សកម្មភាពរត់ប្រណាំងនៅថ្ងៃទី ៨ ខែតុលា។ ហុង មិនា
ភ្នំពេញ: វិថីក្នុងទីក្រុងកោះពេជ្រ រាជធានីភ្នំពេញ មានភាពអធិកអធមកាលពីថ្ងៃអាទិត្យទី ៨ ខែតុលា ឆ្នាំ ២០២៣ ក្រុមហ៊ុន Marriott Bonvoy ជាក្រុមបដិសណ្ឋារកិច្ចដែលសណ្ឋាគារប្រណីតនៅកម្ពុជា បានរៀបចំសកម្មភាពសប្បុរសធម៌ «Road to Give 2023»។
ព្រឹត្តិការណ៍នេះមានគោលបំណងរៃអង្គាសថវិកាសំខាន់ៗសម្រាប់មូលនិធិកុមារកម្ពុជា (CCF) ជាអង្គការជួយដល់កុមារក្រីក្រតាមរយៈការអប់រំ និងការលើកកម្ពស់សុខុមាលភាពទូទៅរបស់ពួកគេ។កម្មវិធីរត់សប្បាយៗដែលទាក់ទាញអ្នកចូលរួមគ្រប់វ័យ និងគ្រប់ស្រទាប់វណ្ណៈនោះ ត្រូវបានចូលរួមដោយវត្តមានរបស់លោក សំហេង បុរស រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា។
ថ្លែងក្នុងព្រឹត្តិការណ៍ «Road to Give 2023» នៅកោះពេជ្រ លោក សំហេង បុរស បានលើកឡើងថា កម្មវិធីនេះ រៀបចំដោយសណ្ឋាគារ Courtyard និង Fairfield ដើម្បីប្រមូលថវិកាជូនដល់អង្គការមូលនិធិកុមារកម្ពុជា (CCF) ដើម្បីជួយដល់កុមារជួបការលំបាកឱ្យទទួលបានការអប់រំ និងលើកកម្ពស់ជីវភាពរស់នៅ។
លោកបានថ្លែងថា ៖«ការចូលរួមថ្ងៃនេះមានអត្ថន័យ ២ សម្រាប់រូបខ្ញុំក៏ដូចជា រាជរដ្ឋាភិបាលកម្ពុជា គឺវាជាសកម្មភាពគំរូដល់កូនខ្មែរយើងដែលលើកទឹកចិត្ដបងប្អូនដទៃទៀតស្រឡាញ់សុខភាព។ មួយវិញទៀត ប្រសិនបើកូនខ្មែរបង្កើតកម្មវិធីសប្បុរសធម៌បែបនេះច្រើន ដើម្បីរៃអង្គាសប្រាក់ដើម្បីជួយកូនខ្មែរផ្សេងៗទៀតដែលជួបការលំបាក»។
គាំទ្រដោយសណ្ឋាគារ Courtyard by Marriott Phnom Penh និង Fairfield by Marriott Phnom Penh កម្មវិធី «Road to Give 2023» គឺជាការរត់ចម្ងាយ ៥ គីឡូម៉ែត្រ ចាប់ផ្តើមនៅកោះពេជ្រទល់មុខ The Elysee ក្នុងរាជធានីភ្នំពេញ។
ការចូលរួមដែលចំណាយម្នាក់ ១០ ដុល្លារ អ្នកចូលរួមទទួលបានអាវយឺត ១ អាហារពេលព្រឹក១កញ្ចប់ ស្លាកលេខ វិញ្ញាបនបត្រ និងមេដាយសម្រាប់អ្នកឈ្នះដំបូងទាំង ១០ នាក់ រួមជាមួយពានរង្វាន់សម្រាប់អ្នកឈ្នះកំពូលទាំង ៣។
អ្នកស្រី Sarah Moya អ្នកគ្រប់គ្រងទូទៅនៃសណ្ឋាគារ Courtyard by Marriott Phnom Penh បានបង្ហាញការដឹងគុណ និងថ្លែងអំណរគុណចំពោះការគាំទ្រដ៏លើសលប់ដែលចូលរួមក្នុងកម្មវិធីរត់ ដើម្បីសប្បុរសធម៌នេះ។
អ្នកស្រីបានថ្លែងថា៖ «យើងមានមោទនភាពយ៉ាងខ្លាំងចំពោះភាពជោគជ័យនៃ ''ROAD TO GIVE''ឆ្នាំនេះ។ ការចូលរួម និងភាពសប្បុរសរបស់លោកអ្នករត់ប្រណាំង អ្នកឧបត្ថម្ភ និងសហគមន៍មូលដ្ឋានពិតជាមានការផុសផុល»។
