អ្នកចូលរួមរត់ប្រណាំងម៉ារ៉ាតុងនៅអង្គរវត្តកាលពីឆ្នាំ ២០១៨។ រូបថត សហការី
សៀមរាបៈ គណៈកម្មាធិការម៉ារ៉ាតុងភ្នំពេញបានឱ្យដឹងថា មានអ្នកចុះឈ្មោះចូលរួមក្នុងព្រឹត្តិការណ៍ទិវារត់ប្រណាំងម៉ារ៉ាតុងអន្តរជាតិចក្រភពខ្មែរលើកទី៨ ចំនួន ២ ៥០០ នាក់ ហើយលោកបានរំឭកដល់អ្នកចូលរួមទាំងអស់ត្រៀមខ្លួនឱ្យបានល្អ ដើម្បីឱ្យកម្មវិធីនេះប្រព្រឹត្តទៅដោយរលូន និងមានសណ្តាប់ធ្នាប់ស្របតាមស្តង់ដាម៉ារ៉ាតុងអន្តរជាតិ។
នៅថ្ងៃទី ៦ សីហា គណៈកម្មាធិការម៉ារ៉ាតុងភ្នំពេញ នឹងរៀបចំព្រឹត្តិការណ៍ទិវារត់ប្រណាំងម៉ារ៉ាតុងអន្តរជាតិ ចក្រភពខ្មែរ លើកទី៨ នៅខាងមុខប្រាសាទអង្គវត្ត ក្នុងខេត្តសៀមរាប បន្ទាប់ពីព្រឹត្តិការណ៍រត់ម៉ារ៉ាតុងចក្រភពខ្មែរលើកទី៧ បានធ្វើឡើងដោយជោគជ័យកាលពីខែសីហា ឆ្នាំ ២០២២ ដោយមានអ្នកចូលរួមរត់ជាង ៣ ០០០ នាក់ ក្នុងនោះមានទាំងពលរដ្ឋខ្មែរ និងជនបរទេសមកពី ៤៩ ប្រទេស។
លោក សែម ផល្លា នាយកចាត់ការទូទៅ ព្រឹត្តិការណ៍ម៉ារ៉ាតុងនៃគណៈកម្មាធិការម៉ារ៉ាតុងភ្នំពេញបានប្រាប់ភ្នំពេញប៉ុស្តិ៍នៅថ្ងៃទី ៣ សីហាថា បន្ទាប់ពីបិទបញ្ចប់ការទទួលចុះឈ្មោះជាផ្លូវការ គឺមានអ្នកចុះឈ្មោះជាតិ និងអន្តរជាតិចំនួន ២ ៥០០ នាក់ បានចុះឈ្មោះចូលរួមក្នុងកម្មវិធីនេះ។
លោក សែម ផល្លា បានឱ្យដឹងថា ព្រឹតិ្តការណ៍ទិវារត់ប្រណាំងម៉ារ៉ាតុងអន្តរជាតិ ចក្រភពខ្មែរ គឺធ្វើឡើងដើម្បីរំឭកដល់គុណូបការៈ និងកេរ្តិ៍ឈ្មោះដូនតារបស់យើង ដែលបង្ហាញពីនិមិត្ដរូបនៃអរិយធម៌បុរាណរបស់ប្រជាជនខ្មែរក្នុងសម័យអង្គរ។ អាណាចក្រខ្មែរ ត្រូវបានគេស្គាល់ថា ជាប្រទេសកម្ពុជាបុរាណ គឺជាចក្រភពដ៏មានឥទ្ធិពលបំផុតនៅអាស៊ីអាគ្នេយ៍ ហើយមានអង្គរជាតំបន់កណ្តាលនៃការតាំងទីលំនៅរបស់ព្រះរាជាណាចក្រខ្មែរ ពីសតវត្សរ៍ទី៩ ដល់សតវត្សរ៍ទី១៣។
