កញ្ញា ណាន់ ពេជ្រភារី អ្នកតំណាងក្រុម Youth Ambassadors លើកឡើងពីជំនឿចិត្ដនៃការលើកកម្ពស់ និងបំផុសភាពចម្រុះ ក៏ដូចគ្នាជាមួយការបង្កើតបរិយាបន្នសង្គម។ រូបថត សហការី
ភ្នំពេញ៖ «Youth Light Up Talk» ជាកម្មវិធីផ្តោតលើការបង្កើតបរិយាបន្នសង្គមដែលនឹងប្រព្រឹត្តទៅនៅថ្ងៃទី២៣ ខែវិច្ឆិកា ឆ្នាំ២០២៤ នៅ Factory Phnom Penh។
វាត្រូវបានផ្តួចផ្តើមដោយក្រុមយុវទូត ឬ Youth Ambassadors ដោយទទួលបានការគាំទ្រពីគម្រោង USAID Cambodia Advancing Youth Leadership ដែលកម្មវិធីនេះបានប្រមូលផ្តុំអ្នកដឹកនាំវ័យក្មេង ដែលមានសក្តានុពល រួមគ្នាក្នុងការជំរុញការអភិវឌ្ឍន៍សហគមន៍។
បន្ទាប់ពីការរង់ចាំរយៈពេលមួយឆ្នាំ ក្រុម Youth Ambassadors បានវិលត្រឡប់មកសារជាថ្មីជាមួយគោលបំណងក្នុងការ «លើកកម្ពស់ភាពជាអ្នកដឹកនាំរបស់យុវជន និងបន្លឺសំឡេងរបស់សហគមន៍ចម្រុះ»។
កម្មវិធី «Youth Light Up Talk» នេះនឹងប្រមូលផ្តុំក្រុមយុវជនទូទៅ និងយុវជនតំណាងសហគមន៍ចម្រុះ ដូចជា៖ ជនមានពិការភាព សហគមន៍អ្នកស្រឡាញ់ភេទដូចគ្នា និងជនជាតិដើមភាគតិច មកចែករំលែករឿងរ៉ាវរបស់ពួកគេ និងបន្លឺសំឡេងរបស់ពួកគេឱ្យមានភាពសុះសាយ។
កញ្ញា ណាន់ ពេជ្រភារី អ្នកតំណាងក្រុម Youth Ambassadors បាននិយាយថា៖ «យើងចង់ប្រាកដថា រឿងរ៉ាវរបស់គាត់ត្រូវបានស្តាប់ និងកោតសរសើរ ដើម្បីផ្តល់ឱកាស និងនាំមកនូវក្តីសង្ឃឹម ក៏ដូចជាការផ្លាស់ប្តូរដោយមិនគិតពីភាពលំបាក និងស្ថានការនានារបស់ពួកគាត់នៅក្នុងសង្គម។ យើងជឿជាក់ថា ការលើកកម្ពស់ និងបំផុសភាពចម្រុះ ក៏ដូចគ្នាជាមួយការបង្កើតបរិយាបន្នសង្គម»។
យុវតីស្ម័គ្រចិត្ដកម្មវិធី Youth Light Up Talk កញ្ញា ចេង សិរីសុធីកា បានបង្ហាញពីក្ដីរំភើបរីករាយដែលបានចូលរួមក្នុងកម្មវិធីនេះ និងទន្ទឹងរងចាំការចែករំលែករឿងរ៉ាវរបស់សហគមចម្រុះដល់មហាជន។
កញ្ញា ចេង សិរីសុធីកា ចូលរួមជាមួយយុវជនស្ម័គ្រចិត្ដ និងទន្ទឹងរងចាំការចែករំលែករឿងរ៉ាវរបស់សហគមចម្រុះដល់មហាជន។ រូបថត សហការី
កញ្ញាបាននិយាយថា៖ «ខ្ញុំដឹងប្រាកដថា បទពិសោធរបស់វាគ្មិនយើងនៅក្នុងព្រឹត្តិការណ៍នេះនឹងផ្តល់ផលប្រយោជន៍ជាច្រើន»។
ប្រធានបទនៅឆ្នាំនេះ គឺ «ភាពជាអ្នកដឹកនាំរបស់យុវជន និងការបន្លឺសំឡេងនៃសហគមន៍ចម្រុះ» ដែលផ្តួចផ្តើមក្នុងគោលបំណងបង្កើនការសន្ទនាជុំវិញបទដ្ឋានសង្គម ជំរុញឱ្យមានបរិយាបន្នសង្គម និងលើកកម្ពស់ភាពជាអ្នកដឹកនាំរបស់យុវជន។
