សត្វជន្លេនដែលត្រូវបានចិញ្ចឹមលក់។ រូបថត ហ្វេសប៊ុក
ស្វាយរៀងៈ ជន្លេនជាសត្វ ១ ប្រភេទរស់នៅក្នុងដីរវើកៗគួរឱ្យញញើត តែជន្លេនក៏ជាសត្វម្យ៉ាងដែលសម្បូរទៅដោយប្រូតេអ៊ីនខ្ពស់ និងមានប្រយោជន៍ច្រើនយ៉ាងសម្រាប់ដីកសិកម្មជាពិសេសសម្រាប់ធ្វើជាចំណីដល់សត្វមាន់ ទា ជ្រូក និងកង្កែបជាដើម។
ជាមួយគ្នានេះ របរចិញ្ចឹមជន្លេន ក៏ជាការងារងាយស្រួលមិនមានការចំណាយកម្លាំងនិងពេលវេលាច្រើនដែរហើយការចិញ្ចឹមជន្លេននេះកសិករអាចទាញប្រយោជន៍បានច្រើនពោលគឺទាំងសម្រាប់ធ្វើជាចំណីសត្វចិញ្ចឹមនិងអាចលក់ពូជជន្លេនផងដែរ។ ជាក់ស្តែងនៅខេត្តស្វាយរៀង កសិករជាស្ត្រី ១ រូប អាចរកចំណូលបានសមរម្យពីមុខរបរចិញ្ចឹមជន្លេន និងមានគម្រោងពង្រីកការចិញ្ចឹមបន្ថែមទៀតដ្បិតអីកញ្ញាយល់ឃើញថា វាផ្តល់អត្ថប្រយោជន៍ជាច្រើនដល់ការងារកសិកម្មរបស់ខ្លួន។
កញ្ញា ហួង មាលា វ័យ ៣២ ឆ្នាំ បានចាប់ផ្តើមមុខរបរចិញ្ចឹមជន្លេននៅចុងឆ្នាំ ២០២០ ដោយមានម្ដាយជាអ្នកជួយរៀបចំសម្រាប់លក់ពូជ។ បច្ចុប្បន្ននេះ ទីតាំងចិញ្ចឹមជន្លេនរបស់កញ្ញាមាលា មានកានជន្លេនប្រមាណជិត ២០០ ខណៈការពង្រីកការចិញ្ចឹមនឹងធ្វើឡើងជាបន្តបន្ទាប់ទៀត។ មូលហេតុនៃការចាប់ផ្តើមចិញ្ចឹមដំបូង គឺដោយសារកញ្ញាយល់ថា ដីក្នុងខេត្តស្វាយរៀងមិនសូវមានជីជាតិដូចខេត្តដទៃ ទើបកញ្ញាស្វែងយល់ និងស្រាវជ្រាវឃើញពីការកែប្រែដីមួយបែបគឺការចិញ្ចឹមជន្លេន។ ម្យ៉ាងការចិញ្ចឹមជន្លេននេះ គឺដើម្បីបម្រើឱ្យការចិញ្ចឹមសត្វរបស់ក្រុមគ្រួសារកញ្ញាផងដែរ។ គ្រាន់តែជាមនុស្សដែលស្រឡាញ់កសិកម្ម ហើយមិនមែនជាជំនាញកសិកម្ម និងថែមទាំងមិនធ្លាប់បានសិក្សាជ្រៅជ្រះ តែកូនអ្នកខេត្តស្វាយរៀងរូបនេះបានព្យាយាមរៀនសូត្រពីអ្នកលក់ពូជជន្លេនផង និងរៀនដោយខ្លួនឯងតាមអ៊ីនធឺណិតផង។
កញ្ញាបានឱ្យដឹងថា៖ «ខ្ញុំឈប់ពីការងារគឺដោយសារតែវិបត្តិកូវីដ ១៩ ហើយខ្ញុំងាកមកធ្វើកិច្ចការកសិកម្មនេះទាំងគ្មានអ្នកគាំទ្រឡើយ។ ក្រុមគ្រួសារមិនចង់ឱ្យធ្វើព្រោះខ្លាចហត់ ពិបាក តែខ្ញុំនៅតែជម្នះព្រោះដោយសារតែការស្រឡាញ់កសិកម្មតាំងពីក្មេងមកម្ល៉េះ»។
