យុវជន ហែម សុភេម (កាន់ពាន) និងក្រុមការងារពេលប្រមូលសំរាមតាមបណ្ដាញលូ។ រូបថត សហការី
ភ្នំពេញៈ ដោយមានបំណងធ្វើជាគំរូដល់អ្នកផងឱ្យចេះទុកដាក់សំរាមសំណល់ប្លាស្ទិកឱ្យបានត្រឹមត្រូវ និស្សិត ១ រូប និងមិត្តរួមក្រុមបានចំណាយពេលជាង ១ ឆ្នាំដើរប្រមូលសំណល់ប្លាស្ទិកពីក្នុងប្រឡាយទឹកស្អុយនៅក្នុងរាជធានីភ្នំពេញ។ តាមរយៈការងារជួយបរិស្ថាន តំណាងក្រុមនេះត្រូវបានជ្រើសរើសជាយុវជនឆ្នើមដោយទទួលពានរង្វាន់ក្នុងចំណោម ១០ ប្រទេសនៃសមាគមអាស៊ានផងដែរ។
កាកសំណល់ប្លាស្ទិកកំពុងអណ្តែតរសាត់តាមទឹកពណ៌ខ្មៅកំពុងហូរ តែមានសំណល់ខ្លះបានអណ្តែតទៅទើរនឹងរាងកាយរបស់យុវជន ហែម សុភេម ឬត្រូវនិស្សិតក្នុងក្រុមប្រសិទ្ធនាមឱ្យថា[និស្សិតប្លាស្ទិក]ក្នុងពេលលោកកំពុងឈរនៅកណ្តាលប្រព័ន្ធបង្ហូរទឹកស្អុយ ។
យុវជន ហែម សុភេម អាយុ ២២ ឆ្នាំ ជានិស្សិតកំពុងសិក្សានៅវិទ្យាស្ថានភាសាបរទេស [IFL] នៃសាកលវិទ្យាល័យភូមិន្ទភ្នំពេញ និងជាអ្នកផ្ដួចផ្តើមគំនិតដើរប្រមូលកាកសំណល់ប្លាស្ទិកដំបូងគេ ហើយតាមរយៈសកម្មភាពនេះ រូបគេក៏តែទើបទទួលបានពានរង្វាន់ជើងឯកយុវជនអេកូអាស៊ានលើកទី២ នាពេលថ្មីៗផងដែរ។
ហែម សុភេម បានឱ្យ ភ្នំពេញ ប៉ុស្តិ៍ ដឹងថា ពានរង្វាន់ដែលលោកទទួលបាននោះមិនមែនជាកម្មវិធីប្រកួតប្រជែងទេ តែជាពានរង្វាន់សម្រាប់ផ្តល់ឱ្យយុវជនក្នុងប្រទេសនីមួយៗនៅក្នុងសមាគមអាស៊ានទាំង ១០ ប្រទេស។ ពានរង្វាន់នេះផ្តោតលើយុវជនដែលធ្វើការសកម្មក្នុងកិច្ចការពារបរិស្ថាន ចន្លោះពី ១ ឆ្នាំដល់ត្រឹម ២ ឆ្នាំ ហើយកម្មវិធីនេះទៀតសោត គេកំណត់ធ្វើ ៤ ឆ្នាំម្តង។ ក្នុងនោះអ្នកដែលអាចចូលរួមបានគិតពីអាយុ ១៨ ឆ្នាំ ដល់ ២៥ ឆ្នាំ។ ដូច្នេះបើយុវជនណាលេចធ្លោជាងគេខាងការងារបរិស្ថានគឺប្រទេសនោះនឹងបញ្ជូនយុវជនរបស់ប្រទេសគេឱ្យទៅទទួលពានដូចរូបលោកដែរ។
