អ្នករៀបចំ និងកញ្ញាឯក Miss Grand International ថតរូបជាមួយលោក ហួត ហាក់ រដ្ឋមន្ដ្រីក្រសួងទេសចរណ៍ ក្រោយជំនួបសម្តែងការគួរសម កាលពីថ្អៃទី ៦ ខែតុលា។ MGC
ភ្នំពេញ៖ ក្រសួងទេសចរណ៍កម្ពុជាបានចេញសេចក្តីថ្លែងការណ៍បដិសេធចំពោះការចុះផ្សាយចោទប្រកាន់របស់កាសែត The Nation Thailand នៅថ្ងៃទី៧ ខែតុលា ឆ្នាំ២០២៤។
កាសែតថៃមួយនេះបានចុះផ្សាយថា ក្រសួងទេសចរណ៍កម្ពុជាមិនបានរៀបចំ និងស្វាគមន៍អ្នកចូលរួមកម្មវិធីប្រកួត Miss Grand International 2024 ឱ្យបានត្រឹមត្រូវ ដែលនាំឱ្យកម្ពុជាត្រូវលុបចោលតួនាទីជាប្រទេសម្ចាស់ផ្ទះរៀបចំព្រឹត្តិការណ៍នេះភ្លាមៗ។
យោងតាមការបង្ហោះហ្វេសប៊ុករបស់ The Nation Thailand ហេតុផលមួយក្នុងចំណោមហេតុផលដែលត្រូវបានលើកឡើងសម្រាប់ការលុបចោលគឺអវត្តមានរបស់រដ្ឋមន្ត្រីក្រសួងទេសចរណ៍ក្នុងសន្និសីទសារព័ត៌មានដូចបានសន្យា ក៏ដូចជាការខកខានរបស់មន្ត្រីកម្ពុជាក្នុងការស្វាគមន៍បេក្ខភាពបវរកញ្ញានៅពេលពួកគេបានមកដល់។
ការចោទប្រកាន់ទាំងនេះទាក់ទងនឹងការសម្រេចចិត្តរបស់គណៈកម្មាធិការរៀបចំកម្មវិធី Miss Grand International ក្នុងការផ្លាស់ប្តូរព្រឹត្តិការណ៍ពីប្រទេសកម្ពុជាទៅប្រទេសថៃ។
សេចក្តីប្រកាសព័ត៌មានបានបញ្ជាក់ថា៖ «ក្រសួងទេសចរណ៍ សូមច្រានចោល និងបដិសេដចំពោះការចុះផ្សាយព័ត៌មានខាងលើនេះ ដែលខុសពីការពិតទាំងស្រុង និងបានធ្វើឱ្យប៉ះពាល់យ៉ាងធ្ងន់ធ្ងរដល់កិត្តិយសរបស់ក្រសួងទេសចរណ៍នៃព្រះរាជាណាចក្រកម្ពុជា»។
ក្រសួងបានបំភ្លឺថា តាមពិតទៅ រដ្ឋមន្ត្រីក្រសួងទេសចរណ៍ លោក ហួត ហាក់ បានជួបជាមួយអ្នករៀបចំកម្មវិធី Miss Grand International 2024 និងបេក្ខនារីទាំងអស់នៅថ្ងៃទី៦ ខែតុលា ឆ្នាំ២០២៤ នៅទីស្នាក់ការក្រសួង។
ក្នុងកិច្ចប្រជុំនេះ លោករដ្ឋមន្ត្រីបានស្វាគមន៍យ៉ាងកក់ក្តៅចំពោះអ្នកចូលរួម និងបានពិភាក្សាអំពីឥទ្ធិពលវិជ្ជមាននៃព្រឹត្តិការណ៍នេះក្នុងការលើកកម្ពស់វប្បធម៌ និងទេសចរណ៍របស់កម្ពុជា។
