ជនរងគ្រោះបើកបរតាម Google Maps បណ្ដាលឱ្យស្លាប់បាត់បងជីវិតនៅរដ្ឋ North Carolina កាលពីឆ្នាំ ២០២២។
គ្រួសាររបស់បុរសដែលបានលង់ទឹកស្លាប់ក្នុងឆ្នាំ ២០២២ បានប្តឹងក្រុមហ៊ុន Google ពីបទធ្វេសប្រហែស បន្ទាប់ពីបុរសរូបនោះបើកឡានធ្លាក់ពីលើស្ពានបាក់មួយ ខណៈពេលដែលធ្វើដំណើរតាមទិសដៅណែនាំរបស់ Google Maps នៅរដ្ឋ North Carolina។
ក្រុមគ្រួសារបុរសរូបនេះបាននិយាយថា ការបរាជ័យរបស់ក្រុមហ៊ុនក្នុងការធ្វើបច្ចុប្បន្នភាពផែនទីរបស់ខ្លួនបានធ្វើឱ្យសមាជិកគ្រួសាររបស់ខ្លួនបាត់បង់ជីវិត។
ជនរងគ្រោះរូបនោះមានឈ្មោះថា Philip Paxson អាយុ ៤៧ ឆ្នាំ ជាបុគ្គលិកផ្នែកលក់ឧបករណ៍វេជ្ជសាស្ត្រ។ Philip បានជួបឧបទ្ទវហេតុនេះអំឡុងពេលធ្វើដំណើរទៅផ្ទះ ក្រោយចេញពីកម្មវិធីជប់លៀងខួបកំណើតទី៩ របស់កូនស្រីនៅតំបន់ Hickory រដ្ឋ North Carolina នៅថ្ងៃទី ៣០ ខែកញ្ញា ឆ្នាំ ២០២២។
បើយោងតាមពាក្យបណ្ដឹងដែលត្រូវបានដាក់នៅតុលាការជាន់ខ្ពស់របស់ Wake County កាលពីថ្ងៃអង្គារ បានរៀបរាប់បន្ថែមថា Philip ធ្វើដំណើរពេលយប់ដែលមានភ្លៀងធ្លាក់ខ្លាំងលើផ្លូវ និងជាផ្លូវមិនធ្លាប់ស្គាល់ ក្រោយមកឡានរបស់លោកបានធ្លាក់ចូលទៅក្នុងព្រែក ហើយលង់ទឹកស្លាប់តែម្តង។
អ្នកស្រី Alicia Paxson ដែលជាភរិយារបស់លោក Philip បានប្តឹងអាជីវកម្មចំនួន ២ និងបុគ្គលម្នាក់ ដោយពាក្យបណ្ដឹងនោះសំដៅទៅលើម្ចាស់ក្រុមហ៊ុន និងអ្នកគ្រប់គ្រង ឬទទួលខុសត្រូវលើស្ពានដែលបាក់រលំ ដែលមិនមានស្លាកសញ្ញា គ្មានរបាំងការពារនោះ។
អ្នកស្រី Paxson បានរៀបរាប់ឱ្យដឹងថា ក្រោយគ្រោះថ្នាក់នេះ និងបន្ទាប់ពីស្វែងរកទូរស័ព្ទប្តីរបស់ខ្លួនឃើញ អ្នកស្រីដឹងច្បាស់ថា ស្វាមីរបស់ខ្លួនបានប្រើ Google Maps រកទិសដៅទៅផ្ទះ។
ដោយឡែក នៅក្នុងសេចក្តីថ្លែងការណ៍មួយថា អ្នកនាំពាក្យរបស់ Google លោក José Castañeda បាននិយាយ និងបង្ហាញពីការអាណិតអាសូរយ៉ាងជ្រាលជ្រៅបំផុតចំពោះគ្រួសាររបស់អ្នកស្រី Paxson។ លើសពីនេះអ្នកនាំពាក្យរូបនេះបន្ថែមថា គោលដៅរបស់ខ្លួនគឺព្យាយាមផ្តល់ព័ត៌មានកំណត់ផ្លូវត្រឹមត្រូវក្នុងផែនទី ហើយក្រុមហ៊ុនក៏កំពុងពិនិត្យមើលពាក្យបណ្ដឹងនេះផងដែរ៕