យុវជនរូបនេះ បានបន្តថា៖«ពានហ្នឹងគ្មានកម្រិតចំណាត់ថ្នាក់ទេ ហើយពាននោះក៏គ្មានថវិកាដែរ មានតែបណ្ណសរសើរ។ខ្ញុំ និងក្រុមការងារនឹងខិតខំបន្តទៀតក្នុងការធ្វើឱ្យបរិស្ថានល្អ»។
បើតាមយុវជន ហែម សុភេម សម្រាប់រូបលោកត្រូវបានជ្រើសរើសដោយក្រសួងបរិស្ថានក៏ដូចជា រាជរដ្ឋាភិបាលដែលបានចាត់ឱ្យលោកចូលរួមក្នុងកម្មវិធីនោះ។ ពានរង្វាន់នោះជាពានរង្វាន់កម្រិតប្រទេសអាស៊ាន ធ្វើឡើងនៅប្រទេសឡាវ កាលពីថ្ងៃទី ២៣ ខែកក្កដាឆ្នាំ ២០២៣។ ការទទួលពាននេះវាបានជំរុញឬផ្តល់កម្លាំងចិត្តបន្ថែមទៀតដល់រូបលោក និងក្រុមការងារលោក ឱ្យបន្តការងារការពារ និងលើកកម្ពស់បរិស្ថានក៏ដូចជាចូលរួមលើកសោភណភាពនៅក្នុងរាជធានីភ្នំពេញ។
លោកប្រាប់ថា៖ «ខ្ញុំគិតថា រាជរដ្ឋាភិបាលក៏ដូចជា ថ្នាក់ដឹកនាំគឺពិតជាបានខ្វាយខ្វល់អំពីយុវជនក្រុមយើង ព្រោះពួកយើងបានលះបង់ពេលវេលានិងថវិកាផ្ទាល់ខ្លួនដើម្បីសង្គមជាតិ។រដ្ឋាភិបាលយើងពិតជាមើលឃើញហើយជួយជ្រោមជ្រែងដូចជារូបខ្ញុំអ៊ីចឹង»។
យុវជន សុភេម បានប្រាប់ថា ការផ្តួចផ្តើមគំនិតប្រមូលកាកសំណល់ប្លាស្ទិកនេះគឺលោកមានគោលបំណងសំខាន់ចំនួន ៣ ដែលទី ១ ចង់បានសោភណភាពបរិស្ថានស្អាតនៅជុំវិញខ្លួនឬនៅទីសាធារណៈនានា។ ទី២ ចង់ផ្តល់ជាគំរូដល់យុវជនដទៃទៀតដើម្បីឱ្យគាត់ចាប់ផ្តើមចេះខ្វាយខ្វល់ពីបរិស្ថាន ហើយលោកក៏មានផលិតជាវីដេអូខ្លីៗដើម្បីទាក់ទាញដែលមានអ្នកចូលមើលរាប់លាននាក់មកហើយដែរ។ ទី៣ គឺលោកចង់ផ្លាស់ប្តូរឥរិយាបថរបស់ប្រជាពលរដ្ឋមួយចំនួនដែលបោះចោលសំរាមពាសវាលពាសកាលគ្មានការទុកដាក់បានត្រឹមត្រូវ។
ចំពោះការឈានទៅទទួលបានពានរង្វាន់នេះគឺខាងក្រសួងបរិស្ថានជាអ្នកជ្រើសរើសយកយុវជនណាម្នាក់ដែលក្រសួងសង្កេតឃើញ និងវាយតម្លៃថានឹងអាចទទួលបានពានទើបសម្រេចបញ្ជូនឱ្យទៅចូលរួមជាមួយគេ។
យុវនិស្សិត សុភេម បានរំឭកថា លោកបានចាប់ផ្តើមប្រមូលសំណល់ប្លាស្ទិកមុនដំបូងនៅក្នុងសាកលវិទ្យាល័យរបស់លោកផ្ទាល់តែម្តង។ ក្រៅពីនោះលោកក៏បានកៀរគរនិស្សិតដទៃទៀតមកពីសាកលវិទ្យាល័យនានាឱ្យចូលរួមបានរាប់រយនាក់ ក្នុងនោះក៏មាននិស្សិតជប៉ុន កូរ៉េ និងនិស្សិតអាមេរិកផងដែរ។
