គម្រោងទន្លេសាបកម្ពុជា ដែលផ្តោតលើការកាត់បន្ថយភាពក្រីក្រ និងលើកកម្ពស់សិទ្ធិស្រ្តី ទទួលបានពានរង្វាន់អន្តរជាតិ។ សហការី
គម្រោងដែលលេចធ្លោក្នុងការអភិវឌ្ឍកសិកម្មខ្នាតតូចនៅកម្ពុជា ដោយផ្តល់ការយកចិត្តទុកដាក់ និងអាទិភាពខ្ពស់ក្នុងការកាត់បន្ថយភាពក្រីក្រ និង លើកកម្ពស់សិទ្ធិស្រ្តី បានឈ្នះពានរង្វាន់ឆ្នើមជាសកលផ្នែកយេនឌ័រ នៃមូលនិធិអន្តរជាតិសម្រាប់អភិវឌ្ឍន៍កសិកម្ម (IFAD Gender Award) ដ៏ល្បីល្បាញ តំណាងឱ្យតំបន់អាស៊ីនិងប៉ាស៊ីហ្វិក តាមរយៈដំណើរការជ្រើសរើស ប្រកបដោយភាពប្រកួតប្រជែងខ្ពស់ ក្នុងចំណោមគម្រោងដទៃមកពី ១៧៧ ប្រទេសជុំវិញពិភពលោក។
នេះបើយោងតាមសេចក្តីប្រកាសព័ត៌មានរបស់គណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (NCDDS) ចុះថ្ងៃទី ២៣ ខែកុម្ភៈ ២០២៤។
លោក នី គឹមសាន អនុប្រធាន NCDDS និងជាប្រធានគម្រោង TSSD-AF លោកស្រី ម៉ន លក្ខិណា នាយិកាក្រុមប្រឹក្សាភិបាលនៃសមាគមកែលម្អជីវភាពកសិករ និង លោកស្រី លឹម សេរីរ័ត្ន ទីប្រឹក្សាយេនឌ័រ បានធ្វើជាតំណាងនៃគម្រោងទៅទទួលពានរង្វាន់ខាងលើនៅក្នុងពិធីប្រគល់រង្វាន់ផ្លូវការកាលពីថ្ងៃទី ១៤-១៥ ខែកុម្ភៈ នៅទីក្រុងរ៉ូម នៃប្រទេសអ៊ីតាលី។
សេចក្តីប្រកាសបញ្ជាក់ថា៖«គម្រោងហិរញ្ញប្បទានបន្ថែមសម្រាប់កាត់បន្ថយភាពក្រីក្រ និងអភិវឌ្ឍន៍កសិកម្មខ្នាតតូចតំបន់ទន្លេសាប (TSSD-AF) នេះបានឈ្នះពានរង្វាន់ដោយសារការប្តេជ្ញាចិត្តផ្អែកលើលទ្ធផលយ៉ាងខ្លាំងលើសមភាពយេនឌ័រនិងការផ្តល់សិទ្ធិអំណាចដល់ស្ត្រីជនបទក្នុងវិស័យកសិកម្ម និងការលើកកម្ពស់ជីវភាព និងលទ្ធភាពទទួលបានហិរញ្ញប្បទាន នៅក្នុងខេត្តគោលដៅចំនួន ៧ របស់ខ្លួន ក្នុងតំបន់ទន្លេសាបនៃប្រទេសកម្ពុជា»។
គម្រោងនេះ អនុវត្តដោយលេខាធិការដ្ឋាននៃគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (NCDDS) នៃក្រសួងមហាផ្ទៃ និង ក្រសួងកសិកម្ម រុក្ខាប្រមាញ់ និងនេសាទ ចាប់តាំងពី ឆ្នាំ២០១៨ មក ។