លោកបញ្ជាក់ថា៖ «ដើម្បីឱ្យព្រឹតិ្តការណ៍ទិវារត់ប្រណាំងម៉ារ៉ាតុងអន្តរជាតិចក្រភពខ្មែរលើកនេះកាន់តែល្អ សូមឱ្យអ្នកចូលរួមត្រៀមខ្លួន និងត្រៀមសម្ភារឱ្យបានមុន និងត្រឹមត្រូវ ហើយត្រូវមកដល់កន្លែងឱ្យបានមុន ៣០ នាទី។ ពី ១ ឆ្នាំទៅ ១ ឆ្នាំ យើងកាន់តែយកចិត្តទុកដាក់ ក្នុងការរៀបចំព្រឹត្តិការណ៍នេះ ឱ្យបានល្អប្រសើរជាងមុន ដើម្បីធ្វើយ៉ាងម៉េច ឱ្យស្របតាមស្តង់ដាអន្តរជាតិ»។
ទិវារត់ប្រណាំងម៉ារ៉ាតុងអន្តរជាតិចក្រភពខ្មែរ នឹងផ្តល់ឱកាសពិសេសសម្រាប់អ្នករត់ប្រណាំងទាំងអស់ជុំវិញពិភពលោក ដើម្បីទទួលបានបទពិសោធន៍នៃការធ្វើដំណើរជុំវិញតំបន់បេតិកភណ្ឌពិភពលោកមួយនេះ ដោយឆ្លងកាត់ប្រាសាទបុរាណជិត ៤០ នៅតាមបណ្តោយផ្លូវដ៏រលោងស្អាត អមទៅដោយព្រៃធម្មជាតិ និងវាលស្រែរបស់អ្នកភូមិ។
តាមសេចក្តីជូនដំណឹងរបស់គណៈកម្មាធិការម៉ារ៉ាតុងភ្នំពេញ បានឱ្យដឹងថា ព្រឹត្តិការណ៍នេះ គឺមានការរត់ប្រណាំងក្នុងរយៈចម្ងាយ ៤២ គីឡូម៉ែត្រ ២១ គីឡូម៉ែត្រ ១០ គីឡូម៉ែត្រ និង ៣ គីឡូម៉ែត្រ ហើយអ្នកចូលរួមប្រកួតទាំងអស់ តម្រូវឱ្យរត់តាមផែនទីដែលបានកំណត់ បន្ទាប់ពីខ្លួន បានចុះឈ្មោះចូលប្រកួតតាមរយៈចម្ងាយនីមួយៗ។
ក្នុងសន្និសីទកាសែត នៅទីស្នាក់ការ NOCC កាលពីព្រឹកថ្ងៃទី ១១ ខែកក្កដា លោក វ៉ាត់ ចំរើន អគ្គលេខាធិការ NOCC បាននិយាយថា តំបន់អង្គរវត្ត ជាតំបន់បេតិកភណ្ឌ និងជាតំបន់គោលដៅទេសចរណ៍ឯក គ្មាន ២ នៅលើលោក ដែលមានការទាក់ទាញខ្លាំងសម្រាប់អ្នកទេសចរ។ លោកបានបញ្ជាក់ថា ហេតុនេះរាជរដ្ឋាភិបាល ក៏ដូចជាក្រសួងទេសចរណ៍បានដាក់ចេញយុទ្ធសាស្ត្រ ក្នុងការបង្កើតឱ្យមានព្រឹត្តិការណ៍កីឡាទេសចរណ៍បែបនេះ ឱ្យមានភាពសម្បូរបែប និងគ្រប់រូបភាព ដើម្បីចូលរួមលើកកម្ពស់វិស័យទេសចរណ៍ ដោយសារកម្ពុជា ជាប្រទេសទេសចរណ៍។
សូមជម្រាបថា ទិវារត់ប្រណាំងម៉ារ៉ាតុងអន្តរជាតិចក្រភពខ្មែរ មិនត្រូវបានរៀបចំឡើង កាលពីឆ្នាំ ២០២០ និងឆ្នាំ ២០២១ នោះទេ ដោយសារមានការផ្ទុះឡើង និងការរីករាលដាលខ្លាំងនៃជំងឺកូវីដ ១៩ ជាសកល ចំណែកការរៀបចំឡើងវិញ កាលពីឆ្នាំ ២០២២ ក៏មិនទាន់ទទួលបានជោគជ័យវិញប៉ុន្មានដែរ។ នេះបើតាមលោក សែម ផល្លា៕
