ការចូលរួមរបស់បេក្ខជនតាំងពីអាយុ ៧ឆ្នាំ រួមទាំងជនមានពិការភាពក្នុងការប្រកួតសរសេរតាមអានថ្នាក់ជាតិលើកទី ១ កាលពីឆ្នាំ២០២៣។ រូបថត ភ្នំពេញប៉ុស្ដិ៍
ភ្នំពេញ៖ ការប្រកួតប្រជែងសរសេរតាមអានអក្សរខ្មែរថ្នាក់ជាតិលើកទី២ ដែលគ្រោងរៀបចំនៅថ្ងៃអាទិត្យ ទី១៩ ខែមករា ឆ្នាំ២០២៥ នៅស្ពានហាលនៃប្រាសាទអង្គរវត្ត ទាក់ទាញអ្នកចុះឈ្មោះចំនួន ៣៥០ នាក់គិតពីថ្ងៃទី១៦ ដល់ថ្ងៃទី ២០ ខែតុលាម្សិលមិញនេះ។
លោក លាង ដឺលុច នាយកប្រតិបត្តិក្លឹបអ្នកកាសែតកម្ពុជា (CCJ) បានឱ្យដឹងថា៖ «ក្នុងចំណោមអ្នកចុះឈ្មោះ ក្មេងជាងគេគឺជាក្មេងប្រុសអាយុ ៦ឆ្នាំ មកពីទីក្រុងភ្នំពេញ ហើយអ្នកចាស់ជាងគេគឺបុរសអាយុ ៧២ឆ្នាំ មកពីខេត្តសៀមរាប»។ .
វាបានបំបែកកំណត់ត្រានៃការប្រកួតប្រជែងឆ្នាំ ២០២៣ រួចហើយដែលឃើញបេក្ខភាពក្មេងជាងគេអាយុ ៧ឆ្នាំ និងអាយុ ៦៧ ឆ្នាំ។
លោក ដឺលុច ដែលសម្របសម្រួលការផ្សាយព័ត៌មានសម្រាប់ព្រឹត្តិការណ៍នេះ បាននិយាយថា នេះបានបង្ហាញពីការចាប់អារម្មណ៍កាន់តែខ្លាំងឡើងនៅក្នុងការប្រកួតប្រជែង។
លោកបានកត់សម្គាល់ថា៖ «យើងឃើញមនុស្សគ្រប់វ័យចូលរួមតាំងពីកុមាររហូតដល់មនុស្សចាស់ ដែលនេះបង្ហាញថា ការសរសេរតាមដានអក្សរខ្មែរនៅតែមានការស្រឡាញ់រាប់អានច្រើនជំនាន់»។
បេក្ខជនជាង ៧០០នាក់បានចូលរួមប្រកួតប្រជែងសរសេរតាមដាននៅស្ពានហាលនៃប្រាសាទអង្គរវត្ដក្រោមប្រធានបទ «អរិយធម៌អង្គរខ្មែរ»។ រូបថត ភ្នំពេញប៉ុស្ដិ៍
ការប្រកួតប្រជែងនៅឆ្នាំនេះណែនាំទម្រង់ថ្មី ដោយអ្នកចូលរួមចែកចេញជាពីរក្រុម៖ អ្នកដែលមានអាយុចាប់ពី ១៨ ឆ្នាំចុះក្រោមដោយគ្មានកំណត់ និងក្រុមដែលមានអាយុចាប់ពី ១៩ ឆ្នាំឡើងទៅ។
លោក លឹម ប៊ុនហុក រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ បានសង្កត់ធ្ងន់ថា មិនមានអាយុអប្បបរមាសម្រាប់ក្រុមក្មេងនោះទេ ដោយស្វាគមន៍ចំពោះអ្នកដែលមានអារម្មណ៍ជឿជាក់លើជំនាញសរសេរភាសាខ្មែររបស់ពួកគេ។
លោកបានឱ្យដឹងថា៖ «យើងចង់លើកទឹកចិត្តអ្នករាល់គ្នាដែលមានជំនឿថាអាចសរសេរជាភាសាខ្មែរឲ្យចូលរួម។ សម្រាប់ក្រុមទី២ មិនមានការកំណត់អាយុខ្ពស់ទេ ដែលធ្វើឱ្យព្រឹត្តិការណ៍នេះបើកចំហសម្រាប់មនុស្សគ្រប់វ័យ»។
កុមារីអាយុ៧ឆ្នាំម្នាក់ក្នុងចំណោមអ្នកប្រកួតជាង ៧០០នាក់កាលពីឆ្នាំ២០២៣។ រូបថត ភ្នំពេញប៉ុស្ដិ៍
កម្មវិធីសម្រាប់ព្រឹត្តិការណ៍នេះ ដែលរៀបចំដោយសហការជាមួយក្រសួងអប់រំ យុវជន និងកីឡា ក្រសួងវប្បធម៌ និងវិចិត្រសិល្បៈ ក៏ដូចជាក្រសួងទេសចរណ៍ នឹងនៅតែបើករហូតដល់ចុងខែធ្នូ ឆ្នាំ ២០២៤។
ដោយមិនមានថវិកាក្នុងការរៀបចំ លោក ប៊ុនហុក បានស្នើឱ្យបេក្ខជនចេញប្រាក់វិភាគទានចំណាយលើការអាវយឺតផ្ទាល់ខ្លួនដើម្បីពាក់ចូលរួមប្រកួតតម្លៃ ២ម៉ឺនរៀល។
ទោះបីជាមានការខ្វះខាតថវិកាផ្លូវការក៏ដោយ ព្រឹត្តិការណ៍នេះត្រូវបានគេរំពឹងថានឹងទាក់ទាញការចាប់អារម្មណ៍យ៉ាងខ្លាំង ដែលលើសពីចំនួនអ្នកចូលរួមប្រកួតកាលពីឆ្នាំមុនចំនួន ៧០០ នាក់។ អ្នករៀបចំសង្ឃឹមថានឹងឃើញអ្នកចូលរួមពី ១ពាន់ទៅ ១៥០០នាក់នៅក្នុងខែមករា។
ការប្រកួតប្រជែងសរសេរតាមអានថ្នាក់ជាតិនៅកាលពីឆ្នាំ២០២៣ មានបេក្ខជនចូលរួមអាយុចាប់ពី ៧ ឆ្នាំដល់ ៦៧ឆ្នាំ។ រូបថត ភ្នំពេញប៉ុស្ដិ៍
លោក ហួ ឈុនគ្រី អគ្គធិការនៃអគ្គនាយកដ្ឋានក្រសួងអប់រំ យុវជន និងកីឡាបានឱ្យដឹងថា ក្រសួងបានគាំទ្រដល់ការងារបច្ចេកទេសក្នុងដំណើរការនៃការរៀបចំការប្រកួតសរសេរតាមអាន និងរៀបចំរួចរាល់ហើយចំពោះលក្ខណៈបច្ចេកទេសជាស្រេច។
លោកបានបន្តថា៖ «យើងបានកំណត់លក្ខណៈបច្ចេកទេស ហើយយើងត្រៀមខ្លួនជាស្រេចដើម្បីបន្តនៅពេលថ្ងៃមកដល់»។
សំណេរអង្គរលើកទីពីរមានគោលបំណងកសាងនូវភាពជោគជ័យនៃការប្រកួតប្រជែងកាលពីឆ្នាំមុន ដែលបានប្រារឰពីបេតិកភណ្ឌអក្សរសាស្ត្រកម្ពុជាក្រោមប្រធានបទ «អរិយធម៌អង្គរខ្មែរ»៕