ក្រោមសហហិរញ្ញប្បទានពីរាជរដ្ឋាភិបាលកម្ពុជា ធនាគារអភិវឌ្ឍន៍អាស៊ី (ADB) និង IFAD គម្រោង TSSD-AF នេះបានជំរុញឱ្យមានតំណាងស្ត្រីដល់ទៅ ៦០% នៅក្នុងគណៈកម្មការគ្រប់គ្រងនៅទូទាំងឃុំគោលដៅចំនួន ២៧០ របស់ ខ្លួន ធ្វើឱ្យ ធនធាន កសិកម្ម របស់កម្ពុជា មានភាព ប្រសើរឡើង គួរឱ្យកត់សម្គាល់ និង អភិវឌ្ឍវិស័យកសិកម្មប្រកបដោយនិរន្តរភាពរយៈពេលវែងក្នុងខេត្តគោលដៅ។
តាមរយៈសកម្មភាពទាំងនេះវាបានផ្តល់អត្ថប្រយោជន៍ដល់គ្រួសារចំនួន ៦៥០០០០ ជាពិសេសកសិករខ្នាតតូចដែលធ្លាក់ក្នុងភាពក្រីក្រជាយូរមកហើយ។
លោកស្រី ម៉ន លក្ខិណា បានមានប្រសាសន៍ថា «វាជាកិត្តិយសណាស់សម្រាប់ខ្ញុំដែលបានចូលរួម តំណាងឱ្យស្ត្រីដែលជាអ្នកទទួលផលនៃគម្រោង ដើម្បីទៅទទួលពានរង្វាន់។ ពួកគាត់កំពុងរីករាយជាមួយនឹងជីវភាពរស់នៅដែលប្រសើរជាងមុន មានលទ្ធភាពបញ្ជូនកូនៗឱ្យរៀនបានខ្ពស់ ព្រមទាំងពង្រីកអាជីវកម្មរបស់ខ្លួនបន្ថែម។ ក្នុងនាមជាអ្នកទទួលផលម្នាក់ពីគម្រោង និងក្នុងនាមជាខ្មែរម្នាក់ ខ្ញុំពិតជាមានមោទនភាពយ៉ាងខ្លាំង ចំពោះពានរង្វាន់ដែលទទួលបាននេះ»។
គម្រោង TSSD-AF នេះបានអនុវត្តបន្តពីគម្រោងកាត់បន្ថយភាពក្រីក្រ និងអភិវឌ្ឍន៍កសិកម្មខ្នាតតូចតំបន់ទន្លេសាប (TSSD) ដែលជាជំហានទីមួយ។ គម្រោង TSSD-AF មានថវិកាសរុប ៦៦ លានដុល្លារ ដែលក្នុងនោះមានសហហិរញ្ញប្បទានពីរាជរដ្ឋាភិបាលកម្ពុជា ៦ លានដុល្លារ ពី ADB ៥០ លានដុល្លារ និង ពី IFAD ១០ លានដុល្លារ។
លោក នី គឹមសាន បានមានប្រសាសន៍ថា ៖«គម្រោង TSSD-AF របស់យើង ឆ្លើយតបទៅនឹងយុទ្ធសាស្ត្រចតុកោណ និង យុទ្ធសាស្ត្របញ្ចកោណ របស់រាជរដ្ឋាភិបាល ដែលផ្តល់អាទិភាពខ្ពស់ ក្នុងការកាត់បន្ថយភាពក្រីក្រប្រកបដោយបរិយាបន្ន និរន្តរភាព និង ភាពធន់»។
លោកបន្តថា គម្រោងទាំងមូល ផ្តល់អាទិភាពធំធេងលើការរួមបញ្ចូលស្ត្រី ជាពិសេសកសិករខ្នាតតូចស្ថិតក្នុងភាពក្រីក្រ ព្រមទាំងលើកកម្ពស់ ផលិតភាពនិងពិពិធកម្មកសិកម្ម ក៏ដូចជាលទ្ធភាពទទួលបានទីផ្សារក្នុងតំបន់គោលដៅរបស់គម្រោង ដែលធ្វើឱ្យជីវភាពរស់នៅរបស់ពួកគាត់បានប្រសើរ និងមានចំណូលកាន់តែខ្ពស់។
សូមជម្រាបថា ដោយអនុវត្តរហូតដល់ ខែកក្កដា ឆ្នាំ ២០២៤ គម្រោង TSSD-AF គ្របដណ្តប់ជាពិសេសលើខេត្តក្នុងតំបន់ទន្លេសាប ដែលក្នុងនោះខេត្តគោលដៅរបស់គម្រោងរួមមាន បាត់ដំបង បន្ទាយមានជ័យ សៀមរាប កំពង់ធំ កំពង់ចាម ត្បូងឃ្មុំ និងព្រៃវែង៕
