណៈផ្សងព្រេងក្នុងរយៈចម្ងាយជាង ៩ ០០០ គីឡូម៉ែត្ រឆ្លងកាត់ប្រទេសមួយចំនួនក្នុងតំបន់ភូមិភាគអាស៊ីអាគ្នេយ៍ ដើម្បីរៃអង្គាសប្រាក់ជួយកុមារកម្ពុជាដែលមានជំងឺមហារីក និងជំងឺផ្សេងៗនៅមន្ទីរពេទ្យកុមារអង្គរ។
ទីវ តារារិទ្ធិ ដែលបានដាក់ឈ្មោះលើបណ្តាញសង្គមហ្វេសប៊ុកថា ធ្វើដំណើរជាមួយរិទ្ធិ គឺជាយុវជនកម្ពុជាម្នាក់ ដែលចូលចិត្តការធ្វើដំណើរផ្សងព្រែង ដើរព្រៃ និងឡើងភ្នំ ជាពិសេសគឺការជិះកង់។ រិទ្ធិ បានចាប់ផ្តើមបេសកកម្មរបស់ខ្លួន ដោយការជិះកង់ចេញពីក្រុងភ្នំពេញប្រទេសកម្ពុជា កាលពីថ្ងៃទី ៣១ ខែឧសភា ឆ្នាំ ២០២៣ ដើម្បីឆ្លងកាត់បណ្តាប្រទេសអាស៊ានមួយចំនួនដូចជា វៀតណាម ឡាវ ថៃ ម៉ាឡេស៊ី និងសិង្ហបុរី។
រិទ្ធិ ដែលធ្លាប់មានបទពិសោធន៍ធ្វើដំណើរផ្សងព្រេងគ្រប់ទីកន្លែងនៅតាមតំបន់ដាច់ស្រយាលក្នុងប្រទេសកម្ពុជា និងធ្លាប់បានសាកល្បងជិះកង់ទៅកាន់ប្រទេសថៃកាលពី៤ឆ្នាំមុនម្តងរួចមកហើយនោះ បាននិយាយថា ការជិះកង់ជុំវិញតំបន់ភូមិភាគអាស៊ីអាគ្នេយ៍គឺជាក្តីស្រមៃរបស់ខ្លួន។
រិទ្ធិ បានបញ្ជាក់ដូច្នេះថា៖«ដូចដែលខ្ញុំបាននិយាយអ៊ីចឹងថា ការជិះកង់ គឺជាចំណង់ចំណូលចិត្តរបស់ខ្ញុំ ហើយបេសកកម្មនេះគឺជាអ្វីដែលខ្ញុំចង់ធ្វើដើម្បីតំណាងឱ្យយុវជនខ្មែរដែលមានរឿងរ៉ាវជាច្រើនសម្រាប់ផ្តល់អត្ថប្រយោជន៍ដល់ប្រទេសកម្ពុជា និងលើកស្ទួយមុខមាត់ជាតិ ហើយជាពិសេសការធ្វើដំណើរនេះ គោលបំណងធំគឺ ដើម្បីរៃអង្គាសប្រាក់ទៅជួយកុមារកម្ពុជាជាច្រើនកំពុងមានជំងឺមហារីក និងជំងឺផ្សេងៗ ដែលសម្រាកព្យាបាលនៅមន្ទីពេទ្យកុមារអង្គរ»។
គិតចាប់ពីថ្ងៃផ្តើមដំបូង រិទ្ធិ បានធ្វើដំណើរអស់រយៈពេលជាង១ខែមកហើយ ដោយបានធ្វើដំណើរជាង៤ ០០០ គីឡូម៉ែត្រឬស្មើនឹង៤០ភាគរយនៃចម្ងាយសរុប ហើយប្រាក់ដែល រិទ្ធិ រៃអង្គាសបានក្នុងរយៈពេល២សប្តាហ៍ដំបូង គឺបានប្រមាណជាង៤ ០០០ដុល្លារ។