បន្ទាប់មកលោកបានឆ្លៀតពេលទំនេរពីការសិក្សាតែងនាំគ្នាដឹកនាំក្រុមចាប់ផ្តើមដើរប្រមូលកាកសំណល់ប្លាស្ទិកនៅតាមប្រឡាយទឹកស្អុយនានានៅ
ក្នុងរាជធានីភ្នំពេញកាលពីអំឡុងខែមិថុនា ឆ្នាំ ២០២២ ដោយមិនគិតថាយប់ ឬថ្ងៃឡើយ ហើយមានពេលខ្លះលោកបានចុះទៅក្នុងប្រឡាយទឹកស្អុយម្នាក់ឯងក៏មាន។
យុវជន សុភេម បានបន្ដថា ទន្ទឹមនឹងចុះប្រមូលកាកសំណល់ប្លាស្ទិកតាមប្រឡាយទឹកស្អុយក្នុងរាជធានីភ្នំពេញ លោកក៏បានបង្កើតមាតិកាព័ត៌មានជាសារអប់រំខ្លីៗផ្សព្វផ្សាយតាមបណ្ដាញសង្គមបន្ថែមទៀតផងដែរ។ ការបង្កើតសារអប់រំនេះក៏ដើម្បីជាគំរូចង់ប្រែក្លាយទម្លាប់របស់អ្នករស់នៅក្នុងសង្គមពីការមិនស្រឡាញ់បរិស្ថាន ទៅជាការស្រឡាញ់បរិស្ថានវិញ។ ប៉ុន្តែអ្វីដែលលោកទទួលបានការគាំទ្រ និងទទួលបានពាននេះក៏សុទ្ធតែមានការចូលរួមពីនិស្សិតផ្សេងទៀតផងដែរ។
បើតាម សុភេម កម្មវិធីទទួលពាននេះធ្វើឡើងនៅទីក្រុងវៀងចន្ទន៍ប្រទេសឡាវក្រោមប្រធានបទ (ពានរង្វាន់ជើងឯកយុវជនអេកូអាស៊ានលើកទី ២)។ទោះបីទទួលបានពាននេះក៏ដោយ ក៏ក្រុមលោកនៅតែបន្តសកម្មភាពដូចធ្លាប់បានធ្វើនៅតាមប្រឡាយទឹកស្អុយដដែល ហើយក៏នៅតែបង្កើតមាតិកាអប់រំតាមបណ្តាញសង្គមដើម្បីរំឭកដល់សាធារណជនពីផលប៉ះពាល់ដល់បរិស្ថានដូចមុនៗផងដែរ។
គ្រូពេទ្យ និង សេន ប៊ុនថេន បានជួយសម្រួល លួត សុផល ដែលដេកសន្លប់។សហការី
ទាក់ទងនឹងបញ្ហានេះ លោក គាត រង្សី ប្រធានមន្ទីរបរិស្ថានរាជធានីភ្នំពេញប្រាប់ភ្នំពេញប៉ុស្តិ៍ថា លោកយល់ថា អ្វីដែលនិស្សិតហែម សុភេម និងក្រុមការងាររបស់គាត់រួមចំណែកប្រមូលសំណល់ប្លាស្ទិកនេះគឺជាការបំផុសគំនិតដែលក្រសួងក៏ដូចមន្ទីរបរិស្ថាននិងរដ្ឋបាលរាជធានីភ្នំពេញបានសាទរនិងលើកទឹកចិត្តដល់ក្រុមគាត់។ ក្នុងនោះដែរមន្ទីរបរិស្ថានរាជធានីភ្នំពេញតែងតែលើកឡើងក្នុងសារជារឿយៗដើម្បីលើកទឹកចិត្តដល់បងប្អូនឱ្យរួមគ្នាសម្អាតអនាម័យបរិស្ថានទាំងអស់គ្នា។