ជុំវិញបច្ចេកទេសចិញ្ចឹមនេះ កញ្ញា មាលា និយាយថា ដំបូងខ្លួនចាប់ផ្តើមដោយការសាកសួរទៅកាន់អ្នកលក់ពូជជន្លេនហើយបានដាក់ចិញ្ចឹមក្នុងអាងគ្រាដំបូង។ បន្ទាប់មកកញ្ញា ព្យាយាមរៀនពីនេះពីនោះមើលយូធូប (Youtube) និងពិសោធន៍ដោយខ្លួនឯងពី ១ ខែទៅ ១ ខែ ក៏ទទួលបានលទ្ធផលល្អប្រសើរ។
លោក ជា វ៉ាន់ដេត រដ្ឋមន្ដ្រីក្រសួងប្រៃសណីយ៍ និងទូរគមនាគមន៍។ រូបថត ក្រសួងប្រៃសណីយ៍
កញ្ញា មាលា និយាយថា ការចិញ្ចឹមជន្លេន វាមានភាពងាយស្រួល និងមិនពិបាកក្នុងការថែទាំឡើយ កាន់តែចិញ្ចឹម គឺកាន់តែអាចមើលឃើញពីប្រយោជន៍របស់វាច្រើនឡើងៗ និងកាន់តែងាយស្រួល ដ្បិតអីកញ្ញាខ្លួនឯងផ្ទាល់ កាន់តែមានជំនាញខ្ពស់ជាមួយនឹងសត្វប្រភេទនេះ ពោលគឺដាក់ទុនទៅទទួលបានផល មិនខាតដើម ហើយកាន់តែចង់ពង្រីកមុខរបរនេះឱ្យកាន់តែធំ។
បច្ចុប្បន្ននេះ ជន្លេនពូជរបស់កញ្ញា ហួង មាលា អាចលក់បានក្នុងតម្លៃ ១ គីឡូ ១ ម៉ឺនរៀល ដែលនេះគិតទាំងដី និងចំណីរបស់វាទៅជាមួយផងដែរ។ ជាមធ្យមក្នុង ១ ខែ ទីតាំងរបស់កញ្ញាអាចលក់ពូជជន្លេនបានក្នុងរង្វង់ជាង ១០០ គីឡូក្រាម និងអាចប្រែប្រួលឡើងចុះ ទៅតាមការផ្សព្វផ្សាយលក់របស់កញ្ញាផ្ទាល់នៅតាមបណ្ដាញសង្គមហ្វេសប៊ុកឬតាមម៉ូយរបស់ខ្លួន។ ក្រោយឃើញភាពកាក់កប កសិករចិញ្ចឹមជន្លេននៅខេត្តស្វាយរៀងរូបនេះបានបង្ហើបឱ្យដឹងថាខ្លួនមានគម្រោងពង្រីកបន្ថែមចំនួន ១ ទ្រុងទៀត ដែលអាចដាក់ចិញ្ចឹមជន្លេនបានប្រហែលជា ១០០ កានបន្ថែមទៀត។
ជាមួយគ្នានេះដែរ កញ្ញាក៏មានការលើកទឹកចិត្តពិសេសទៅដល់កសិករ និងអ្នកស្រឡាញ់វិស័យកសិកម្មឱ្យងាកមកចាប់អារម្មណ៍នឹងជន្លេន ដោយហេតុថាវាមានអត្ថប្រយោជន៍ច្រើន និងកាត់បន្ថយការចំណាយរបស់កសិករ។ «ជន្លេន មានសក្ដានុពល សម្រាប់វិស័យកសិកម្ម ទៅលើជីកំប៉ុស និងចំណីសត្វ។ ការចិញ្ចឹមសត្វត្រូវការចំណី ហើយដំណាំត្រូវការដីដែលមានគុណភាពល្អ ទាំងនេះគឺសត្វជន្លេនអាចជួយបានទាំងអស់ និយាយឱ្យខ្លីគឺវាវិលជុំ និងចំណាយតិចបំផុត»៕
