ភ្នំពេញ៖ ក្រុមចម្រៀងអន្តរជាតិដ៏ល្បីឈ្មោះ Musica Felice បានត្រឡប់មកឆាកវិញជាមួយនឹងការប្រគំតន្ត្រីសប្បុរសធម៌លើកទី ១៣ របស់ពួកគេ «Music & Soul» ដែលគ្រោងធ្វើនៅថ្ងៃអាទិត្យ ទី ២០ ខែតុលានេះ។
កម្មវិធីតន្ត្រីដ៏ពេញនិយមនេះបានក្លាយជាចំណុចលេចធ្លោនៃទិដ្ឋភាពវប្បធម៌ក្នុងរាជធានីភ្នំពេញ ដែលទាក់ទាញអ្នកចូលចិត្តតន្ត្រីទូទាំងទីក្រុង។
ការប្រគំតន្ត្រីនៅឆ្នាំនេះនឹងមានការលាយបញ្ចូលគ្នានៃបទចម្រៀងជាច្រើនចាប់ពីបទបុរាណ ច្រៀងដោយ Édith Piaf ដល់ចម្រៀងបែបទំនើបពី Alicia Keys ជាមួយនឹងការសម្ដែងដ៏ភ្ញាក់ផ្អើលដើម្បីទាក់ទាញទស្សនិកជន។
ការបន្ថែមភាពរំជើបរំជួលគឺការសម្ដែងផ្ទាល់នៃឈុតឆាកពីខ្សែភាពយន្តដ៏ល្បីល្បាញ និងតន្ត្រី Dreamgirls ដែលនាំមកជីវិតដោយក្រុមសម្តែងដ៏មានទេពកោសល្យ។
រៀបចំឡើងនៅក្នុងសាល Grand Ballroom នៃសណ្ឋាគារ សូហ្វីតែល ភ្នំពេញ ភូគីត្រា ដែលសហការរៀបចំព្រឹត្តិការណ៍ ««Music & Soul» ជារាត្រីជួបជុំគ្រួសារ ក្នុងគោលបំណងទាំងការកម្សាន្ត និងកម្មវិធីសប្បុរសធម៌។
ការបរិច្ចាកសំបុត្រមានចាប់ពី ៣ ដុល្លារដល់ ៣០ ដុល្លារ ហើយប្រាក់ចំណូលទាំងអស់នឹងយកទៅជួយដល់អង្គការកម្ពុជាចំនួនពីរដែលបំពេញបេសកកម្មជួយកុមារ និងយុវជនដែលខ្វះខាត។
អ្នកស្រី Miwako Fujiwara ស្ថាបនិក អ្នកដឹកនាំរឿង និងជាផលិតករ Musica Felice បានឱ្យដឹងថា៖ «យើងពិតជារំភើបក្នុងការនាំយកតន្ត្រីដ៏សម្បូរបែបនេះមកលើឆាក ទាំងអស់ក្នុងនាមនៃការជួយកុមារ និងយុវជនខ្វះខាត»។
អ្នកស្រីបានបន្ដថា៖ «ក្រុមចម្រៀង និងតួសម្តែងរបស់យើងបានធ្វើការដោយមិននឿយហត់ ដើម្បីធានាថាទស្សនិកជនរីករាយនឹងការសម្តែងដែលបំផុសគំនិតជួយសង្គម និងមិនអាចបំភ្លេចបាន»។
ការសម្ដែងឆ្នាំនេះមានសមាជិកក្រុមចម្រៀងចំនួន ២៨ នាក់ និងអ្នកសម្ដែងចំនួន ១០ នាក់ ដែលតំណាងឱ្យ ១៩ សញ្ជាតិផ្សេងៗគ្នា ដែលបានស្ម័គ្រចិត្តក្នុងរយៈពេល ៣ ខែកន្លងមកនេះ ដើម្បីរៀបចំសម្រាប់រាត្រីដ៏ពិសេសនេះ។