ជាងនេះទៅទៀត ក្រសួងបានសង្កត់ធ្ងន់ថា៖ «ឯកឧត្តមរដ្ឋមន្ត្រីក្រសួងទេសចរណ៍ ពុំធ្លាប់បានសន្យាថានឹងចូលរួមសន្និសីទកាសែត និង/ឬកម្មវិធីណាមួយផ្សេងទៀត ក្រៅអំពីការទទួលជួបសំណេះសំណាល ជាមួយប្រតិភូ និងបេក្ខនារី»។
ក្រសួងក៏បានសម្របសម្រួលកិច្ចសហប្រតិបត្តិការយ៉ាងរលូនជាមួយស្ថាប័នផ្សេងៗ ដើម្បីជួយសម្រួលដល់ការចូល ចេញ និងទស្សនាការប្រកួតរបស់បេក្ខជន។
សេចក្តីថ្លែងការណ៍បាននិយាយថា៖«ក្រសួងទេសចរណ៍ ស្នើឱ្យសារព័ត៌មាន The Nation Thailand កែតម្រូវ និងបញ្ឈប់រាល់ការផ្សាយព័ត៌មានមិនពិតខាងលើ និងត្រូវគោរពក្រមសីលធម៌វិជ្ជាជីវៈសារព័ត៌មានឱ្យបានត្រឹមត្រូវ»។
កញ្ញា ប៊ី សុធារី បេក្ខភាពបវរកញ្ញា Miss Grand Cambodia 2024 និងកញ្ញាឯក Miss Grand International ជួបសម្តែងការគួរសមជាមួយលោក ហួត ហាក់ រដ្ឋមន្ដ្រីក្រសួងទេសចរណ៍ កាលពីថ្អៃទី ៦ ខែតុលា។ MGC
ទំព័រហ្វេសប៊ុក Miss Grand Cambodia (MGC) បង្ហោះរូបថតជាច្រើនសន្លឹកនិងបានសរសេរថា កម្រងរូបភាពក្នុងស្នាមញញឹមនៃជំនួបដ៏កក់ក្តៅជាមួយ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍របស់ស្ថាប័នកញ្ញាឯកដ៏អស្ចារ្យនៃកម្ពុជា និងក្រុមការងារ MGI កាលពីព្រឹកថ្ងៃទី៦ ខែតុលា ឆ្នាំ២០២៤ នេះ។
MGC បានឱ្យដឹងថា៖ «ក្នុងនាមស្ថាប័នជាតិ និងអន្តរជាតិ យើងខ្ញុំសូមថ្លែងអំណរគុណយ៉ាងជ្រាលជ្រៅបំផុតដល់ក្រសួងទេសចរណ៍ក្នុងការផ្តល់កិច្ចសហការគាំទ្រចំពោះដំណើរការរៀបចំព្រឹត្តិការណ៍ប្រកួតបវរកញ្ញាជាប្រវត្តិសាស្ត្រមួយនេះ»។
ហ្វេសប៊ុកនេះបានបន្ដថា៖ «យើងខ្ញុំទទួលបានការស្វាមគមន៍យ៉ាងកក់ក្តៅពីឯកឧត្តមរដ្ឋមន្ត្រី និងសមាជិក សមាជិកាទាំងអស់នៃក្រសួងទេសចរណ៍ប្រចាំព្រះរាជាណាចក្រកម្ពុជា។ យើងខ្ញុំសង្ឃឹមថាព្រឹត្តិការណ៍មួយនេះ នឹងរួមចំណែកលើកស្ទួយវិស័យទេសចរណ៍នៅកម្ពុជាឲ្យកាន់តែល្បីសុះសាយទូទាំងសកលលោក»។