អ្នកស្រីបានបញ្ជាក់ថា៖ «នៅ Marriott International យើងប្តេជ្ញាចិត្តយ៉ាងជ្រាលជ្រៅក្នុងការផ្តល់ត្រឡប់ទៅសហគមន៍ដែលយើងបម្រើហើយព្រឹត្តិការណ៍នេះបង្ហាញពីការយកចិត្តទុកដាក់របស់យើងក្នុងការធ្វើឱ្យមានភាពខុសប្លែកគ្នាដ៏មានន័យក្នុងជីវិតរបស់កុមារក្រីក្រ»។
ប្រាក់ចំណូលទាំងអស់ពីព្រឹត្តិការណ៍នេះនឹងត្រូវបញ្ជូនទៅមូលនិធិកុមារកម្ពុជាជាអង្គការមិនស្វែងរកប្រាក់ចំណេញ ដែលធ្វើសកម្មភាពយ៉ាងសកម្មក្នុងការជួយដល់កុមារ និងគ្រួសារដែលរស់នៅក្នុងភាពក្រីក្របំផុត។
បន្ថែមពីលើការលើកកម្ពស់សុខភាព និងសុខុមាលភាពព្រឹត្តិការណ៍ «Road to Give 2023» ក៏បានផ្តល់ឱកាសអ្នកចូលរួមបានជួយដល់សហគមន៍មូលដ្ឋានផងដែរ។
លោក ស្កុត នីសុន ស្ថាបនិក និងជានាយកប្រតិបត្តិនៃមូលនិធិកុមារកម្ពុជា បានបង្ហាញការដឹងគុណចំពោះអ្នករៀបចំព្រឹត្តិការណ៍នេះ ដោយលោកបញ្ជាក់ថា៖ «ខ្ញុំពិតជាមានអំណរគុណយ៉ាងជ្រាលជ្រៅចំពោះអ្នករៀបចំព្រឹត្តិការណ៍នេះ ដូចជា Marriott International,Courtyard by Marriott, Fairfield by Marriott និង OCIC»។
លោកបានបន្ដថា៖ «វាពិតជាអស្ចារ្យណាស់ដែលមូលនិធិកុមារកម្ពុជាត្រូវបានជ្រើសរើសជាដៃគូទទួលយកជំនួយសប្បុរសនេះ។ ខ្ញុំសូមជូនពរអ្នកគ្រប់គ្នា និងសូមឱ្យពួកគេរត់បានឆ្ងាយ»។
អ្នកនាង Claudia Turkington អ្នកគ្រប់គ្រងផ្នែកទំនាក់ទំនងដៃគូ និងម្ចាស់ជំនួយសម្រាប់ CCF បានលើកឡើងពីបេសកកម្មរបស់អង្គការក្នុងការធានាឱ្យមានលទ្ធភាពទទួលបានការអប់រំសម្រាប់កុមារដែលរស់នៅក្នុងភាពក្រីក្រខ្លាំងនៅក្នុងរាជធានីភ្នំពេញ។
អ្នកនាងបានថ្លែងថា៖ «ខ្ញុំចង់និយាយអរគុណយ៉ាងជ្រាលជ្រៅចំពោះអ្នកគ្រប់គ្នាដែលនៅទីនេះថ្ងៃនេះ ក៏ដូចជា Courtyard by Marriott និង Fairfield by Marriott និងដៃគូទាំងអស់ដែលធ្វើឱ្យព្រឹត្តិការណ៍នេះកើតឡើង»។
ក្នុងចំណោមមនុស្សរាប់រយនាក់ដែលបានចូលរួមការរត់យ៉ាងសប្បាយ លោក ប៉ែន សុផាត ជាអ្នកហាត់ប្រាណបានក្លាយជាអ្នកឈ្នះព្រឹត្តិការណ៍នេះនៅពេលលោកសម្រេចបាននៅ ១៧,០៥ នាទី។
យុវជនក្នុងក្រុម «ស៊ូៗ» ដែលមានសមាជិកប្រមាណជាង ១០ នាក់ចូលរួមក្នុងការរត់សប្បុរសនេះ បានប្រាប់ ភ្នំពេញ ប៉ុស្ដិ៍ថា៖ «ខ្ញុំរមែងចូលរួមរត់ក្នុងកម្មវិធីសប្បុរសធម៌។ វាផ្ដល់អត្ថប្រយោជន៍ចំពោះសុខភាពផង សប្បាយរីករាយផង និងរួមគ្នាកសាងអំពើល្អផងដែរ»។
មនុស្សជាង ៦៥០ នាក់បានចុះឈ្មោះជាផ្លូវការទៅកាន់ «Road to Give 2023» រួមទាំងក្រុមហ៊ុនឧបត្ថម្ភ និងដៃគូ។
អ្នកស្រី Ria Sari ជំនួយការនាយកប្រតិបត្ដិសណ្ឋាគារ Courtyard by Marriott Phnom Penh បានប្រាប់ ភ្នំពេញ ប៉ុស្តិ៍ថា៖ «យើងមានអ្នករត់ប្រណាំងដែលបានចុះឈ្មោះចំនួន ៤២០ នាក់ បូកនឹងអ្នកចូលរួមពីក្រុមហ៊ុនឧបត្ថម្ភ ២៣០ នាក់។ ប៉ុន្តែពួកគេមួយចំនួនគ្រាន់តែចង់ធ្វើការបរិច្ចាគប៉ុណ្ណោះ»៕