ក្នុងបេសកកម្មរបស់ខ្លួន ដែលបន្តទៅមុខប្រហែលជាង១ខែទៀត រិទ្ធិ ជឿជាក់ថា សាធារណជន នឹងបន្តបរិច្ចាគថវិកាចូលមកកាន់គណនីរបស់មន្ទីរពេទ្យកុមារអង្គរជាបន្តបន្ទាប់ ព្រោះក្រោយពីឆ្លងកាត់ប្រទេសគោលដៅទាំងអស់ហើយ រិទ្ធិ នឹងស្វែងរកផ្លូវតាមរយៈការជិះកង់ត្រឡប់មកកាន់ខេត្តសៀមរាប ដើម្បីបញ្ចប់បេសកកម្មរបស់ខ្លួន នៅមុខមន្ទីរពេទ្យកុមារអង្គរតែម្តង។
លោក រិទ្ធិ បានរៀបរាប់ពីអ្វីដែលខ្លួនបានឆ្លងកាត់ថា៖«ខ្ញុំបានជិះកាត់តាមប្រទេសវៀតណាម គឺអស្ចារ្យមែនទែន គឺសមាគមកង់ និងអ្នកស្រឡាញ់កង់ក្នុងប្រទេសវៀតណាម តំបន់១ទៅតំបន់១ បានចូលរួមជាមួយខ្ញុំច្រើន ហើយពួកគាត់បានបរិច្ចាគប្រាក់ជួយកុមារកម្ពុជាយើង។ តាមរយៈសកម្មភាពរបស់ខ្ញុំ ខ្ញុំជឿថា អ្នកទាំងអស់គ្នា នឹងចូលរួមជាមួយខ្ញុំ និងជួយបរិច្ចាគថវិកាខ្លះជួយដល់មន្ទីរពេទ្យ»។
មន្ទីរពេទ្យកុមារអង្គរ (AHC) គឺជាអង្គការមិនមែនរដ្ឋាភិបាល មិនស្វែងរកផលកម្រៃ ដោយមានបេសកកម្មចូលរួមធ្វើឱ្យមានភាពប្រសើរឡើងដល់ប្រព័ន្ធសុខាភិបាលសម្រាប់កុមារកម្ពុជា។ AHC បានផ្តល់សេវាថែទាំសុខភាពដោយក្តីមេត្តាករុណាដល់កុមារកម្ពុជាទូទាំងប្រទេសអស់រយៈពេលម្ភៃឆ្នាំមកហើយដើម្បីផ្តល់ឱ្យកុមារកម្ពុជាគ្រប់រូបទទួលបានសេវាថែទាំសុខភាព ប្រកបដោយសេចក្តីមេត្តាករុណា និងគុណភាពខ្ពស់ ទោះបីជាពួកគេរស់នៅទីកន្លែងណា និងមិនមានលទ្ធភាពបង់ថ្លៃសេវាក៏ដោយ។
កញ្ញា ដាំ សុស្រីនាង ជាយុវជនដែលបានចូលរួមគាំទ្រក្នុងបេសកកម្មនេះ ដោយការបរិច្ចាគថវិកា និងចែករំលែកព័ត៌មានទាំងនេះបន្តទៅកាន់សាធារណជន បាននិយាយថា ក្នុងនាមជាយុវជនខ្មែរម្នាក់ ហើយក៏ជាអ្នកដែលស្រឡាញ់ការជិះកង់ គឺពិតជាមានមោទនភាព ដែលបានឃើញយុវជនខ្មែរ ធ្វើរឿងរ៉ាវទាំងនេះ។
កញ្ញាបានបញ្ជាក់ថា៖«ខ្ញុំអបអរសាទរ ដែលគាត់ជាអ្នកចូលចិត្តជិះកង់ ហើយគាត់ធ្វើបេសកកម្មដោយការជិះកង់ជុំវិញតំបន់អាស៊ីអាគ្នេយ៍ ដោយជ្រើសរើសការរៃអង្គាសថវិកាដើម្បីជួយដល់មន្ទីរពេទ្យកុមារអង្គរ។ ទង្វើនេះ គឺជាគំរូភាពមួយសម្រាប់យុវជនជំនាន់ក្រោយ ដែលនាំឱ្យខ្ញុំចែករំលែក និងចូលរួមជាថវិកា»៕