លោកស្រី អ៊ឹម សុគន្ធា ជាអតីតតារាសម្ដែងល្បីឈ្មោះនិងបច្ចុប្បន្នជាម្ចាស់ក្រុមហ៊ុន HK7 បានចុះហត្ថលេខាធ្វើជាអ្នកគ្រប់គ្រងថ្មីក្នុងកម្មវិធី Miss Grand Cambodia បានធ្វើការបកស្រាយក្នុងសន្និសីទកាសែតនៅថ្ងៃទី៩ ខែតុលានេះ។
លោកស្រីបានឱ្យដឹងថា ការសម្រេចចិត្ដធ្វើម្ចាស់ផ្ទះរៀបចំការប្រកួត Miss Grand International (MGI) បីវគ្គ និងបីវគ្គទៀត រៀបចំនៅប្រទេសថៃ ដោយមានការផ្ដល់ជំនួយបច្ចេកទេសពីលោក Nawat Itsaragrisil និងការចំណាយពីភាគីកម្ពុជា។
អ្នករៀបចំ និងកញ្ញាឯក Miss Grand International ជួបសម្តែងការគួរសមជាមួយលោក ហួត ហាក់ រដ្ឋមន្ដ្រីក្រសួងទេសចរណ៍ កាលពីថ្ងៃទី ៦ ខែតុលា។ MGC
លោកស្រីបានអះអាងថា៖ «ខ្ញុំស្រឡាញ់កម្មវិធីនេះ និងចង់ផ្សព្វផ្សាយកម្ពុជាទៅកាន់ពិភពលោក ជាអ្វីដែលខ្ញុំស្រឡាញ់មែនទែន។ កម្មវិធីពីថ្ងៃទី ១ រហូតដល់ថ្ងៃទី ៣ យើងទៅទទួលបវរកញ្ញាពីបណ្ដាប្រទេសនានាដោយរលូត»។
ប៉ុន្ដែភាពមិនប្រក្រតីបានកើតឡើងថ្ងៃទី ៤ នៅពេលលោកស្រី សុគន្ធា ទៅទទួលលោក Nawat នៅ អាកាសយានដ្ឋានអន្ដរជាតិភ្នំពេញជាកំហិតនៅម៉ោង ១១:៣០ ខណៈពេលភ្ញៀវបែរជាដើរគេចពីក្រុមអ្នកទទួល និងចូលរថយន្ដចេញដំណើរទៅបាត់។
នៅថ្ងៃទី៥ ខែតុលា ជាពិធីបំពាក់ឈៀងនៅសណ្ឋាគារសុខាភ្នំពេញ ដែលលោកស្រី សុគន្ធា បានឱ្យដឹងថា វាជាវេលាដ៏លំបាកបំផុត ដែលរបៀបវីរៈ និងកម្មវិធីត្រូវបានផ្លាស់ប្ដូរ រួមទាំងពេលវេលា និងបន្ថែមបរិក្ខា។
លោកស្រី សុគន្ធា បាននិយាយក្នុងសន្និសីទកាសែតថា លោកស្រីបានអញ្ជើញរដ្ឋមន្ដ្រីក្រសួងទេសចរណ៍នៅម៉ោង ៥ល្ងាច ខណៈកម្មវិធីផ្សាយផ្ទាល់នឹងចាប់ផ្ដើមនៅម៉ោង ៦ល្ងាច។ ប៉ុន្ដែលោក Nawat ទាមទារឱ្យបិទសាលអគារនៅសណ្ឋាគារនៅម៉ោង ៤ ដើម្បីធ្វើការផ្សាយផ្ទាល់មុនម៉ោងកំណត់។
លោកស្រីនិយាយទាំងអួលដើមកថា៖ «គាត់ទៅ live កម្មវិធីម៉ោង ៤។ ខ្ញុំ បងប្អូនទាំងអស់ ខ្ញុំនិយាយមែន ញ័រដៃញ័រជើងណាស់ ពីព្រោះខ្ញុំជាអ្នកអញ្ជើញគេ [រដ្ឋមន្ដ្រី] អ្នកធំ គិតមើល។ ខ្ញុំភ័យណាស់ គាត់ធ្វើអ៊ីចឹងដាក់ខ្ញុំ ហើយបើមានបញ្ហា នរណាជាអ្នកដោះស្រាយ មិនខ្ញុំជាអ្នកដោះស្រាយ ពីព្រោះខ្ញុំជាអ្នកអញ្ជើញថ្នាក់ដឹកនាំមក»។