អ្នកស្រី Fujiwara បន្ថែមថា៖ «ខ្ញុំពិតជាមានមោទនភាពណាស់ដែលមានក្រុមចម្រុះបែបនេះបានរួមចំណែកពេលវេលា និងទេពកោសល្យរបស់ពួកគេ មិនត្រឹមតែដើម្បីអបអរសាទរសិល្បៈប៉ុណ្ណោះទេ ប៉ុន្តែដើម្បីជួយផ្តល់ឱកាសថ្មីៗដល់កុមារ និងយុវជនកម្ពុជា"Fujiwara បន្ថែម»។
Musica Felice ជាអង្គការក្នុងស្រុកដែលបានចុះបញ្ជីក្នុងប្រទេសកម្ពុជាបានឧទ្ទិសដល់សប្បុរសជនតាំងពីចាប់ផ្តើមនៅឆ្នាំ ២០១៧ ដោយបរិច្ចាគជិត ១១៧,០០០ ដុល្លារដល់បុព្វហេតុនានា។
អ្នកទទួលផលមួយនៃការប្រគំតន្ត្រីនេះគឺអង្គការសាលាទន្សាយ The Rabbit School ដែលបានផ្តល់ការអប់រំ និងតស៊ូមតិដល់កុមារដែលមានពិការភាពបញ្ញា និងជំងឺអូទីស្សឹមក្នុងប្រទេសកម្ពុជាអស់រយៈពេលជាង ២៥ ឆ្នាំមកហើយ។
សាលាដំណើរការក្នុង ១៦ ទីតាំង ដោយផ្តល់ការអប់រំឯកទេសដល់សិស្សជាង ៧០០ នាក់ដែលមានតម្រូវការពិសេស។
ដោយសារតម្រូវការសេវាកម្មរបស់ពួកគេកើនឡើងជាបន្តបន្ទាប់ លោក ទូច ហ៊ុន នាយកប្រតិបត្តិ និងជាស្ថាបនិកបានថ្លែងអំណរគុណចំពោះការគាំទ្រ។
លោក ទូច ហ៊ុន បាននិយាយថា៖ «ការរួមចំណែករបស់ Musica Felice នឹងមិនត្រឹមតែផ្តល់ជំនួយផ្នែកហិរញ្ញវត្ថុដ៏សំខាន់ប៉ុណ្ណោះទេ ប៉ុន្តែថែមទាំងជួយផ្សព្វផ្សាយការយល់ដឹងអំពីបេសកកម្មរបស់យើងក្នុងការធានាឱ្យមានការអប់រំស្មើភាពគ្នាសម្រាប់កុមារទាំងអស់ ដោយមិនគិតពីសមត្ថភាពរបស់ពួកគេ»។
អ្នកទទួលផលទីពីរគឺ Project Khmer H.O.P.E. ជាអង្គការលើកកម្ពស់ជីវិតកុមារកំព្រា និងកុមារជួបការលំបាក ដោយផ្តល់ឱ្យពួកគេនូវការបណ្តុះបណ្តាលវិជ្ជាជីវៈ និងជំនាញដែលបើកទ្វារទៅរកឱកាសការងារ និងជួយបំបែកវដ្តនៃភាពក្រីក្រ។
អ្នកនាង Susan Goh ប្រធានមជ្ឈមណ្ឌល និងបដិសណ្ឋារកិច្ច បាននិយាយថា៖ «យើងមានកិត្តិយសណាស់ដែលត្រូវបានជ្រើសរើសជាអ្នកទទួលផលពីការប្រគំតន្ត្រីរបស់ Musica Felice។ ការគាំទ្ររបស់ពួកគេពិតជានឹងធ្វើឱ្យមានការផ្លាស់ប្តូរ នៅពេលដែលយើងបន្តបង្កើតអនាគតដ៏ភ្លឺស្វាងសម្រាប់យុវជនរបស់កម្ពុជា»។
ការប្រគំតន្ត្រីចាប់ផ្តើមនៅម៉ោង ៤:៣០ រសៀល នៅថ្ងៃអាទិត្យ ទី ២០ ខែតុលា ឆ្នាំ ២០២៤។ សម្រាប់ព័ត៌មានបន្ថែម និងការទិញសំបុត្រ ឬធ្វើការបរិច្ចាគ សូមចូលទៅកាន់គេហទំព័រ www.musicafelice.org/concert/13។