ភ្នំពេញ៖ ព្រឹត្ដិការណ៍សំណេរអង្គរលើកទីពីរ នឹងត្រូវរៀបចំឡើងនៅថ្ងៃអាទិត្យ ទី១៩ ខែមករា ឆ្នាំ២០២៥ នៅទីតាំងលើស្ពានហាលនៃប្រាសាទអង្គរវត្ដ។
អ្វីដែលខុសគ្នារវាងរដូវកាលទីមួយ ការប្រកួតលើកទីពីរនេះ ត្រូវបានបែកចែកជាពីរក្រុមផ្សេងគ្នា ដោយក្រុមទីមួយ បេក្ខជនមានអាយុ ១៨ឆ្នាំចុះក្រោយ ដោយមិនកំណត់អាយុទាបបំផុតនោះទេ ហើយមួយក្រុមទៀតគឺអាយុ ១៩ឆ្នាំឡើង។
លោក លឹម ប៊ុនហុក រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិបាននិយាយក្នុងសន្និសីទកាលពីថ្ងៃទី ១៦ ខែតុលាថា៖ «យើងមិនកំណត់អាយុទាបបំផុតនោះទេ ឱ្យតែចេះសរសេរអក្សរខ្មែរ មានចិត្ដក្លាហាន និងគិតថា ខ្លួនឯងមានសមត្ថភាព ហើយមួយក្រុមទៀតអាយុ ១៩ ឡើងលើដោយមិនកំណត់ត្រឹមណាទេ»។
លោកបានឱ្យដឹងថា ការទទួលពាក្យចាប់ផ្ដើមពីថ្ងៃទី ១៦ រហូតដល់បំណាច់ខែធ្នូឆ្នាំ២០២៤ ដែលរៀបចំឡើងដោយក្រសួងការបរទេស និងកិច្ចសហប្រតិបត្ដិការអន្ដរជាតិ សហការជាមួយក្រសួងអប់រំ យុវជន និងកីឡា ក្រសួងវប្បធម៌ និងវិចិត្រសិល្បៈ រួមទាំងក្រសួងទេសចរណ៍។
ដោយមិនមានថវិកាក្នុងការរៀបចំ លោក ប៊ុនហុក បានស្នើឱ្យបេក្ខជនចេញប្រាក់វិភាគទានចំណាយលើការអាវយឺតផ្ទាល់ខ្លួនដើម្បីពាក់ចូលរួមប្រកួតតម្លៃ ២ម៉ឺនរៀល។
លោក ហួ ឈុនគ្រី អគ្គធិការនៃអគ្គនាយកដ្ឋានក្រសួងអប់រំ យុវជន និងកីឡា បានឱ្យដឹងថា ក្រសួងបានគាំទ្រដល់ការងារបច្ចេកទេសក្នុងដំណើរការនៃការរៀបចំការប្រកួតសរសេរតាមអាន។
លោកបាននិយាយថា៖ «ក្រសួងអប់រំ យុវជន និងកីឡា បានរៀបចំរួចរាល់ហើយចំពោះលក្ខណៈបច្ចេកទេស ដោយរង់ចាំតែពេលវេលាមកដល់ យើងដំណើរការតែម្ដង»។
លោក ឈុនគ្រី ជាប្រធានគណមេប្រយោគ បានកម្មវិធីសំណេរអង្គរ បានកំណត់យកបេក្ខជនចន្លោះពី១០០០ ទៅ ១៥០០នាក់ បើធៀបនឹងឆ្នាំ២០២៣ លើសមុនប្រមាណ៥០០នាក់។
ចំពោះវិញ្ញសារសរសេរតាមដាន ក្រសួងការបរទេសជាអ្នកផ្ដួចផ្ដើមបំផុសប្រធានបទ ខណៈក្រសួងអប់រំ ពិនិត្យក្របខ័ណ្ឌលក្ខណៈបច្ចេកទេស រួមទាំងរបៀបនៃការអានដើម្បីឱ្យបេក្ខជនសរសេរតាម ដោយមានការឯកភាពជាមួយក្រសួងវប្បធម៌ និងវិចិត្រសិល្បៈ។
ព្រឹត្តិការណ៍កាលពីឆ្នាំមុន ដែលបានធ្វើឡើងនៅស្ពានហាលនៃប្រាសាទអង្គរវត្តបានប្រារព្ធពិធីអបអរសាទរបេតិកភណ្ឌអក្សរសាស្ត្ររបស់ព្រះរាជាណាចក្រក្រោមប្រធានបទ «អរិយធម៌អង្គរខ្មែរ»។
ការប្រកួតឆ្នាំ ២០២៣ បានទាក់ទាញបេក្ខជនដែលមានអាយុចាប់ពី ៧ ឆ្នាំ និងអាយុ ៦៧ ឆ្នាំ ដោយមានរង្វាន់រាប់ចាប់ពីរង្វាន់សាច់ប្រាក់រហូតដល់ការស្នាក់នៅសណ្ឋាគារប្រណីត។
លោក ចេង រតនា អាយុ ២៨ ឆ្នាំ បានឈ្នះរង្វាន់ធំ បន្ទាប់ពីបង្កើតកំហុសតែពីរប៉ុណ្ណោះក្នុងការសរសេរតាមអានរបស់លោក។
រដ្ឋមន្ត្រីក្រសួងវប្បធម៌ និងវិចិត្រសិល្បៈ លោកស្រី ភឿង សកុណា បានបើកព្រឹត្តិការណ៍កាលពីឆ្នាំ២០២៣ មុនពេលអានអត្ថបទសរសេរតាមអានដល់បេក្ខជន។
លោកស្រីបានថ្លែងថា៖ «ប្រជាជនកម្ពុជាបានធ្វើការយ៉ាងខ្ជាប់ខ្ជួនដើម្បីថែរក្សាអក្សរសិល្ប៍ជាតិរបស់យើងតាំងពីការចាប់ផ្តើមរហូតដល់សម័យអាណានិគមបារាំង នៅពេលដែលអ្នកខ្លះព្យាយាមបំប្លែងវាទៅជាអក្សរឡាតាំង។ ប្រជាជនរបស់យើង រួមទាំងព្រះសង្ឃ បានខិតខំការពារភាសាខ្មែរជាយូរយារណាស់មកហើយ។ វាជាផ្នែកដ៏មានតម្លៃនៃអត្តសញ្ញាណជាតិរបស់យើង។ ដរាបណាវាត្រូវបានគេលើកតម្កើង ខ្លឹមសារ និងអក្សររបស់ជាតិនៅស្ថិតស្ថេរ»៕