លោកស្រី បានបន្ថែមថា លោករដ្ឋមន្ដ្រីទទួលយកការលុបចោលចំពោះការចូលរួមនោះ។ ប៉ុន្ដែលោក Nawat បែរជាហ៊ាននិយាយថា ថ្នាក់ដឹកនាំមិនចូលរួម និងមិនផ្ដល់កិត្ដិយសឱ្យរូបលោក។ លោកស្រីបានចោទសួរវិញថា៖ «តើនរណាជាអ្នកមិនផ្ដល់កិត្ដិយសដល់ប្រទេសកម្ពុជាពិតប្រាកដ?»។
លោក Nawat Itsaragrisil ប្រធានអ្នករៀបចំកម្មវិធីប្រកួតបវរកញ្ញា Miss Grand និងបវរកញ្ញា Miss Grand International។ MGC
យោងតាមប្រភពព័ត៌មានពីប្រទេសថៃ កញ្ញាឯកថៃបានស្រែកយំពេលទៅដល់អាកាសយានដ្ឋានប្រទេសថៃ និងបានត្អូញត្អែរថា កញ្ញាទទួលទានពងក្រួចដែលមានដង្កូវជាដើម។
លោកស្រី សុគន្ធា ក៏បានបកស្រាយរឿងរ៉ាវដែលផ្ទុះល្បីខ្លាំងចំពោះហេតុការណ៍ជិះទូកនោះថា នៅក្នុងការវិភាគ គ្មានកម្មវិធីជិះទូកនោះទេ តែលោក Nawat ជាអ្នកសំណូមពរផ្ទាល់ និងទទួលទានអាហារនៅលើទូក ទោះបីជាលោកស្រីព្យាយាមបង្វែទៅទីតាំងផ្សេង ដែលស័ក្ដិសមជាងនេះ។
លោកស្រីបានថ្លែងថា៖ «ម៉ោង ៥ល្ងាចជាង មេឃកំពុងភ្លៀង ការតុបតែងផ្សេងៗនៅតុ ត្រូវបានរុះរើចេញ និងបារម្ភពីការរៀបចំឡើងវិញនៅម៉ោង ៧យប់ និងអាចបង្កគ្រោះថ្នាក់ដល់បេក្ខភាពបវរកញ្ញាចំពោះការអិល»។
កញ្ញា ប៊ី សុធារី បេក្ខភាពបវរកញ្ញា Miss Grand Cambodia 2024 បានបញ្ជាក់ថា ការសម្រេចចិត្ដផ្លាស់ប្ដូរទូក ខណៈពេលទូកធំដែលត្រូវបានរៀបចំមិនទាន់ចូលចំណត លោក Nawat ជ្រើសរើសទូកផ្សេង និងទិញពងក្រូច និងសណ្ដែកដីជាដើម។
លោកស្រី សុគន្ធា បានបន្ដថា៖ «ខ្ញុំសូមបញ្ជាក់ថា ទូកដែលត្រូវបានថតផ្សព្វផ្សាយនោះ គឺជាទូកដែលគាត់ [Nawat] ជ្រើសរើសខ្លួនឯង មិនមែនជាទូកដែលនាងខ្ញុំរៀបចំជូនគាត់នោះទេ។ ចំណែកឯពងក្រួច និងសណ្ដែកដី គាត់ជាទិញ និងរៀបចំខ្លួនឯង តែនាងខ្ញុំជាអ្នកចេញលុយ»។
រហូតមកដល់ពេលនេះ បេក្ខនារី Miss Grand International 2024 បានបន្តការប្រកួតនៅក្នុងប្រទេសថៃវិញ ខណៈដែលភាពចម្រូងចម្រាសជុំវិញការរៀបចំនៅកម្ពុជាមិនទាន់ផុតរលត់៕
