ស្នាដៃសិល្បៈដែលបង្ហាញពីទិដ្ឋភាពជនបទនៃប្រទេសកម្ពុជាត្រូវបានដាក់បង្ហាញជាផ្លូវការនៅសារមន្ទីរនៅថ្ងៃទី ២៨ ខែតុលា នៅសាខាធនាគារជាតិនៃកម្ពុជា។ រូបថត សហការី
ភ្នំពេញ៖ ការបន្ថែមដ៏សំខាន់មួយដល់ប្រវត្តិសាស្ត្រសិល្បៈខ្មែរត្រូវបានធ្វើឡើងនៅថ្ងៃទី ៤ ខែវិច្ឆិកា នៅសារមន្ទីរសេដ្ឋកិច្ច និងរូបិយវត្ថុ ព្រះស្រីឦសានវរ្ម័ន (ស.ស.រ)។
សារមន្ទីរបានទទួលនូវផ្ទាំងគំនូរទីពីរ ជាស្នាដៃរបស់វិចិត្រករខ្មែរដ៏ល្បីឈ្មោះលោក ញឹក ឌឹម ដោយមោទនភាពចំពោះការបរិច្ចាគដ៏សប្បុរសពីសំណាក់លោកបណ្ឌិត Milton Osborne ជាអ្នកសិក្សាអូស្ត្រាលីដ៏ល្បីល្បាញ និងជាអតីតអ្នកការទូត។
ស្នាដៃសិល្បៈដែលបង្ហាញពីទិដ្ឋភាពជនបទនៃប្រទេសកម្ពុជាត្រូវបានដាក់បង្ហាញជាផ្លូវការនៅសារមន្ទីរនៅថ្ងៃទី ២៨ ខែតុលា នៅសាខាធនាគារជាតិនៃកម្ពុជា។
លោក ប្លែស គីលីយ៉ង់ សហប្រធាន សារមន្ទីរ ស.ស.រ បានសម្តែងការដឹងគុណចំពោះការបរិច្ចាគដ៏មានតម្លៃនេះ ដោយនិយាយថា៖ «ខ្ញុំសូមអរគុណលោកបណ្ឌិត Milton Osborne សម្រាប់ការបរិច្ចាគដ៏សំខាន់របស់លោកដល់សារមន្ទីរ ស.ស.រ។ រូបដែលគូរដោយវិចិត្រករខ្មែរដ៏ល្បីឈ្មោះ គឺលោក ញឹក ឌឹម នេះនឹងត្រូវបានកត់ត្រាទុកក្នុងបញ្ជីសារពើភ័ណ្ឌរបស់សារមន្ទីរសម្រាប់ការអភិរក្ស នឹង ដាក់តាំងពិព័រណ៍នាពេលអនាគត»។
ការបរិច្ចាគ របស់លោកបណ្ឌិត Milton Osborne បានគូសបញ្ជាក់បន្ថែមពីទំនាក់ទំនងពិសេសរបស់លោកជាមួយប្រទេសកម្ពុជា ដែលបានចាប់ផ្តើមដោយបេសកកម្មការទូតអូស្ត្រាលីរបស់លោកមកកាន់ទីក្រុងភ្នំពេញក្នុងឆ្នាំ១៩៥៩។
លោកបណ្ឌិត Milton Osborne ជាអ្នកសិក្សាអូស្ត្រាលីដ៏ល្បីល្បាញ និងជាអតីតអ្នកការទូត បានធ្វើការបរិច្ចាគគំនូរស្នាដៃរបស់វិចិត្រករខ្មែរ ញឹក ឌឹម ដល់សារមន្ទីរ ស.ស.រ។ រូបថត សហការី
ការណ៍ដែលលោកបណ្ឌិត Milton Osborne បានប្រគល់ផ្ទាំងគំនូរដ៏មានតម្លៃនេះជូនសារមន្ទីរ ស.ស.រ «គឺជាការឆ្លុះបញ្ចាំងពីការស្ងើចសរសើររបស់លោកចំពោះប្រជាជនកម្ពុជាជាយូរមកហើយ និងជាការទទួលស្គាល់លើការរួមចំណែកដ៏សំខាន់របស់វិចិត្រករ ញឹក ឌឹម ដល់វប្បធម៌ខ្មែរ»។
ស្នាដៃរបស់លោក ញឹក ឌឹម គឺជាការឆ្លុះបញ្ចាំងពីទិដ្ឋភាពសិល្បៈដ៏រស់រវើកក្នុងអំឡុងពេលរវាង ក្រោយសម័យឯករាជ្យ និងមុនពេលអ្វីៗត្រូវបានបំផ្លាញដោយសង្គ្រាមនិងក្នុងរបបប៉ុលពត។
ការបន្ថែមស្នាដៃទីពីររបស់លោកបណ្ឌិត Osborne ក៏បានបន្ថែមនូវកេរដំណែលរបស់វិចិត្រករក្នុងបេតិកភណ្ឌជាតិរបស់កម្ពុជា។
វាក៏បញ្ជាក់ពីការទទួលស្គាល់ជាអន្តរជាតិនៃសិល្បៈខ្មែរផងដែរ ដោយសារការបរិច្ចាគទាំងនេះបានមកពីបុគ្គលដែលមានទំនាក់ទំនងយ៉ាងស៊ីជម្រៅជាមួយនឹងប្រវត្តិសាស្ត្ររបស់ប្រទេស។
ទំនាក់ទំនងរបស់លោកបណ្ឌិត Osborne ជាមួយប្រទេសកម្ពុជាបានពង្រីកលើសពីអាជីពការទូតដំបូងរបស់លោក។
អ្នកនិពន្ធដ៏ឆ្នើម និងជាអ្នកជំនាញខាងប្រវត្តិសាស្ត្រអាស៊ីអាគ្នេយ៍ លោក Osborne បានខិតខំយ៉ាងខ្លាំង ដើម្បីសិក្សាស្វែងយល់ និងការដឹងគុណចំពោះវប្បធម៌ ក៏ដូចជាប្រវត្តិសាស្ត្រដ៏សម្បូរបែបក្នុងតំបន់៕
