ជនជាតិចាមធ្វើឱ្យរស់ឡើងវិញនូវសិល្បៈតម្បាញតាមរយៈការចងចាំរបស់មនុស្សចាស់។ រូបថត DC-CAM
ភ្នំពេញ៖ កម្ពុជានឹងធ្វើជាម្ចាស់ផ្ទះរៀបចំវេទិកាទេសចរណ៍មូស្លីមកម្ពុជាឆ្នាំ២០២៤ នៅថ្ងៃពុធ ទី១៨ ខែធ្នូ នៅសណ្ឋាគារភ្នំពេញ ក្រោមប្រធានបទ «ភាពស្រស់ស្អាតនៃសុខដុមនីយកម្ម និងគោលដៅទេសចរណ៍មូស្លីម » កាលានុវត្តភាព និងការត្រៀមលក្ខណៈសម្បត្តិ។
វេទិកាទេសចរណ៍មូស្លីមកម្ពុជាដែលរៀបចំឡើងដោយក្រុមការងារទេសចរណ៍ឥស្លាមកម្ពុជានៅក្រសួងទេសចរណ៍ គឺជាព្រឹត្តិការណ៍ដ៏សំខាន់មួយក្នុងកិច្ចខិតខំប្រឹងប្រែងរបស់កម្ពុជាក្នុងការលើកកម្ពស់ការទាក់ទាញរបស់ខ្លួនក្នុងនាមជាគោលដៅសម្រាប់ប្រជាជនមូស្លីម។
វាមានគោលបំណងជំរុញកំណើនសេដ្ឋកិច្ចតាមរយៈទេសចរណ៍ តាមរយៈការផ្សព្វផ្សាយបេតិកភណ្ឌវប្បធម៌ និងតំបន់ប្រវត្តិសាស្ត្រដ៏សម្បូរបែបរបស់សហគមន៍អ៊ីស្លាម ដោយផ្តល់ជូនភ្ញៀវទេសចរក្នុងស្រុក និងអន្តរជាតិនូវទស្សនវិស័យពិសេសមួយអំពីប្រវត្តិសាស្ត្រចម្រុះរបស់ប្រទេស។
អ្នកស្រី សូ ហ្វារីណា នាយករងនៃមជ្ឈមណ្ឌលឯកសារកម្ពុជា (DC-Cam) បានសង្កត់ធ្ងន់លើចក្ខុវិស័យរយៈពេលវែងនៅពីក្រោយវេទិកានេះ។
អ្នកស្រីបាននិយាយថា៖ «យើងក៏មានផែនការសកម្មភាពវែងឆ្ងាយចំពោះចក្ខុវិស័យពីព្រោះនេះគឺជាវេទិកាលើកទីមួយ និងជាផ្នែកមួយនៃផែនការសកម្មភាព ហើយដោយសារវាជាលើកទីមួយ យើងមានវាគ្មីនប្រទេសផ្សេង ដូចជា ម៉ាឡេស៊ី ឬថៃ មកចែករំលែកបទពិសោធក្នុងការផ្សព្វផ្សាយទេសចរណ៍ក្នុងសហគមអ៊ីស្លាមដើម្បីឱ្យគេស្គាល់ និងចូលរួមចំណែកក្នុងការកសាងសេដ្ឋកិច្ច»។
គោលដៅនៃការរៀបចំវេទិកានេះ គឺជំរុញការរីកចម្រើនសេដ្ឋកិច្ចតាមរយៈទេសចរណ៍នៅក្នុងសហគមន៍អ៊ីស្លាម ឬមូស្លីម និងកសាងទំនាក់ទំនងឱ្យគេស្គាល់នៅស្រុកខ្មែរ ជាពិសេស ថាតើសហគមន៍អ៊ីស្លាមមានតំបន់ទេសចរណ៍ប៉ុន្មានកន្លែង និងមានស្នាដៃអ្វីខ្លះ ដែលភ្ញៀវទេសចរអាចសិក្សាស្វែងយល់ និងទស្សនា។
បន្ទាប់ពីការដួលរលំនៃរបបខ្មែរក្រហម ស្ត្រីចាមបានប្រើក្រមាធ្វើជាកន្សែងរុំ មុនពេលពួកគេបង្កើតកន្សែងផ្ទាល់ខ្លួនដែលកើតចេញពីការចងចាំរបស់ពួកគេ។ រូបថត DC-CAM
អ្នកស្រីបានប្រាប់ភ្នំពេញប៉ុស្ដិ៍ថា៖ «វាលគ្មីនខ្មែរយើងក៏នឹងចែករំលែកនូវភាពខ្លាំង ក៏ដូចជាអ្វីដែលយើងអាចផ្សព្វផ្សាយជាមួយគេ និងធ្វើឱ្យប្រសើរឡើងនូវចំណុចខ្វះខាត។ សម្រាប់មជ្ឈមណ្ឌលឯកសារកម្ពុជាយើងធ្លាប់ធ្វើកិច្ចការច្រើនទាក់ទងទេសចរណ៍ ក៏ដូចជាយើងហៅថា ទេសចរណ៍ប្រវត្តិសាស្ត្រដែលមានន័យថា យើងមើលទីតាំងផ្សេងៗដែលសហគមន៍ទទួលរង ក៏ដូចជាភាពខ្លាំងរបស់សហគមន៍»។