តាមរយៈការបង្កើតវេទិកាសម្រាប់បន្លឺសំឡេងដែលត្រូវបានគេមើលរំលង កម្មវិធីនេះលើកកម្ពស់ភាពចម្រុះ និងបង្ហាញពីសាច់រឿងនៃខ្សែជីវិតពិតរបស់សហគមន៍ចម្រុះដែលអ្នកពុំដែលធ្លាប់បានឮពីមុនមក។
កម្មវិធី Youth Light Up Talk បានប្រមូលផ្តុំវាគ្មិនយុវជនជាច្រើន ដែលលើកឡើងពីក្ដីសុបិនរបស់ពួកគេ ដោយបង្ហាញពីសំឡេងចម្រុះ និងរឿងរ៉ាវដែលបំផុសគំនិត។
យុវជនក្នុងកម្មវិធី «Youth Light Up Talk» ផ្ដោតលើការជជែកអំពីជនមានពិការភាព សហគមន៍អ្នកស្រឡាញ់ភេទដូចគ្នា និងជនជាតិដើមភាគតិច មកចែករំលែករឿងរ៉ាវរបស់ពួកគេ និងបន្លឺសំឡេងរបស់ពួកគេឱ្យមានភាពសុះសាយ។ រូបថត សហការី
ស៊ីវម៉ី អ្នកស្រាវជ្រាវផ្នែកកសិកម្មដែលតំណាងឱ្យយុវជនទូទៅ បានយកឈ្នះលើការតស៊ូផ្នែកហិរញ្ញវត្ថុ និងការលំបាកក្នុងគ្រួសារ ដើម្បីឈានទៅមុខក្នុងការច្នៃប្រឌិតវិស័យស្បៀងអាហារប្រកបដោយនិរន្តរភាព។
ការងាររបស់កញ្ញាឆ្លុះបញ្ចាំងពីការប្តេជ្ញាចិត្តក្នុងការដោះស្រាយបញ្ហាប្រឈមផ្នែកបរិស្ថាន និងអាហារ ដោយផ្តល់ការបំផុសគំនិតដល់អ្នកដទៃដែលប្រឈមមុខនឹងឧបសគ្គស្រដៀងគ្នានេះ។
ស្រីហង្ស ជានិស្សិតផ្នែកសារព័ត៌មានឆ្នាំទី ៣ មានពិការភាព តស៊ូមតិសម្រាប់ជនពិការ និងប្រាថ្នាចង់ក្លាយជាអ្នកយកព័ត៌មានដែលនាំរឿងរ៉ាវមិនសូវបង្ហាញជូនចំពោះមុខ។
លាភ សមាជិកនៃសហគមន៍ជនជាតិដើមភាគតិចចារាយ បានបន្តការសិក្សាកម្រិតខ្ពស់ បើទោះបីជាប្រឆាំងនឹងប្រពៃណីនៅក្នុងសហគមន៍ក៏ដោយ។
ដំណើររបស់យុវតីរូបនេះបានលើកទឹកចិត្តដល់ក្មេងស្រីវ័យក្មេងនៅក្នុងសហគមន៍ឱ្យស្វែងរកការអប់រំ និងឯករាជ្យភាព ដែលបង្ហាញពីអំណាចផ្លាស់ប្តូរនៃការអប់រំ និងការតស៊ូ។
សុខជាតិ អ្នករចនាក្រាហ្វិក និងជាអ្នកតស៊ូមតិសិទ្ធិ LGBTQI+ បានទទួលយកអត្តសញ្ញាណរបស់ខ្លួនដោយបើកចំហ និងក្លាហាន។
ការងាររបស់លោកមិនត្រឹមតែផ្ដល់តម្លៃដល់ខ្លួនឯងប៉ុណ្ណោះទេ ប៉ុន្តែថែមទាំងស្វែងរកការជំរុញការផ្លាស់ប្តូរជាវិជ្ជមាននៅក្នុងសង្គម ដោយបង្កប់នូវស្មារតីនៃបរិយាប័ន្នភាព និងភាពធន់។
កម្មវិធីយុវជននេះបើកទូលាយសម្រាប់អ្នកចូលរួមស្ដាប់នូវបទពិសោធស្ដីពីរឿងរ៉ាវ ដោយឆ្លុះបញ្ចាំងពីថាមពលនៃភាពចម្រុះ និងជំរុញឱ្យមានការប្តេជ្ញាចិត្តជាថ្មីចំពោះការចូលរួម៕