លោកបានបញ្ជាក់ថា៖ «យើងបានស្នើឱ្យនិស្សិតសុភេមមកចូលរួមជាមួយយើងក្នុងការដើរអប់រំផ្សព្វផ្សាយបន្ថែមទៀត។ អ្វីដែលគាត់ធ្វើនេះគឺជាការក្រើនរំឭកឱ្យបងប្អូនយើងឃើញថាការងារនេះវាលំបាក អ៊ីចឹងវាហត់នឿយ អ៊ីចឹងហើយយើងក៏កំពុងជំរុញយុទ្ធនាការសម្អាតបរិស្ថានរបស់យើងដែរ»។
លោកបន្តថា ពាក់ព័ន្ធនឹងការងារបរិស្ថាននេះ លោកក៏បានជម្រាបដល់និស្សិតហែម សុភេម ផងដែរថា អ្វីដែលគាត់កំពុងធ្វើជារឿងល្អមួយ ហើយលោកគាំទ្រ និងចង់ឱ្យមានការចូលរួមបែបនេះបន្តទៀត ប៉ុន្តែការប្រមូលកាកសំណល់ប្លាស្ទិកអណ្តែតទឹកនៅតាមប្រឡាយទឹកស្អុយរបស់ក្រុមគាត់ក៏នៅតែមិនអស់ដែរ។ ដូច្នេះហើយលោកត្រូវប្រើគ្រឿងចក្របន្ថែមក្នុងការប្រមូលយកទៅចាក់ចោលនៅទីលានចាក់សំរាមក្នុងខណ្ឌដង្កោទាំងអស់។
លោកប្រាប់ថា៖ «អ្វីដែលគាត់ចូលរួមគឺជាបុគ្គលបរិស្ថានល្អដើម្បីបំផុសបន្ថែមឱ្យប្រជាពលរដ្ឋយើងកុំបោះសំរាមកាកសំណលចោលផ្តេសផ្តាស។បើកាលណាយើងអត់បោះចោលវាក៏អត់មានសំរាមហូរទៅដល់ក្នុងទឹកដែរ។អ៊ីចឹងយើងទុកដាក់វាក្នុងធុងសំរាមឱ្យបានត្រឹមត្រូវទើបជាការល្អប្រសើរ»។
លោកបានថ្លែងថា ថង់ប្លាស្ទិកវាចំណាយពេលដល់រាប់សិបឆ្នាំទើបរលួយហើយប្លាស្ទិកមួយចំនួនទៀតរហូតដល់រាប់រយឆ្នាំក៏នៅមិនរលាយដែរ។ដូច្នេះវាបានបង្កផលវិបាកច្រើនទើបបានជាក្រសួងក៏ដូចជា មន្ទីរបរិស្ថានរាជធានីភ្នំពេញរៀបចំយុទ្ធនាការជាការចាំបាច់មួយដើម្បីកាត់បន្ថយសំណល់ប្លាស្ទិក។
លោកបានឱ្យដឹងទៀតថា បច្ចុប្បន្នលោកបានដើរបំពាក់ម៉ាស៊ីនចម្រោះទឹកស្អាតនៅតាមសាលារៀនក្នុងរាជធានីភ្នំពេញដែលមានសិស្សានុសិស្សរាប់ម៉ឺននាក់បាននិងកំពុងប្រើប្រាស់។នេះគឺជាការកាត់បន្ថយសំណល់ប្លាស្ទិកដ៏សំខាន់នេះ។ ចំពោះសំណល់ប្លាស្ទិកដែលប្រមូលបានគឺយកទៅចាក់ចោលនៅទីលានសំរាមក្នុងខណ្ឌដង្កោ៕
