មហោស្រពនឹងបិទបញ្ចប់ជាមួយការប្រគំតន្ត្រីសប្បុរសធម៌ពិសេសអបអរសាទរខួបទី ៣០ របស់ហ្វារពន្លឺសិល្បៈ រួមទាំងការសម្តែងរបស់សិល្បករផលិតកម្មបារមី ដូចជា វណ្ណដា វណ្ណថាន និងតារាផ្សេងៗទៀត។ រូបថត សហការី
បាត់ដំបង៖ មហោស្រពសៀកអន្តរជាតិ «ទីនេះទីនោះ» ត្រឡប់មកវិញសម្រាប់ឆ្នាំ២០២៤ ជាមួយនឹងព្រឹត្ដិការណ៍សិល្បៈកាន់តែធំសម្បើម រួមមានការសម្ដែងសិល្បៈចម្រុះ វប្បធម៌ និងការលេងសៀក ក៏ដូចជាការប្រគំតន្ដ្រីអំឡុងពេលកម្មវិធីរយៈពេលមួយសប្តាហ៍។
រៀបចំដោយ ហ្វារពន្លឺសិល្បៈ មហោស្រពនៅឆ្នាំនេះមានសកម្មភាពដ៏កម្សាន្ដសម្បាយដែលលាយបញ្ចូលសិល្បៈអន្តរជាតិជាមួយប្រពៃណីខ្មែរ។
មហោស្រពចាប់ផ្តើមជាមួយនឹងក្បួនដង្ហែសៀកអាយ៉ងយក្ស ដែលជាព្រឹត្តិការណ៍ដ៏គួរឱ្យចាប់អារម្មណ៍ដែលបានរៀបចំដើម្បីប្រែក្លាយផ្លូវក្នុងខេត្តបាត់ដំបងទៅជាទីលាននៃការសម្ដែងសិល្បៈប្រកបដោយភាពច្នៃប្រឌិត ហើយកម្មវិធីបិទជាមួយនឹងការប្រគំតន្ត្រីជាមួយតារាចម្រៀងរ៉េប វណ្ណដា។
ក្បួនដង្ហែនឹងបង្ហាញនូវអាយ៉ងដែលរចនាយ៉ាងប្រណិត តន្ត្រីបន្តផ្ទាល់ និងសកម្មភាពសៀកយ៉ាងស្វាហាប់ បង្កើតជាឈុតឆាកផ្ដល់បទពិសោធន៍សម្រាប់មហាជនទស្សនា។
លោក ចាន់ រតនៈឧត្តម តំណាងក្រុមទំនាក់ទំនងរបស់ហ្វារពន្លឺសិល្បៈ បានថ្លែងថា៖ «ឆ្នាំនេះ មហោស្រពសៀកអន្ដរជាតិ ទីនេះទីនោះ នឹងក្លាយជាមហោស្រពដ៏ធំបំផុតរបស់យើង ដោយមានការដង្ហែក្បួនអាយ៉ងយក្ស ព្រមទាំងការសម្ដែងសៀកដ៏គួរឱ្យភ្ញាក់ផ្អើលពីសិល្បករជាតិ និងអន្តរជាតិចំនួន ១៣ រូបមកពីជាង ១០ ប្រទេស»។
ឆ្នាំនេះគ្រោងនឹងក្លាយជាការបោះពុម្ពលើកធំបំផុតមិនធ្លាប់មានរបស់មហោស្រពសៀកអន្ដរជាតិ ទីនេះទីនោះ ជាមួយនឹងសិល្បករ និងក្រុមសៀកមកពី ១២ ប្រទេសផ្សេងគ្នា រួមមាន ជប៉ុន កូរ៉េខាងត្បូង ឥណ្ឌា បារាំង អាល្លឺម៉ង់ អូស្ត្រាលី វៀតណាម ឡាវ និងថៃ។
ផែនទីក្បួនដង្ហែរអាយ៉ងយក្សតាមដងផ្លូវក្រុងបាត់ដំបង និងការសម្ដែងសៀកដ៏អស្ចារ្យក្នុងព្រឹត្ដិការណ៍មហោស្រពសៀកអន្ដរជាតិកន្លងមក។ រូបថត សហការី
ពួកគេនឹងសម្តែងនៅក្នុងបរិវេណអង្គការហ្វាពន្លឺសិល្បៈ និងទូទាំងក្រុងបាត់ដំបង។
សកម្មភាពទាំងនេះនឹងផ្សព្វផ្សាយពីវិសាលភាពនៃសិល្បៈសៀកប្រពៃណី ទាក់ទាញទស្សនិកជនគ្រប់វ័យជាមួយនឹងកាយសម្ព័ន្ធ លេងល្បែងប្រជាប្រិយ និងការនិទានរឿងដ៏ជក់ចិត្ត។