អ្នកស្រី បានលើកឡើងថា សហគមន៍មានស្នាដៃសិល្បៈ ដូចជាសូត្រចាម ដែលបច្ចុប្បន្នមជ្ឈមណ្ឌលជួយដល់ស្ដ្រីចំណាស់នៅខេត្ដកំពង់ចាម។
សូត្រចាមជួយចូលរួមចំណែកក្នុងការចងចាំ ការរក្សានូវអ្វីដែលពួកគេមាន ជាផ្នែកនៃសិល្បៈ និងវប្បធម៌ ក៏ដូចជាបង្កើនប្រាក់ចំណូល ដែលជាការជំរុញកំណើនសេដ្ឋកិច្ចផ្ទាល់ខ្លួន គ្រួសារ និងសហគមន៍។
ចុងក្រោយ ពួកគេអាចចូលរួមចំណែកដល់ប្រទេសជាតិដែលមានន័យថា ពួកគេអាចផលិតសូត្របានច្រើន នៅពេលពួកគេមានភាពខ្លាំង និងគំនិតច្នៃប្រឌិត។
សូត្រចាមកំពុងត្រូវបានផ្សព្វផ្សាយឱ្យបានទូលំទូលាយ ពីព្រោះសូត្រចាមមានសារៈសំខាន់នៅត្រង់ថា ក្រៅពីផលិតផលសូត្រ វាមានជាសាច់រឿងនៅពីក្រោយសូត្រថា តើវាមានប្រវត្ដិយ៉ាងដូចម្ដេច ហើយវាមានអត្ថន័យយ៉ាងដូចម៉េចដែលបង្កើតជាគោម ឬពណ៌។
អ្នកស្រី ហ្វារីណា បានបញ្ជាក់ថា៖ «គោម និងពណ៌ទាំងនេះ កើតចេញពីការចងចាំថា តើពីដើមឡើយ សូត្រចាមមានពណ៌យ៉ាងដូចម្ដេច គោម ឬក្បាច់យ៉ាងដូចម្ដេច ដែលប្រើប្រាស់វត្ថុធម្មជាតិ និងអ្វីៗនៅជុំវិញខ្លួនគាត់»។
អ្នកស្រីបន្ដថា៖ «យើងផ្ដល់អំណាចដល់ស្ដ្រីចាមទាក់ទងវប្បធម៌ និងជំនួញ ក៏ដូចជា ប្រវត្ដិសាស្ដ្រ ដែលពួកគាត់និយាយអំពីសាច់រឿង ហើយប្រើប្រាស់សាច់រឿងនេះបង្កើតការចងចាំ និងរក្សាការចងចាំ ក៏ដូចជាបង្កើតចំណូលផ្សារភ្ជាប់ពិភពលោក»។
ឯកអគ្គរដ្ឋទូតទួរគីប្រចាំកម្ពុជា លោកស្រី Ülkü Kocaefe រុំកន្សែងសូត្រចាម នៅពិព័រណ៍ SheTrades នៅកោះពេជ្រ រាជធានីភ្នំពេញ។ រូបថត DC-CAM
មជ្ឈមណ្ឌលឯកសារកម្ពុជាក៏មានទីតាំងសម្រាប់ការទស្សនានៅស្វាយឃ្លាំង ដូចជា សឺន ឬប៉មអ៊ីស្លាម ដែលសហគមន៍កសាងឡើងសម្រាបមើលព្រះខែ និងស្រែកប្រាប់បុព្វជិកអ៊ីស្លាមទៅថ្វាយបង្គំ។
ក្រុមស្ដ្រីចាម ដែលរស់រានពីសម័យខ្មែរក្រហម បានចងក្រងជាក្រុមក្នុងការផលិតវត្ថុសិល្បៈសូត្រចាម ដែលកើតឡើងពីការចងចាំតៗគ្នា។
អ្នកស្រី ហ្វារីណា បានថ្លែងថា៖ «ទាំងនេះបានធ្វើឱ្យក្រសួងទេសចរណ៍ ជាពិសេសក្រុមការងារទេសចរណ៍មូស្លីមកម្ពុជា បានផ្សារភ្ជាប់ DC-Cam ក្នុងកិច្ចការនេះ។ វាជាការផ្សារភ្ជាប់ប្រវត្ដិសាស្ដ្រ សេដ្ឋកិច្ច និងវប្បធម៌ឱ្យកាន់តែរឹងមាំ»។
ដោយសារកម្ពុជាដាក់ខ្លួនជាគោលដៅទេសចរណ៍មិត្តភាពមូស្លីមដែលកំពុងរីកចម្រើន វេទិកាទេសចរណ៍មូស្លីមកម្ពុជាឆ្នាំ២០២៤ នឹងក្លាយជាព្រឹត្តិការណ៍ដ៏សំខាន់មួយក្នុងការរៀបចំអនាគតនៃឧស្សាហកម្មទេសចរណ៍របស់ប្រទេស ដោយរួមបញ្ចូលគ្នានូវការអភិរក្សវប្បធម៌ជាមួយនឹងកំណើនសេដ្ឋកិច្ច៕