ក្រៅពីសកម្មភាពអន្តរជាតិ មហោស្រពនេះនឹងបង្ហាញពីការសម្តែងប្រពៃណីរបស់ប្រទេសកម្ពុជា ដែលផ្តល់នូវការទស្សនានូវសម្បត្តិវប្បធម៌ដ៏សម្បូរបែបនៃព្រះរាជាណាចក្រកម្ពុជា។
មហាជនក៏អាចទស្សនាការតាំងពិព័រណ៍សិល្បៈ រីករាយជាមួយម្ហូបអាហារក្នុងស្រុកជាច្រើននៅតាមតូបលក់អាហារ និងគាំទ្រផលិតផលសិប្បកម្ម និងវត្ថុអនុស្សាវរីយ៍ធ្វើដោយដៃដទៃទៀត។
លោក រតនៈឧត្តម បានពន្យល់ថា៖ «មហោស្រពឆ្នាំនេះមិនមែនគ្រាន់តែជាការប្រារឰសិល្បៈសៀកនោះទេ។ វាជាឱកាសមួយដើម្បីនាំយកសហគមន៍រួមគ្នា ចែករំលែកវប្បធម៌ និងបង្កើតបទពិសោធន៍ដែលមិនអាចបំភ្លេចបាន»។
ឆ្នាំនេះគ្រោងនឹងក្លាយជាការបោះពុម្ពលើកធំបំផុតមិនធ្លាប់មានរបស់មហោស្រពសៀកអន្ដរជាតិ ទីនេះទីនោះ ជាមួយនឹងសិល្បករ និងក្រុមសៀកមកពី ១២ ប្រទេសផ្សេងគ្នា រួមមាន ជប៉ុន កូរ៉េខាងត្បូង ឥណ្ឌា បារាំង អាល្លឺម៉ង់ អូស្ត្រាលី វៀតណាម ឡាវ និងថៃ។ រូបថត សហការី
លោក រតនៈឧត្តម បានប្រាប់ភ្នំពេញប៉ុស្ដិ៍ថា៖ «មហោស្រពនឹងបិទបញ្ចប់ជាមួយការប្រគំតន្ត្រីសប្បុរសធម៌ពិសេសអបអរសាទរខួបទី ៣០ របស់ហ្វារពន្លឺសិល្បៈ រួមទាំងការសម្តែងរបស់សិល្បករផលិតកម្មបារមី ដូចជា វណ្ណដា វណ្ណថាន និងតារាផ្សេងៗទៀត ដែលរៀបចំនៅក្នុងបរិវេណហ្វារពន្លឺសិល្បៈ»។
យោងតាមកាលវិភាគ មហោស្រពសៀកអន្តរជាតិ ទីនេះទីនោះ នឹងចាប់ផ្តើមនៅថ្ងៃទី ២២ ខែវិច្ឆិកា ជាមួយនឹងក្បួនដង្ហែរសៀកអាយ៉ងយក្ស ដែលប្រែក្លាយផ្លូវក្នុងខេត្តបាត់ដំបង ទៅជាការបង្ហាញប្រកបដោយភាពច្នៃប្រឌិត។
ចាប់ពីថ្ងៃទី ២២ ដល់ថ្ងៃទី ២៧ ខែវិច្ឆិកា មហោស្រពនេះនឹងបង្ហាញពីការសម្តែងសៀកដ៏អស្ចារ្យដោយសិល្បករដែលមានទេពកោសល្យចំនួន ១៣ នាក់មកពីជាង ១០ ប្រទេស។
មហោស្រពចាប់ផ្តើមពីក្បួនដង្ហែសៀកអាយ៉ងយក្ស ដែលជាប្រែក្លាយដងផ្លូវក្នុងខេត្តបាត់ដំបងទៅជាទីលាននៃការសម្ដែងសិល្បៈប្រកបដោយភាពច្នៃប្រឌិត។ រូបថត សហការី
ចាប់ពីថ្ងៃទី ២៣ ដល់ថ្ងៃទី ២៦ ខែវិច្ឆិកា មហាជនអាចរីករាយជាមួយមរតកវប្បធម៌ដ៏សម្បូរបែបរបស់ប្រទេសកម្ពុជាជាមួយនឹងការសម្តែងប្រពៃណី ការតាំងពិព័រណ៍សិល្បៈ និងតូបលក់អាហារក្នុងស្រុកដ៏សម្បូរបែប។
សកម្មភាពទាំងនេះផ្តល់ឱកាសពិសេសមួយដើម្បីទទួលយកបទពិសោធន៍ប្រសព្វនៃសិល្បៈប្រពៃណី និងសហសម័យ។
មហោស្រពនឹងបញ្ចប់នៅថ្ងៃទី ២៧ ខែវិច្ឆិកាជាមួយនឹងការប្រគំតន្ត្រីសប្បុរសធម៌ដែលរៀបចំនៅបរិវេណសាលាហ្វារពន្លឺសិល្បៈ។
សម្រាប់ព័ត៌មានបន្ថែមអំពីកាលវិភាគ និងសំបុត្រ ចូលទៅកាន់គេហទំព័ររបស់ហ្វារពន្លឺសិល្បៈ៕
